ءماجىلىس دەپۋتاتى جاڭا باستاما كوتەردى
ءماجىلىس دەپۋتاتى، Respublica پارتياسىنىڭ وكىلى ولجاس قۇسپەكوۆ ۇكىمەتكە ەلدەگى كولىك يەلەرى ءۇشىن ماڭىزدى سانالاتىن ماسەلەگە قاتىستى تىڭ ۇسىنىس جاسادى. ول ۆيسە-پرەمەر – ۇلتتىق ەكونوميكا ءمينيسترى سەرىك جۇمانگارينگە رەسمي ساۋال جولداپ، اۆتوموبيلدەردىڭ الدىڭعى ءبۇيىر شىنىلارىن (ياعني الدىڭعى ەسىكتەگى تەرەزەلەردى) اقىلى تۇردە قاراڭعىلاۋعا – «تونيروۆكاعا» – رۇقسات بەرۋدى ۇسىندى. بۇل تۋرالى Aqshamnews.kz سايتى حابارلايدى.
قۇسپەكوۆتىڭ ايتۋىنشا، بۇل باستاما مەملەكەتتىك بيۋدجەتكە قوسىمشا تابىس اكەلىپ قانا قويماي، كولىك يەلەرىنىڭ ۇزاق جىلدار بويى ايتىپ كەلە جاتقان قاجەتتىلىگىن زاڭداستىرۋعا مۇمكىندىك بەرەدى. دەپۋتات مۇنداي وزگەرىستى جول قاۋىپسىزدىگىمەن قاتار، قۇقىق قورعاۋ ورگاندارى تاراپىنان باقىلاۋ مەن ءتارتىپتىڭ ساقتالۋىن دا ەسكەرىپ جۇزەگە اسىرۋعا بولاتىنىن مالىمدەدى.
دەپۋتات ءوز باستاماسىندا باسقا ەلدەردىڭ تاجىريبەسىنە سۇيەنىپ وتىر. ماسەلەن، بىرىككەن اراب امىرلىكتەرى، رەسەي، اقش سەكىلدى ەلدەردە بەلگىلى ءبىر مولشەردە جانە اقىلى نەگىزدە تونيروۆكاعا رۇقسات بەرىلەدى. ولجاس قۇسپەكوۆ قازاقستان ازاماتتارىنىڭ دا وسى ءتارىزدى قىزمەت ءۇشىن اقى تولەۋگە دايىن ەكەنىن، ال بۇل قاراجات مەملەكەتتىك بيۋدجەتكە ءتۇسىپ، ءتۇرلى الەۋمەتتىك باعدارلامالارعا جۇمسالۋى مۇمكىن ەكەنىن اتاپ ءوتتى.
اتالعان باستاما قوعامدا قىزۋ پىكىرتالاس تۋدىردى. ءبىر تاراپ بۇل ۇسىنىستى قولداپ، قازاقستاندا اۋا رايىنىڭ ەرەكشەلىگىن، اسىرەسە كۇن ساۋلەسىنىڭ تىم كۇشتى كەزەڭدەرىن العا تارتسا، ەكىنشى تاراپ قاۋىپسىزدىك ماسەلەسىن، اسىرەسە قۇقىق قورعاۋ قىزمەتكەرلەرى ءۇشىن كولىك ءىشىن كورۋ مۇمكىندىگىنىڭ شەكتەلەتىنىن ەسكەرتىپ، بۇل شەشىمگە قارسى پىكىر ءبىلدىرىپ جاتىر.
كولىك نارىعىنىڭ ساراپشىسى ايدوس ءمۇستافيننىڭ پىكىرىنشە، بۇل باستاما ءوز ۋاقىتىمەن كوتەرىلىپ وتىر. «قازاقستانداعى كولىك يەلەرى ءۇشىن تونيروۆكا – جاي ءسان ەمەس، كۇننەن قورعانۋ، ىشكى تەمپەراتۋرانى ساقتاۋ، ءتىپتى قاۋىپسىزدىك شاراسى رەتىندە قاراستىرىلادى. ەگەر بۇل پروسەسس زاڭ اياسىندا، ناقتى تالاپتارمەن جۇزەگە اسسا، قوعام ءۇشىن دە، مەملەكەت ءۇشىن دە ءتيىمدى بولادى»، – دەيدى ساراپشى.