الماتىدا وتكەن قالالىق سەمينار – ءمۇعالىم بەدەلىن كوتەرۋدىڭ، ساپالى بىلىمگە باستار جولدىڭ جارقىن كورىنىسى
بۇگىنگى ءبىلىم بەرۋ جۇيەسى – جاي عانا وقىتۋ ەمەس، جاڭا عاسىردىڭ تالابىنا ساي جەكە تۇلعا قالىپتاستىرۋ الاڭى. بۇل – يننوۆاسيالىق تاسىلدەردى، شىعارماشىلىق كوزقاراستى، كاسىبي ىنتىماقتاستىقتى قاجەت ەتەتىن كۇردەلى دە جاۋاپتى سالا. مۇنداي ماڭىزدى ۇدەرىستە ۇستازعا ارتىلار جۇك اۋىر. ال سول ۇستاز ەڭبەگى ەسكەرىلىپ، تاجىريبەسى تاراتىلىپ، كاسىبي شەبەرلىگى شىڭدالىپ وتىرسا، ءبىلىم ساپاسى ءسوزسىز وسەدى.
2025 جىلدىڭ 25 ساۋىرىندە الماتى قالاسى، ناۋرىزباي اۋدانىنداعى №208 مەكتەپ-گيمنازياسىنىڭ قابىرعاسىندا وتكەن «ءبىلىم بەرۋ ۇردىسىندەگى وزات تاجىريبە: ورتاق ماقساتتارعا جەتۋدىڭ كەپىلى» اتتى قالالىق سەمينار – وسى ءسوزىمىزدىڭ ايقىن دالەلى.
بۇل سەمينار – ءبىر كۇندىك جيىن عانا ەمەس، بۇگىنگى ءبىلىم سالاسىنداعى تىڭ يدەيالاردىڭ، زاماناۋي كوزقاراستاردىڭ، ءارى ەڭ باستىسى، ءمۇعالىمنىڭ قوعامداعى ورنىن ايقىندايتىن ماڭىزدى الاڭ. الماتى قالاسى ءبىلىم باسقارماسى، «قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى» جانە №208 مەكتەپ-گيمنازياسىنىڭ بىرلەسە ۇيىمداستىرعان بۇل شارا پەداگوگتەر قاۋىمى ءۇشىن ۇلكەن سەرپىلىس اكەلدى.
كاسىبي شەبەرلىكتىڭ كوكجيەگى كەڭەيدى!
سەمينار بارىسىندا ۇستازدار «ماماندىقتار قالاشىعىنا ساياحات» ارقىلى وقۋشىلاردىڭ كاسىبي باعدارىن انىقتاۋعا ارنالعان ەرەكشە جوبامەن تانىستى. «زەرتتەۋ جۇمىستارى مەن تاجىريبە الاڭى» الاڭىندا ارىپتەستەر عىلىمي ىزدەنىستەرىمەن ءبولىسىپ، ءوز تاجىريبەلەرىن ورتاعا سالدى. سەميناردىڭ رەسمي اشىلۋىنان كەيىن تىڭدالعان مازمۇندى باياندامالار مەن ۇلگىلى ساباقتار كوپشىلىكتى ءتانتى ەتتى. بۇل – تاجىريبەنىڭ ءسوز جۇزىندە ەمەس، ناقتى ىسپەن دالەلدەنگەنى.
جاڭا ادىستەمەلەر، پەداگوگيكالىق يننوۆاسيالار، تەوريا مەن پراكتيكانى ۇشتاستىرۋ، كروسس-پاندىك بايلانىستار – ءبارى دە قازىرگى ءبىلىم بەرۋ جۇيەسىنىڭ نەگىزگى تىرەكتەرىنە اينالىپ وتىر. مۇعالىمدەردىڭ بۇل باعىتتاعى شەبەرلىگى مەن ىزدەنىسى سەمينار بارىسىندا ايقىن كورىنىس تاپتى.
سەمينار – شابىت پەن سەرپىلىس الاڭى!
بۇگىنگى ءمۇعالىم – ءوز ءپانىنىڭ مامانى عانا ەمەس، ول پسيحولوگ، باعىت-باعدار بەرۋشى، تەحنولوگيانى مەڭگەرگەن جان-جاقتى تۇلعا. مۇنداي تالاپتار زامان تۋعىزىپ وتىر. ال وسى تالاپتاردى يگەرۋدە پەداگوگكە قولداۋ كورسەتۋ – ەڭ باستى مىندەت. سەمينار بارىسىندا ۇستازدار وسىنداي قولداۋدى سەزىنىپ قانا قويماي، بىر-بىرىنەن ۇيرەنىپ، ورتاق ماقساتقا جەتۋدىڭ جاڭا جولدارىن اشتى.
دۋالدى وقىتۋ ەلەمەنتتەرى، اتا-انا – وقۋشى – ءمۇعالىم ۇشتىگىنىڭ ىنتىماقتاستىق مودەلى، فۋنكسيونالدىق ساۋاتتىلىقتى ارتتىرۋ تاسىلدەرى – بارلىعى وسى سەميناردىڭ كۇن تارتىبىندە قامتىلدى. ءاربىر قاتىسۋشى جاڭا ويمەن، تىڭ يدەيامەن، كاسىبي شابىتپەن ورالدى.
ۇستازدار دا ۇيرەنۋگە ءتيىس، ۇيرەنۋدەن شارشاماۋى ءتيىس!
قاتىسۋشىلاردىڭ كەرى بايلانىس سەسسياسىنداعى پىكىرلەرى – سەميناردىڭ ءساتتى وتكەنىنىڭ باستى دالەلى. مۇعالىمدەردىڭ ايتۋىنشا، مۇنداي مازمۇندى ءارى پراكتيكالىق باعىتتاعى ءىس-شارالار ولاردىڭ كاسىبي دامۋىنا تىڭ سەرپىن بەرەدى. ۇيىمداستىرۋشىلار مەن قاتىسۋشىلاردىڭ كاسىبي دەڭگەيى، شىعارماشىلىق كوزقاراسى مەن جاڭاشىلدىعى – كوپكە ۇلگى.
ءقازىر پەداگوگتەرگە قويىلاتىن تالاپ كۇن ساناپ ارتىپ كەلەدى. ءبىراق سونىمەن بىرگە ولارعا جاسالاتىن قولداۋ مەن ورتاق تاجىريبە الماسۋ الاڭدارى دا ارتۋى ءتيىس. بۇل سەمينار – ءدال سونداي مۇمكىندىكتىڭ ءبىرى.
ءبىلىم سالاسىنداعى وزات تاجىريبە – قۇرعاق ۇعىم ەمەس. ول – ناقتى ءىس. ول – كۇندەلىكتى ىزدەنىس پەن توقتاۋسىز دامۋ. ال مۇنداي سەمينارلار وسى ۇدەرىسكە تىڭ سەرپىن بەرىپ، ءمۇعالىمدى جاڭاشا ويلاۋعا، شابىتپەن جۇمىس ىستەۋگە جەتەلەيدى.
سەمينار – ۇستازدار قاۋىمىنىڭ مەرەكەسى ىسپەتتى. بۇل – وي ءبولىسۋ، يدەيا الماسۋ، شابىتتانۋ، جىگەرلەنۋ، قايتا تۇلەپ، جاڭارۋ الاڭى. ۇستاز – ۇلت بولاشاعىن قالىپتاستىرۋشى بولسا، وسىنداي باسقوسۋلار سول بولاشاقتىڭ بەرىك ىرگەتاسىن قالايتىن يگى ءىس.
ادەنوۆا گۇلباعدا،
الماتى قالاسى، ناۋرىزباي اۋدانى №208 مەكتەپ-گيمنازياسىنىڭ ديرەكتورى