كۇرەڭ كۇزدەگى كۇننىڭ سۋىتۋى كوشەدەگى قىدىرىستى ازايتادى. ەلىمىزدىڭ وڭتۇستىگىندە كۇن جىلى بولعانمەن، باسقا ايماقتا كۇزدىڭ ىزعارى كادىمگىدەي سەزىلىپ تۇر. ءبىر جەردە جاۋىن جاۋسا، كەي ءوڭىردىڭ تۇرعىندارى العاشقى قاردى دا كورىپ ۇلگەردى، ءبىراق جىلىتۋ ماۋسىمى كەستە بويىنشا ءالى باستالعان جوق. كۇزدى شىعارماشىلىق ادامىنىڭ كوبى شابىتتانا قارسى السا، توڭعاق ادامدار جاقتىرمايتىنى بەلگىلى. كوشەدەگى اياز بەن بوراندا جۇرمەي-اق، جىلى ۇيدە وتىرىپ تا بويى جىلىمايتىن ادامدار بولادى. ولاردىڭ ەلدەن ەرەكشە توڭعاق بولۋىنا نە سەبەپ؟
توڭعاقتىقتىڭ سەبەبىن ادام اعزاسىنىڭ ەرەكشەلىگىنەن ىزدەۋدىڭ كەرەگى جوق. ول كەيدە دەنساۋلىققا قاتىستى ماسەلەدەن تۋىنداسا، كەيدە ءومىر سالتىنا دا بايلانىستى بولادى. ۇنەمى توڭىپ جۇرۋگە قانداي ادەتتەر سەبەپ بولۋى مۇمكىن؟ اqshamnews.kz ءتىلشىسى دارىگەرلەر كەڭەسىنە جۇگىنە وتىرىپ توڭعاقتىق سەبەپتەرىن تارقاتادى.
1. قاتاڭ ديەتا ۇستاۋ
ۇنەمى. نەمەسە ۋاقىتشا. ەگەر ەكىنشىسى بولسا - ديەتادان شىققان كەزدە، اعزا وزىنە قاجەت دەڭگەيدە قايتادان قىزا باستايدى. ديەتا كەزىندە ءسىزدىڭ اعزاڭىز مايدىڭ تومەن پايىزىن ۇستاپ تۇرۋ جانە سىزگە قۋات بەرۋ ءۇشىن زات الماسۋ پروسەسىن باياۋلاتادى. وسىنىڭ كەسىرىنەن توڭىپ جۇرەسىز.
2. مايدى از جەۋ
ءبىرىنشى جانە ەكىنشى ادەتتەر بىر-بىرىنە سايكەس كەلۋى مۇمكىن. تابيعات ءبىز ءۇشىن ءبارىن ويلاستىرىپ قويعان - سۋىق مەزگىلدە مايلى نارسە جەگىمىز كەلۋى بەكەر ەمەس. ماي دەنەنى قىزدىرىپ تۇرادى. ءبىراق، مايلى ەكەن دەپ ءتاتتى بالىشتەرگە جۇگىرۋدىڭ قاجەتى جوق، پايدالى مايلاردى - جاڭعاقتار، بالىق، اۆوكادو، ءزايتۇن مايىن تۇتىنعان ءجون.
3. قيمىل-قوزعالىستىڭ از بولۋى
قاراپايىم تىلمەن ايتقاندا، ءسىز كوپ وتىراسىز (نەمەسە جاتا بەرەسىز). دەنە قيمىلىنىڭ ازدىعى قان تامىرلارعا عانا تەرىس اسەر ەتىپ قويماي، زات الماسۋدى دا باياۋلاتادى. سوندىقتان تىم بولماسا جاتتىعۋ جاساۋدى باستاڭىز.
4. از ۇيىقتاۋ
ۇيقىنىڭ ساپالى بولۋى وتە ماڭىزدى. ەگەر ۇيقىڭىز جەتكىلىكسىز بولسا، گيپوتالامۋسقا (ميدىڭ ەندوكريندىك جۇيەنىڭ جۇمىسىن باقىلايتىن بولشەگى) كوپ كۇش تۇسەدى جانە ول ءسىزدىڭ دەنە قىزۋىڭىزدى رەتتەۋگە جاۋاپتى بولعاندىقتان، ءسىز ىلعي توڭىپ جۇرەسىز.
5. اقۋىزدى از تۇتىنۋ
اقۋىز ادام اعزاسىنداعى تەرموگەنەزدى (اعزادان جىلۋدىڭ ءبولىنۋى) جۇزەگە اسىرۋعا كومەكتەسەدى - ول تاعامدى قورىتۋ كەزىندە پايدا بولاتىندىقتان دەنەنىڭ قىزۋى جوعارىلايدى. نەعۇرلىم كوپ اقۋىز جەسەڭىز، تەرموگەنەز سوعۇرلىم ۇزاعىراق بولادى. سوندىقتان ءار تاعامعا اقۋىز قوسۋعا تىرىسىڭىز.
6. قۇرامىندا تەمىرى بار تاعامداردى از جەۋ
تەمىر قان جاسۋشالارىنىڭ وتتەگىن اعزاعا تاسىمالداۋعا كومەكتەسەتىنىن جانە قورەكتىك زاتتارمەن بىرگە اياق-قولعا جىلۋ بەرەتىنىن بىلەسىز بە؟ قول-اياعىڭىز ۇنەمى جىلىماي ما؟ مۇنىڭ سەبەبى تەمىردىڭ جەتىسپەۋشىلىگى بولۋى مۇمكىن. قاراقۇمىق، باۋىر، شپينات، بروككولي، قىزىلشا جەڭىز. ال تەمىر جەتىسپەۋشىلىگىنەن زارداپ شەكسەڭىز (ونى قان تالداۋى ارقىلى بىلۋگە بولادى)، قۇرامىندا تەمىرى بار دارى-دارمەكتەرمەن ەمدەلۋگە تۋرا كەلەدى.
7. سۋدى از ءىشۋ
ادام اعزاسىندا سۇيىقتىڭ جەتكىلىكتى مولشەردە بولۋى زات الماسۋ جىلدامدىعىنا اسەر ەتىپ، دەنەدەگى جىلۋدى ساقتاپ تۇرادى.
8. كوفەنى كوپ ءىشۋ
كۇندەلىكتى ىشەتىن كوفەڭىزدىڭ سانى شەكتەۋلى بولۋى كەرەك (ەڭ كوپ دەگەندە 2-3 شىنىاياق)، ويتكەنى كوفەيننىڭ كوپ مولشەرى قان تامىرلارىنىڭ تارىلۋىنا اكەلەدى، سونىڭ كەسىرىنەن بويىڭىز جىلىمايدى، ىشىمدىك ءىشۋدىڭ دە ناتيجەسى وسىنداي.
9. ۆ12 دارۋمەنى بار تاعامداردى جەمەۋ
بۇل دارۋمەن قالىپتى دەنە قىزۋىن ساقتاۋعا كومەكتەسەتىن ەريتروسيتتەردىڭ (قاننىڭ قىزىل تۇيىرشىكتەرى) تۇزىلۋىنە سەبەپشى بولادى. تيىسىنشە، وسى دارۋمەننىڭ جەتىسپەۋشىلىگىنەن ەريتروسيتتەر دە از بولادى. تاماعىڭىزعا ەت، تاۋىق، بالىق، جۇمىرتقا جانە ءسۇت ونىمدەرىن قوسىڭىز.
ەندى بۇل ادەتتەردەن باسقا توڭعاقتىققا تاعى نە اسەر ەتەتىنىن ايتايىق.
قان قىسىمىنىڭ تومەن بولۋى
گيپوتونيا (قان قىسىمىنىڭ تومەن بولۋى) تۇقىم قۋالاۋى نەمەسە تۋا بىتكەن بولۋى، كەيدە جۇرە پايدا بولۋى مۇمكىن. قان قىسىمىنىڭ تومەن بولۋىنا بايلانىستى قان اينالىمى باياۋلايدى جانە تەرمورەگۋلياسيا (اعزانىڭ جىلۋدى ساقتاۋ قابىلەتى) دا ناشارلايدى. جالپى جۇرەك-قان تامىرلارى اۋرۋلارى توڭعاقتىققا سەبەپ بولۋى مۇمكىن - كەز كەلگەن جاعدايدا دارىگەردىڭ كەڭەسى قاجەت.
قالقانشا بەزىنىڭ بۇزىلۋى
توڭعاقتىقتىڭ تاعى ءبىر سەبەبى وسى بولۋى مۇمكىن، ويتكەنى گيپوتيرەوز - گورموننىڭ جەتكىلىكتى بولىنبەۋى. مۇنداي جاعدايدا زات الماسۋ پروسەسى باياۋلايدى. اۋرۋ سيمپتومسىز دا باستالىپ كەتۋى مۇمكىن، سوندىقتان ەندوكرينولوگ دارىگەرگە كورىنىپ قويعان دۇرىس.
ۆەگەتوتامىرلىق ديستونيا
بۇل رەسمي تۇردە تىركەلگەن اۋرۋ ەمەس، شارشاۋ، السىزدىك، باس اينالۋ، باس اۋرۋى، ۇيقىسىزدىق جانە سۋىق تيۋ سياقتى سيمپتومداردىڭ جيىنتىعى.
بۇيرەك اۋرۋى
بۇيرەك جۇمىسى بۇزىلۋىنىڭ كەسىرىنەن دەنە ىسىنەدى، بۇل قان تامىرلارىن قىسادى. ادەتتە، الدىمەن اياق-قول مۇزدايتىن بولادى.