بۇگىن – ۇلتتىق ۆاليۋتا كۇنى.
ءتول تەڭگەمىزگە 30 جىل تولدى. 1993 جىلى 15 قاراشادا ۇلتتىق ۆاليۋتامىز – تەڭگە اينالىمعا ەنگىزىلگەن ەدى.
تاريحىنا توقتالساق. ۇلتتىق ۆاليۋتامىزدى دايىنداۋ جۇمىستارى 1992 جىلى باستالعان، سول جىلى 27 تامىز كۇنى ۇلتتىق بانك تەڭگە كۋپيۋراسىنىڭ ۇلگىلەرىن بەكىتتى. ال ەرتەڭىنە قازاق ۆاليۋتاسىن ومىرگە اكەلگەن سۋرەتشىلەر – تيمۋر سۇلەيمەنوۆ، مەڭدىباي الين، اعىمسالى دۇزەلحانوۆ، قايروللا ابجالەلوۆتەر انگلياعا اتتاندى. 1993 جىلى العاشقى تەڭگە بانكنوتتارى انگليانىڭ ەڭ كونە ءارى ايگىلى «حارريسون جانە ۇلدارى» فابريكاسىندا باسىلدى. تەڭگەنى ەلگە تاسىمالداۋ ءۇشىن ءتورت يل-76 ۇشاعى تۇماندى البيون ەلىنە 18 مارتە قاتىنادى.
كوركەمدىگى جاعىنان قازاق اقشاسى حالىقارالىق بايقاۋلاردا 5 مارتە ۇزدىك اتانىپ، 20-دان استام ماراپاتقا يە بولدى. 1993 جىلى قاراشادا ۇلتتىق ۆاليۋتانىڭ اينالىمعا ەنگىزىلۋى قازاقستانعا ءوز قارجى نارىعىن قۇرۋعا، دەربەس اقشا-نەسيە ساياساتىن جۇرگىزۋگە مۇمكىندىك بەردى.