قازاقستان مەن قىرعىزستان جامبىل وبلىسىنىڭ سۋارمالى جەرىنە سۋ بەرۋ تۋرالى كەلىسىمگە كەلدى. بىشكەكتە وتكەن كەزدەسۋدە سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ كەلىسىمگە كەلدى، دەپ حابارلايدى almaty-akshamy.kz
كەلىسسوز ناتيجەسىندە تالاس وزەنىندەگى «تۇيتە» كانالى ارقىلى سۋ بەرۋدى قالپىنا كەلتىرۋ بويىنشا جۇمىس جۇرگىزۋ تۋرالى شەشىم قابىلداندى.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتىڭ قىرعىز ەلى اۋىل شارۋاشىلىق ءمينيسترى اسقاربەك جانىبەكوۆپەن كەزدەسۋى كەزىندە شۋ جانە تالاس وزەندەرىندەگى (مەملەكەتارالىق پايدالانۋداعى) سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسياعا تاپسىرما بەرىلدى.
سونداي-اق، نۇرجان نۇرجىگىتوۆ ەلىمىزگە سۋ جىبەرۋدى جاقسارتۋ ءۇشىن مەملەكەتارالىق پايدالانۋداعى سۋ شارۋاشىلىعى نىسانى تىزبەسىن كەڭەيتۋ قاجەتتىگىن اتاپ ءوتتى.
ماسەلەن، ءبىزدىڭ تاراپ وسى تىزبەگە كۇركىرەسۋ وزەنىندەگى «اقمولدا»، «قاراتاقى» جانە «تومەنتامعا» ارنالارىن، شۋ وزەنىندەگى «كولوس» كانالىن، تالاس وزەنىندەگى «كوج» كانالىن ەنگىزۋدى ۇسىنادى.
شۋ جانە تالاس وزەندەرىندە سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسيانىڭ كەلەسى وتىرىسى 14 جەلتوقساندا الماتىدا وتەدى.
بۇعان دەيىن نۇرجان نۇرجىگىتوۆ وزبەكستاندىق ارىپتەستەرىمەن كەزدەسىپ، 1 ساۋىرگە دەيىن تۇركىستان جانە قىزىلوردا وبلىستارىنا 11،1 تەكشە شاقىرىم سۋ، ونىڭ ىشىندە ارال تەڭىزىنە 1،6 ملرد تەكشە مەتر سۋ جىبەرۋ تۋرالى كەلىسىمگە كەلگەن بولاتىن.