توي تويلايتىن زامان ەمەس!
قالادا 40 مونيتورينگتىك توپ جۇمىستارىن جالعاستىرۋدا. دەمالىس كۇندەرى ولاردىڭ جۇمىسى ءتىپتى كۇشەيتىلدى، دەپ حابارلايدى Almaty-akshamy.kz.
مەگاپوليستەگى سانيتارلىق-ەپيدەميولوگيالىق احۋال كۆي-دىڭ مۋتاسيالانعان «دەلتا» شتامىنا بايلانىستى ۋشىعا تۇسۋدە. الماتىدا وتكەن تاۋلىكتە كوروناۆيرۋس ينفەكسياسىنىڭ 1219 جاعدايى تىركەلگەن.
كارانتين شەكتەۋلەرى جۇمىس رەجيمى مەن كەلۋشىلەر اراسىنداعى الەۋمەتتىك قاشىقتىقتى ساقتامايتىن ويىن-ساۋىق ورىندارىندا ءجيى انىقتالادى. وتكەن دەمالىس كۇندەرى بوستاندىق اۋدانىنىڭ مونيتورينگتىك توبى دۋلاتي كوشەسىنىڭ بويىندا ورنالاسقان 18 مەيرامحانا مەن بانكەت زالىن تەكسەردى. ەكى مەكەمەدە كارانتيننىڭ بۇزىلۋى انىقتالدى. «Bi Kumis» سالتانات زالىندا 85 قوناقتىڭ قاتىسۋىمەن قۇدالىق وتكەن، ال «ۇلىتاۋ» مەيرامحاناسىندا 45 ادامعا ەسەپتەلگەن تۋعان كۇن وتكىزىلگەن. توي ۇيىمداستىرۋشىلارى ق ر اكىمشىلىك كودەكسىنىڭ 425-بابى 1-بولىگى بويىنشا اكىمشىلىك جاۋاپكەرشىلىككە تارتىلدى.
ءتارتىپ بۇزۋشىلار تىزىمىندە مەدەۋ اۋدانىنداعى «اتموسفەرا» مەيرامحاناسى دا بار، وندا 24 شىلدەگە قاراعان ءتۇنى 100-گە جۋىق ادام بولعان. ناۋرىزباي اۋدانىنداعى «گرانادا حولل» مەيرامحاناسىندا دا بۇزۋشىلىق تىركەلدى، وندا سالتاناتتى ءىس-شاراعا 100-دەن استام ادام جينالعان. سول اۋداندا «سامير» مەيرامحاناسىندا 100-گە جۋىق قوناق بولعان.
المالى اۋدانىنداعى «كينو» كافەسىندە دە كارانتين تالاپتارى بۇزىلدى، وندا 60 ادام بولعان. 25 شىلدەدە ءتۇن ورتاسىندا مەدەۋ اۋدانىنىڭ «Late night show» بارىندا 110-120 ادام جينالعان.
ءتارتىپ بۇزۋشىلاردىڭ تىزىمىنە ناۋرىزباي اۋدانىنىڭ «ب ا ق ساراي» مەيرامحاناسى دا ءىلىندى، وندا 100 قوناق بولعان. سونداي-اق، 90 كەلۋشى بولعان «سۇلتان ساراي» مەن «نۇر-اي» مەيرامحانالارىندا بۇزۋشىلىقتار انىقتالدى.
اۋەزوۆ اۋدانىنىڭ ءموبيلدى توپ وكىلدەرى 24 شىلدە كۇنى «جەتىسۋ-4» شاعىناۋدانىنداعى «ۆەسەليدزە» ءدامحاناسىنداعى بۇزۋشىلىقتاردى انىقتادى. جازعى تەرراسسادا كەلۋشىلەردىڭ سانى 50%-دان اسۋىنا بايلانىستى كارانتين شەكتەۋى بۇزىلدى. سونداي-اق، قىزمەتكەرلەر كەلۋشىلەرگە بەتپەردەسىز قىزمەت كورسەتكەن.
جالپى، جىل باسىنان بەرى كارانتيندىك شارالاردى بۇزعان 2767 نىسان انىقتالىپ، 4798 حاتتاما تولتىرىلدى. زاڭدى تۇلعالارعا 167 ملن. تەڭگەدەن استام سوماعا 479 حاتتاما جاسالدى. جەكە تۇلعالارعا قاتىستى بەتپەردە رەجيمىن بۇزعانى ءۇشىن 190 ملن. تەڭگەگە جۋىق سوماعا 4319 حاتتاما تولتىرىلدى.