قازاقستاندا قاتاڭ شەكتەۋلەر ەنگىزىلىپ جاتسا دا، توي تىيىلار ەمەس. ءتىپتى جۇلدىزداردىڭ قاتىسۋىمەن دە مەرەكەلىك شارالار ءجيى ۇيىمداستىرىلاتىن بولعان. ايىپپۇل سالىنسا دا وڭاي تولەپ، ەركىن جۇرەتىندەر كوپ. ەندى تۇرعىندار ونداي كەشتىڭ وتەتىنىن الدىن الا حابارلاسا، سىياقى بەرىلۋى مۇمكىن، - دەپ حابارلايدى Almaty-akshamy.kz 31-ارنانىڭ ينفورمبيۋرو اقپاراتتىق باعدارلاماسىنا سىلتەمە جاساپ.
«باياعى وتكەن زاماندا… » ءانشى قۋاندىق راحىم تويدا ونەر كورسەتكەن ءساتىن بىرنەشە ۋاقىت وتكەن سوڭ ءبولىسىپ وتىرمىن دەپ جاريالايدى. ال، سول تويداعى جاس جۇبايلار ناقتى داتاسىن كورسەتىپ بولىسكەن. الماتىنىڭ باس سانيتار دارىگەرىنىڭ ورىنباسارى ءسادۋاقاس بايعابىلوۆ مونيتورينگتىك توپتار زاڭ بۇزۋشىلىقتى كوبىنە وسىلاي انىقتايتىنىن ايتادى. ەندى جاۋاپتىلار دەنساۋلىق ساقتاۋ مينيسترلىگىنە ارنايى ۇسىنىس جولداماق ەكەن.
«پاندەميا كەزىندە مەرەكەلىك شارالاردى ۇيىمداستىراتىندار ازايماي تۇر. ءتىپتى، ونداي جەرلەردە انشىلەردىڭ دە جۇرەتىنىن كوردىك. ولارعا زاڭ بويىنشا ايىپپۇل سالىنىپ جاتىر. ءبىز ءقازىر توي مەن ادام كوپ جينالاتىن شارالار تۋرالى حابارلاعان ادامعا سىياقى بەرۋ ماسەلەسىن دە قاراستىرىپ جاتىرمىز»، – دەدى الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءسادۋاقاس بايعابىلوۆ.
كەز كەلگەن تۇرعىن جەرگىلىكتى اكىمدىك سايتىنان مونيتورينگتىك توپتىڭ ءنومىرىن تابا الادى.
«تۇرعىندار بىزگە حابارلاپ، قاي جەردە مەرەكەلىك ءىس-شارالار وتەدى سونى ايتىپ وتىرسا، جەدەل تۇردە مونيتورينگتىك توپ سوندا بارادى»، – دەدى الماتى قالاسى مونيتورينگتىك توپ مۇشەسى ەرتاي ءالىموۆ