ءسانقويلىقتىڭ دا ءجونى بار
بۇرىنعىلار «ادام كوركى شۇبەرەك...» دەيتىن. باسقاشا ايتقاندا، ادامزاتتى ماتادان اجىراتىپ الا المايسىز. ول ادامنىڭ كوركى، مىنەزىنىڭ بەلگىسى، ءجۇرىس-تۇرىسىنىڭ قانداي ەكەندىگىنەن حابار بەرەدى. وسىنداي قاراپايىم دۇنيەلەر سىرتقى سۇلبانىڭ اجىرى ىسپەتتى. ءداپ وسىلاي ايتساق، قاتەلەسپەيمىز.
ارىدەن شەجىرە تارتۋ. ادام بالاسى جاراتىلعان داۋىردەن باستاپ ءارتۇرلى پىشىندە كيىندى. ەستە جوق ەسكى زاماندا جاپىراقتى جابىنعان دەسەدى. ورتا عاسىردا كەڭ، جابىق، شالمە ورانعان كەزەڭ بولعان. ال حح مەن ءححى عاسىردىڭ ۇلگىسىنىڭ ءوزى الشاقتادى. ءتىپتى كەيبىر تۇستارى مۇلدە بولەك سياقتى كورىنەدى. ماسەلەن، وسىدان ەلۋ جىل بۇرىن كەڭ بالاقتى شالبار كيدى. بۇگىنگى تاڭدا ونىڭ داۋرەنى ءوتتى.
كيىم كيۋ ادەبى. ءقازىر كەز كەلگەن ورتادا ۇستىنە ىلىنگەندى كيىپ جۇرەتىندەر قاتارى ارتتى. بۇل ءسوزدى اۋىسپالى ءھام تۋرا ماعىناسىندا ۇعىنۋعا بولادى. سەبەبى ورىمدەي جاس ورەندەر شۇلىعىمەن تىزەدەن تومەن ارالىقتى اشىپ جۇرەدى. اسىرەسە، قىس كەزىندە، كۇز بەن كوكتەمنىڭ قارا سۋىعىندا اياقتىڭ تومەنگى تۇسىن جاپپاي اشىپ تاستاپ جۇرگەندەرى، قينالتادى. سونىڭ ىشىندە قىز بالالارعا زياندىراق. ءاربىر قانتامىردان وتكەن ىزعار بۇيرەككە جەتەدى. ونىڭ ارعى جاعىندا قانشاما ماسەلە جاتىر؟! سوندىقتان مەيلىنشە «اۋرىپ ەم ىزدەگەنشە، اۋىرمايتىن جول ىزدەگەن» ابزال. ارنارسەنىڭ وزىنە جاراسىمدى ادەبى بولادى. وسىنى ەستەن شىعارماعان ءجون.
ءتۇيىن. ءسان الەمىندەگى الەمگە ايگىلى سانگەر كوكو شانەل «مەن بۇكىل الەم ايەلدەرى ءۇشىن كيىم تىگىپ شىعاردىم، ال ولار جالاڭاش جۇرۋگە تىرىسادى» دەپتى. جالپى، بۇل ويدىڭ دا استارى تەك ءبىر جاعىنان ايتىلماعان. مۇنى جان-جاقتى تۇسىنۋگە نەگىز جەتەرلىك. قورىتا ايتقاندا، مودا – ءبىر كۇندىك، ال دەنساۋلىق – ماڭگىلىك دەمەكپىز.