ءبىر اپتادا170 مىڭعا جۋىق قازاقستاندىق زەينەتاقى جيناعىن باسپاناعا جۇمساۋ ءۇشىن بانككە ءوتىنىش بەرگەن.
بۇل جايىندا «وتباسى بانك» اق باسقارما ءتوراعاسى ءلاززات يبراگيموۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«حالىق ۇنىنە قۇلاق اساتىن مەملەكەت - راسىندا بۇل شىندىق. پرەزيدەنت قاسىم-جومارت توقايەۆ ۇكىمەتكە زەينەتاقى جيناقتارىنىڭ جەتكىلىكتىلىك شەگىن 2022 جىلدىڭ 1 ساۋىرىنە دەيىن ۇلعايتپاۋدى تاپسىردى. ءبىرىنشى كەزەكتە بۇل 200 مىڭعا جۋىق سالىمشىعا وزدەرىنىڭ ءبىرجولعى زەينەتاقى تولەمىن پايدالانۋ بويىنشا ءوز قۇقىقتارىن ىسكە اسىرۋعا مۇمكىندىك بەردى. سىزدەرگە 2 جەلتوقساننان كەيىنگى www.enpf-otbasy.kz پلاتفورماسىندا قابىلدانعان وتىنىشتەردىڭ ستاتيستيكاسىن كورسەتەيىن. ول داتاعا دەيىن ءبىز شتاتتىق رەجيمدە جۇمىس جاسادىق جانە كۇن سايىن 2 مىڭنان 2،5 مىڭعا دەيىن ءوتىنىش قابىلدادىق»، - دەپ جازدى بانك باسشىسى Facebook پاراقشاسىندا.
وتىنىشتەردى قابىلداۋ ستاتيستيكاسى: 3 جەلتوقسان - 21 500، 4 جەلتوقسان - 15 095، 5 جەلتوقسان - 7 789، 6 جەلتوقسان - 38 478، 7 جەلتوقسان - 34 417، 8 جەلتوقسان - 31 441، 9 جەلتوقسان ساعات 18:30 - 20 699 ءوتىنىش جانە كەشكە دەيىن تاعى قابىلدانادى. وسىلايشا، ەڭبەككە قابىلەتتى 170 مىڭعا جۋىق قازاقستاندىق ءدال وسىلايشا ءبىر اپتانىڭ ىشىندە ءوتىنىش بەرگەن.
«ەگەر ەلدەگى وتباسىلىق ورتاشا كوەففيسيەنت 3،8 بولسا، وندا 640 مىڭ وتباسى مۇشەسى وزدەرىن كەتىپ بارا جاتقان پويىزدىڭ سوڭعى ۆاگونىنا سەكىرىپ مىنۋگە تىرىسقانداي سەزىندى. ال ەندى سىزدەر تىنىش ءارى قولايلى رەجيمدە، اقىلعا سالىنعان شەشىمدەر قابىلداي الاتىن مۇمكىندىككە يە بولدىڭىزدار. ءوتىنىش بەرۋشىنىڭ قاراجاتتى ماقساتتى پايدالانۋىن راستاۋعا ارنالعان 45 جۇمىس كۇنى بار. ەگەر اقشا بۇگىن تۇسسە، جەلتوقسانداعى مەرەكەلەردى ەسكەرە وتىرىپ، 20 اقپانعا دەيىنگى ۋاقىت بار دەگەن ءسوز. بۇل جاڭالىق بۇگىندە كوپتەگەن وتباسىلارعا قۋانىش سىيلادى. ال جاعىمدى جاڭالىقتار قاتارىنداعى ەكىنشى جاڭالىق - ءبىرجولعى زەينەتاقى تولەمدەرىن پايدالانۋ قاعيدالارىنا وزگەرىستەر قابىلداۋ پروسەسى جىلدامداتىلادى. يندۋستريا جانە ينفراقۇرىلىمدىق دامۋ مينيسترلىگى بۇيرىقتى مەرزىمىنەن بۇرىن جاريالاۋدى جوسپارلاپ وتىر. ءبىزدىڭ كليەنتتەر ءۇشىن ەرەجەگە ەنگىزىلگەن بۇل وزگەرىستەر جاڭا مۇمكىندىكتەر اشادى. ءبىز ءوز كليەنتىمىزدى جاقسى كورەمىز جانە ولاردى قاشان دا قولداۋعا دايىنبىز. ءبىز بزت قاراجاتى ەسەبىنەن دەپوزيتتى تولتىرۋ باتىرماسىن 2021 جىلدىڭ 16 جەلتوقسانىندا ىسكە قوسۋعا جانە ءتورت دەمالىس كۇنى بويى ارنايى اعىمداعى شوتتار مەن دەپوزيتتەردى اشۋعا دايىنبىز، ءبىراق وسى كۇنگە ولاردى ءبارى اشىپ ۇلگەرگەن سياقتى. ءبىز جەرلەستەرىمىز مەرەكەلىك داستارحان باسىندا نوۋتبۋكتى اشىپ نەمەسە ءۇي كومپيۋتەرىنەن جۇكتەپ الىپ، وزدەرىنىڭ ءبىرجولعى زەينەتاقى تولەمدەرىن وتباسى بانكتەگى دەپوزيتتەرىنە اۋدارا الاتىنداي تەحنيكالىق قولداۋدى قامتاماسىز ەتۋگە دايىنبىز. تەك ءبىر ءوتىنىش، بارلىعىن www.enpf-otbasy.kz پلاتفورماسىندا ونلاين رەجيمدە جاساساڭىزدار»، - دەيدى ءلاززات يبراگيموۆا.
ايتا كەتەيىك، اقپاراتتىق قاۋىپسىزدىك ماقساتىندا پلاتفورما تەك قازاقستاندىق IP مەكەنجايلارىنان عانا قولجەتىمدى جانە پلانشەتتىك نەمەسە ستاسيونارلىق كومپيۋتەرلەرمەن جۇمىس ىستەۋگە ەسەپتەلگەن.
«ەگەر ءسىز بىرەۋدىڭ پلاتفورماعا كىرە الماعاندىعى تۋرالى اشۋلى پوستىن كورسەڭىز، بۇل اۆتوردىڭ VPN ارنالارى ارقىلى تۇسىنىكسىز سايتتارعا كىرىپ، سونىڭ كەسىرىنەن ەندى پلاتفورماعا كىرە الماي وتىرعاندىعىنىڭ بەلگىسى ەكەنىن تۇسىنىڭىزدەر. وتىنىمدەردى تەز قاراۋ ءۇشىن فيليالداردىڭ قىزمەتكەرلەرىن قاشىقتان قوسۋدى باستايمىز. فوتوسۋرەتتە زەينەتاقى قاراجاتتارىنىڭ ماسەلەسىنە مۇلدە ءمان بەرمەيتىن ءبىر سولتۇستىك وڭىردەگى فيليال بەينەلەنگەن. تاعى دا ءبىر ءوتىنىش، بانك بولىمشەلەرىنە بارماۋلارىڭىزدى سۇرايمىز، سەبەبى بەينەقوڭىراۋ، ءموبيلدى قوسىمشا، ونلاين-سەرۆيس دەگەن دۇنيەلەر بار. ارينە، وسى جەردە دە بارلىق سۇراقتارىڭىزدى قويىپ، جاۋاپتارىن الا الاسىزدار»، - دەپ تۇيىندەدى ءسوزىن «وتباسى بانك» اق باسقارما ءتوراعاسى.