جاس تا بولسا، بۇل جىگىت - «مەنسا» حالىقارالىق قاۋىمداستىعىنىڭ مۇشەسى.
ال وعان الەم بويىنشا ەڭ جوعارى ينتەللەكت كوەففيسەنتى بار ادامدار عانا مۇشەلىك ەتەدى.
23 جاستاعى الديار سەمەدياروۆتىڭ IQ كوەففيسەنتى الەمدەگى 99 پايىز ادامنان جوعارى بولىپ شىقتى. ۆەكسلەر شكالاسىمەن تەست ناتيجەسى 135-كە جەتتى، دەپ حابارلايدى Almaty-akshamy.kz Almaty.tv-عا سىلتەمە جاساپ.
2016 جىلى «مەنسا» تۋرالى الديار العاش رەت ەستيدى. سول كەزدە الەمنىڭ ەڭ اقىلدى ادامدار تىزىمىنە العاش رەت قازاق بالاسى ديماش ادىلەت قوسىلعان.
«مەكتەپتە ۇزدىك وقىدىم. سوندا IQ-عا رەسمي تەست تاپسىرعىم كەلدى. ءبىراق، وكىنىشكە قاراي، قازاقستاندا ونداي تەست بولماي قالدى. سودان بەرى بەس جىل ءوتتى»،– دەيدى سەمەدياروۆ.
ەكى اي بۇرىن الديار ونلاين رەجيمدە IQ-تەستىن رەسمي تۇردە تاپسىردى. 45 تاپسىرماعا 20 مينۋت بىرىلەدى. ال ءبىر اپتادان كەيىن «مەنسادان» جاۋاپ كەلگەن. ۇيىم وكىلدەرى ونى ءوز قاتارىنا قوسقانىن ايتقان. الدياردىڭ ينتەللەكت كوەففيسەنتىنىڭ كورسەتكىشى جەر-جاھانداعى ادامنىڭ 99 پايىزىنىڭ اقىل-ويىنان جوعارى بولىپ تۇر.
«مەن ۇيىمنىڭ جاۋابىن كورىپ تاڭعالدىم. العاشقى كۇندەرى سەنبەي ءجۇردىم. ارتىنان «مەنسا» جۋرنالىنىڭ كەزەكتى سانىنا اتىمدى جازىپ، ۇيىم كارتاسىن جىبەرگەننەن كەيىن قانداي قۇرمەتكە يە بولعانىمدى ءتۇسىندىم. ۇيىمنىڭ جەلىسىندە پاراقشا دا اشىپ بەردى»، – دەپ اتاپ كورسەتتى سەمەدياروۆ.
ايتا كەتەرى، «مەنسا» – ينتەللەكت كوەففيسەنتى جوعارى ادامدار كىرەتىن ەڭ تانىمال جانە ءىرى ۇيىمداردىڭ ءبىرى. تەست باقىلاۋشىلاردىڭ كوزىنشە تاپسىرىلادى. ول ءۇشىن الەمنىڭ 50 ەلىندە ۇلتتىق توپتار قۇرىلعان. قازىرگى كەزدە قاۋىمداستىققا مۇشە ادامداردىڭ سانى 120 مىڭنان اسىپ وتىر. ولاردىڭ بارلىعى – 100 ەلدىڭ وكىلدەرى. كلۋب 1946 جىلى قۇرىلعان. ۇيىمنىڭ نەگىزگى ماقساتى – ادامزات پايداسى ءۇشىن ينتەللەكت دامىتۋ، تابيعاتتى زەرتتەۋ جۇمىستارىن قولداۋ، قاۋىمداستىققا مۇشە بولعان ادامدارعا زياتكەرلىك دامۋ جاعىنان جاعداي جاساۋ.
الديار سەمەدياروۆتىڭ ءوزى - اقتاۋ قالاسىنىڭ تۋماسى. 2016 جىلى №4 مەكتەپ-گيمنازياسىن «التىن بەلگىمەن» بىتىرگەن. ال ۇبت-دا 124 ۇپاي جيناعان.
الديار – فيزيكادان رەسپۋبليكالىق وليمپيادالاردىڭ جۇلدەگەرى. نازاربايەۆ ۋنيۆەرسيتەتىندە وقىپ جۇرگەندە، Work&travel باعدارلاماسىمەن اقش-عا بارىپ قايتتى. University at Buffalo-دا جازعى سەمەستردە بولدى. سونداي-اق گەرمانياداعى Leibniz University of Hannover-دە زەرتتەۋ تاعىلىمداماسىنان ءوتتى.
2020 جىلى شۆەيسارياداعى ETH Zurich فەدەرالدىق تەحنولوگيالىق ينستيتۋتىنا "ەلەكتر ينجەنەرياسى" ماماندىعى بويىنشا ماگيستراتۋراعا ءتۇستى.