ەلىمىزدە العاش رەت ۇيىمداستىرىلدى
الماتىدا تمد-عا قاتىسۋشى مەملەكەتتەر قارۋلى كۇشتەرى دوستاستىق ەلدەرى قورعانىس مينيسترلەرى كەڭەسىنىڭ 30 جىلدىعىنا ارنالعان III اسكەري-سپورتتىق ويىندارى اياقتالدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
قازاقستان رەسپۋبليكاسى قورعانىس مينيسترلىگىنىڭ ورتالىق سپورت كلۋبى الاڭدارىندا شەكارالاس شەت ەلدەردىڭ جەتى ەلىنەن 250-دەن استام سپورتشى اسكەري-سپورتتىق كوپسايىستىڭ بەس تۇرىنەن سىنعا ءتۇستى. اسكەريلەر ارميالىق قويان-قولتىق ۇرىس، شتاتتىق قارۋدان وق اتۋ، اسكەريلەندىرىلگەن كروسس، وفيسەرلىك ءۇشسايىس جانە گىر كوتەرۋدەن ءوزارا مىقتىنى انىقتادى.
«تمد اسكەري سپورتشىلارىنىڭ ويىندارى ەلىمىزدە العاش رەت وتكىزىلدى. جوسپار بويىنشا سپورتتىق ءىس-شارا 2020 جىلى ءوتۋى كەرەك بولاتىن. الايدا، پاندەمياعا بايلانىستى سپورتتىق جارىستاردى كەيىنگە شەگەرۋگە تۋرا كەلدى. جارىس جوعارى دەڭگەيدە وتكىزىلىپ، سپورتتىق رۋح پەن اسكەري دوستىقتىڭ جارقىن كورىنىسىن كورسەتتى. تورەشىلەر قۇرامى بارىنشا ءادىل جانە كاسىبي تۇردە جۇمىس ىستەي الدى»، – دەدى ءوز سوزىندە جارىستى قورىتىندىلاعان ق ر قورعانىس مينيسترلىگى ورتالىق سپورت كلۋبىنىڭ باستىعى – سپورت كوميتەتىنىڭ ءتورايىمى، وليمپيادا ويىندارىنىڭ چەمپيونى ءارى ەڭبەك سىڭىرگەن سپورت شەبەرى ولگا شيشيگينا.
جالپىكوماندالىق بىرىنشىلىكتە رەسەي قارۋلى كۇشتەرىنىڭ قۇراماسى جەڭىسكە جەتسە، وزبەكستان اسكەري سپورتشىلارى ەكىنشى، قازاقستان قۇراماسى ءۇشىنشى ورىنعا تۇراقتادى.
ەستەرىڭىزگە سالا كەتەيىك، تمد اسكەرلەرىنىڭ ءبىرىنشى جانە ەكىنشى اسكەري-سپورتتىق ويىندارى رەسەي مەن قىرعىزستاندا سايكەسىنشە 2015 جانە 2017 جىلدارى وتكىزىلگەن. ءتورتىنشى ويىندار وزبەكستاندا ۇيىمداستىرىلاتىن بولادى.