ايماقتا اعاشتىڭ سانى 47 پايىزعا ارتادى
الماتىدا وقۋشىلار سارايىنىڭ الاڭىندا جىل سوڭىنا دەيىن رەكونسترۋكسيا جاسالادى. ءبىراق جوندەۋدىڭ جوباسى وزگەرگەن. ياعني جاڭا جوسپارعا سايكەس، اتالعان اۋماقتىڭ تاريحي قالپى ساقتالىپ، تيىسىنشە جاڭارتۋ جۇمىستارى جۇرگىزىلمەك، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالاداعى تاريحي-مادەني مۇرا سانالاتىن نىسانعا كۇردەلى جوندەۋ جۇرگىزىلمەگەلى بيىل 15 جىلدان اسىپ وتىر.
بليس:
1. وينايتىن جەر كەرەك دەپ ويلايمىن. سول 10-12 جاسارعا دەيىنگى. ويتكەنى، ارعى جاعىندا سپورت الاڭى بار. ءبىراق ول كىشكەنتاي بالالارعا از.
2. جولدىڭ جوندەلۋى، جاسىل قالامىزدىڭ وركەندەۋى وزىمىزگە پايدالى دەپ ويلايمىن.
3. الماتى قالاسىندا ادەمى جەردىك سۇرىقسىز بوپ كقرىنۋى ۇنامايدى، ارينە. ماعان دا. سىرت كوزگە دە جاعىمسىز كورىنىس بولىپ تۇر.
ساياباقتى جاڭارتۋ بويىنشا العاشقى جوبا 2018 جىلى ازىرلەنگەن. وعان سايكەس، جاسىل جەلەكتەر وتالىپ، الاڭنىڭ باستاپقى بەينەسى وزگەرتىلۋى كەرەك ەدى. ەندىگىدە، تۇرعىندار تاراپىنان تۇسكەن ارىز-شاعىم نەگىزگە الىنىپ، قايتا قۇرۋدىڭ جاڭا جوسپارى بەكىتىلىپ وتىر.
«جاياۋ جۇرگىنشىلەر جولى سول قالپى، ەشتەڭەسى وزگەرمەيدى. تەك قاتتى جابىندى برۋسچاتكا سالامىز. برۋسچاتكالاردى اۋىستىرامىز جانە دە جارىقشامدارى اۋىسادى. از عانا وزگەرىس بولادى. سوڭعى جوبا بويىنشا نەگىزگى تاريحي كەلبەتى وزگەرمەيدى. سوندىقتان دا تۇرعىندارمەن كەزدەسىپ، ءتۇسىندىرىپ بەرىپ وتىرمىز»، – دەدى ەكولوگيا جانە قورشاعان ورتا باسقارماسى باسشىسىنىڭ مىندەتىن اتقارۋشى سەرىك ادىلبايەۆ.
ناقتىلاي كەتسەك. جوبادا قاراستىرىلعان نەگىزگى جۇمىستارعا مۇنداعى سۋارۋ مەن جارىق جۇيەسىن قالپىنا كەلتىرۋ، ويىن الاڭدارىن جاساۋ، سونداي-اق جۇرگىنشىلەر ينفراقۇرىلىمىن جاڭارتۋ جاتادى. كوپتى الاڭداتقان گرانيت جابىندارى قايتا ورناتىلاتىنىن ايتا كەتكەن ءجون. جاسىل جەلەكتىڭ جايى دا بەلگىلى بولدى.
ءقازىر ساراي اۋماعىندا 889 اعاش بار. جاڭا جوبادا مۇنداعى جاسىل جەلەكتىڭ سانىن ارتتىرۋ كوزدەلىپ وتىر. ياعني، جىل سوڭىنا دەيىن تاعى دا 420 قىلقانجاپىراقتى، جاپىراقتى تال ەگىلەدى دەگەن ءسوز. ايماقتا اعاشتىڭ سانى 47 پايىزعا ارتادى.
اۋماعى 5 گەكتار بولاتىن الاڭدا رەكونسترۋكسيا 2 اپتا بۇرىن باستالعان. ماماندار بيىلعى قاراشانىڭ سوڭىنا دەيىن ءتيىستى جۇمىستار اياقتالادى دەيدى.