2024 جىلعى 28 قاراشادا ق ر پرەزيدەنتى جانىنداعى ورتالىق كوممۋنيكاسيالار قىزمەتىندە «گازبەن جابدىقتاۋ جۇيەلەرى وبەكتىلەرىنىڭ قاۋىپسىزدىگىن قامتاماسىز ەتۋ تۋرالى» تاقىرىبىندا باسپا ءسوز كونفەرەنسياسى ءوتتى.
سپيكەر بولىپ ق ر تجم ونەركاسىپتىك قاۋىپسىزدىك كوميتەتى ءتوراعاسىنىڭ مىندەتىن اتقارۋشى دۋبايەۆ راشيد كۇلتاي ۇلى ءسوز سويلەدى، دەپ حابارلايدى aqshamnews.kz.
راشيد كۇلتاي ۇلى گاز جابدىقتاۋ جۇيەلەرىن پايدالانۋ كەزىندە قاۋىپسىزدىكتى قامتاماسىز ەتۋ ونەركاسىپتىك قاۋىپسىزدىك سالاسىنداعى مەملەكەتتىك ساياساتتىڭ ەڭ ماڭىزدى باسىمدىقتارىنىڭ ءبىرى بولىپ تابىلاتىنىن اتاپ ءوتتى. باستى مىندەت – گازدىڭ ۇزدىكسىز جانە ءقاۋىپسىز جەتكىزىلۋىن قامتاماسىز ەتۋ، اعىپ كەتۋ، اپاتتار جانە ادامداردىڭ ومىرىنە ءقاۋىپ توندىرەتىن جاعدايلاردى بارىنشا ازايتۋ. بۇل ينفراقۇرىلىمدى جاڭارتۋ، جۇيەلى تەكسەرىستەر جۇرگىزۋ، قاتاڭ ستاندارتتاردى ساقتاۋ، سونداي-اق ماماندار مەن ازاماتتاردى وقىتۋ جانە حاباردار ەتۋ سياقتى كەشەندى ءتاسىلدى تالاپ ەتەدى.
بۇگىنگى تاڭدا ەلىمىزدىڭ گازيفيكاسيا دەڭگەيى 59%-دى قۇرايدى، ياعني 11،6 ميلليون ادام گازبەن قامتاماسىز ەتىلگەن. اسىرەسە باتىس جانە وڭتۇستىك ايماقتاردا گازيفيكاسيا دەڭگەيى جاقسى دامىعان، الايدا سولتۇستىك قازاقستان، پاۆلودار جانە اباي وبلىستارىندا گازيفيكاسيا دەڭگەيى تومەن بولىپ وتىر.
«گازبەن جابدىقتاۋ سالاسىنداعى اپاتقا بايلانىستى سوڭعى ستاتيستيكا الاڭداۋشىلىق تۋعىزۋدا. وقيعالاردىڭ نەگىزگى ۇلەسى جىلىتۋ كەزەڭىنە تيەسىلى: جاعدايلاردىڭ 70% — گاز باللوندارىنا بايلانىستى پروبلەمالار، 25% — ۋلى گازبەن ۋلانۋ جانە 5% - باسقا وقيعالار. جىلىتۋ كەزەڭىندە كوپتەگەن تۇرعىندار تۇرمىستىق باللونداردى كوشەدە ساقتايدى، كەيىن ولاردى سۇيىتىلعان كومىرسۋتەك گازىنىڭ تولىق بۋلانۋىن كۇتپەستەن ۇيلەرىنە كىرگىزىپ، گاز جابدىقتارىنا قوسادى، بۇل اپات ءقاۋپىن ەداۋىر ارتتىرادى»، - دەپ ق ر تجم ونەركاسىپتىك قاۋىپسىزدىك كوميتەتى ءتوراعاسىنىڭ مىندەتىن اتقارۋشى راشيد دۋبايەۆ اتاپ ءوتتى.
2024 جىلى تجم ونەركاسىپتىك قاۋىپسىزدىك كوميتەتىنىڭ ينسپەكتورلارى گازبەن جابدىقتاۋ وبەكتىلەرىنە 40 تەكسەرۋ جۇرگىزدى، 479 بۇزۋشىلىق انىقتالدى، 12 اكىمشىلىك قۇقىق بۇزۋشىلىق تۋرالى ءىس قوزعالدى، 12 نىساننىڭ جۇمىسى توقتاتىلدى. 2022-2023 جىلدارى 190-نان استام تەكسەرۋ جۇرگىزىلدى، 1000-نان استام بۇزۋشىلىق انىقتالىپ، 31 ءىس قوزعالدى.
گاز جۇيەلەرىن ءتيىمدى جانە ءقاۋىپسىز پايدالانۋ ءۇشىن مەملەكەت تاراپىنان باقىلاۋ عانا ەمەس، پروفيلاكتيكالىق ءىس-شارالار مەن تۇراقتى تەكسەرۋلەر جۇرگىزۋ دە ماڭىزدى. بيىل تۇرعىن اۋدانداردا 500-دەن استام ارالاۋ ۇيىمداستىرىلدى، اسىرەسە ەرەكشە نازار اۋدارۋدى قاجەت ەتەتىن الەۋمەتتىك ينفراقۇرىلىم مەن جەكە ۇيلەر تەكسەرىلدى. سونىمەن قاتار گازبەن جابدىقتاۋشى ۇيىمداردىڭ قاتىسۋىمەن 80-نەن استام كەڭەس وتكىزىلىپ، الەۋمەتتىك جەلىلەردە 800-دەن استام ماتەريالدار جاريالاندى.
ق ر تجم ونەركاسىپتىك قاۋىپسىزدىك كوميتەتى ءتوراعاسىنىڭ مىندەتىن اتقارۋشى راشيد دۋبايەۆ ءسوز سوڭىندا گاز جابدىقتارى مەن تۇرمىستىق گاز باللوندارىن پايدالانۋ كەزىندەگى نەگىزگى قاۋىپسىزدىك شارالارىن اتاپ ءوتتى.