سوڭعى جىلدارداعى ءىرى توتەنشە جاعدايلار ازاماتتىق قوعامنىڭ، اتاپ ايتقاندا، ەرىكتىلەر مەن ۆولونتورلەردىڭ توتەنشە جاعدايلاردىڭ الدىن الۋ جانە سالدارىن جويۋ جۇيەسىندەگى ءرولىنىڭ ماڭىزدىلىعىن ايقىن كورسەتتى، دەپ حابارلايدى aqshamnews.kz
بۇگىنگى تاڭدا توتەنشە جاعدايلار مينيسترلىگى 47 مىڭعا جۋىق ەرىكتىنى بىرىكتىرەتىن 136 ۆولونتورلىك ۇيىممەن ءوزارا ىنتىماقتاستىق ورناتقان.
ەرىكتىلەر كاسىبي قۇتقارۋشىلار مەن ءورت سوندىرۋشىلەر ءۇشىن ناقتى كومەككە اينالۋدا. بۇل اسىرەسە جاستار اراسىندا وزەكتى، سەبەبى ۆولونتورلىك ۇيىمدار بولاشاقتاعى تج سالاسىنىڭ كادرلىق رەزەرۆىن قالىپتاستىرادى. مينيسترلىك ۆولونتورلىك ۇيىمدارمەن بىرلەسىپ، جۇمىس باعىتىن ءۇش نەگىزگى سالا بويىنشا ۇيىمداستىرادى: تابيعي اپاتتاردان زارداپ شەككەندەرگە كومەك كورسەتۋ (گۋمانيتارلىق قولداۋ قوسا العاندا)، توتەنشە جاعدايلاردىڭ الدىن الۋ جانە سالدارىن جويۋعا قاتىسۋ، سونداي-اق حابار-وشارسىز كەتكەن ازاماتتاردى ىزدەۋ-قۇتقارۋ جۇمىستارىنا قاتىسۋ.
مينيسترلىك سالالىق ۆولونتورلىكتى بەلسەندى تۇردە دامىتىپ كەلەدى. بۇل باعىتتاعى جارقىن مىسال تج سالاسىنداعى ەرىكتىلەردىڭ العاشقى رەسپۋبليكالىق فورۋمى، ول وقۋ-جاتتىعۋ پوليگونى بازاسىندا وتكىزىلدى. سونىمەن قاتار، تجم ۆولونتورلىك تۋرالى تاجىريبەسىن حالىقارالىق ەرىكتىلەر فورۋمىندا «تج سالاسىنداعى ۆولونتورلىك» تاقىرىبىنداعى پانەلدىك سەسسيا اياسىندا ۇسىندى.
2024 جىلى قوستاناي وبلىسىندا ءموبيلدى ەرىكتى توپتاردى قۇرۋ بويىنشا پيلوتتىق جوبا ىسكە قوسىلدى. بۇل توپتار ءتجم-نىڭ كاسىبي اۆاريالىق-قۇتقارۋ بولىمشەلەرىنە ۇقساس تۇردە ارنايى دايىندىقتان ءوتتى، وعان فيزيكالىق دايارلىق تا كىردى. بيىلدان باستاپ مۇنداي توپتار ەلىمىزدىڭ ءاربىر وڭىرىندە قۇرىلا باستايدى. بۇل ەرىكتىلەر جۇمىسىنىڭ جۇيەلى بولۋىن قامتاماسىز ەتىپ، توتەنشە جاعدايلار كەزىندە بەيبەرەكەت ۆولونتورلىكتىڭ الدىن الۋعا مۇمكىندىك بەرەدى.
اتالعان جوبا 2024 جىلى استانا قالاسىندا وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك) جانىنداعى جاستار كەڭەسىنىڭ شەڭبەرىندە ۇيىمداستىرىلعان ۆولونتورلىك قوزعالىستار كوشباسشىلارىنىڭ سلەتىندە تانىستىرىلىپ، 2024–2026 جىلدارعا ارنالعان ۆولونتورلىكتى دامىتۋ جانە قولداۋ جونىندەگى جول كارتاسىنا ەنگىزىلدى.
ەرىكتىلەردىڭ ءىرى توتەنشە جاعدايلار كەزىندە، اتاپ ايتقاندا، 2024 جىلعى سۋ تاسقىنى كەزىندە جانە قوستاناي مەن اباي وبلىستارىنداعى ءىرى ورمان ورتتەرىن ءسوندىرۋ كەزىندە كومەك كورسەتۋى ەرەكشە اتاپ وتەرلىك جاعداي. ولاردىڭ قاتىسۋى زارداپ شەككەندەرگە جەدەل كومەك كورسەتىپ، سالداردىڭ جويىلۋىنا ەلەۋلى ۇلەس قوستى.
تجم ەرىكتىلەر قوزعالىسىنا اقپاراتتىق قولداۋ كورسەتۋدى دە جولعا قويعان. مينيسترلىكتىڭ رەسمي سايتىندا ۆولونتورلىككە ارنالعان ءبولىم جۇمىس ىستەيدى: وندا تىركەۋدەن وتۋگە، نورماتيۆتىك قۇجاتتارمەن تانىسۋعا جانە وزەكتى اقپارات الۋعا بولادى. بۇدان بولەك، جىل سايىن شامامەن 2 مىڭ ۆولونتورلىك ۇيىمداردىڭ جەتەكشىلەرى مەن ۇيلەستىرۋشىلەرى وقۋدان وتەدى.
ەرىكتىلەر ناقتى تاجىريبەلىك جۇمىستارعا دا بەلسەندى تارتىلادى. ولار ىزدەۋ-قۇتقارۋ جۇمىستارىنا، شومىلۋ ماۋسىمى، ءورت ءقاۋىپتى جانە جىلىتۋ كەزەڭدەرىندەگى الدىن الۋ شارالارىنا، سونداي-اق تجم ۇيىمداستىراتىن ءتۇرلى الەۋمەتتىك اكسيالار مەن ءىس-شارالارعا قاتىسادى.
قازاقستان رەسپۋبليكاسىنىڭ پرەزيدەنتى اتاپ وتكەندەي، مەملەكەتتىك ورگاندار ۆولونتورلەردىڭ الەۋەتىن ءتيىمدى پايدالانۋ باعىتىندا بەلسەندى جۇمىس جۇرگىزۋى قاجەت. وسىعان وراي، توتەنشە جاعدايلار مينيسترلىگى ۆولونتورلىك ۇيىمدارمەن ءوزارا ءىس-قيمىلدى نىعايتىپ، توتەنشە جاعدايلاردىڭ الدىن الۋ مەن سالدارىن ازايتۋعا باعىتتالعان ارىپتەستىكتى ودان ءارى دامىتاتىن بولادى.