ءتۇسىندىرۋ جۇمىستارىنا قاراجات بولىنگەنى ايتىلدى.
الماتىدا توتەنشە جاعداي كەزىندە «جينالۋ نۇكتەلەرى» قايدا ورنالاسقان؟ بۇل سۇراققا قالا اكىمى ەربولات دوسايەۆ مەدەۋ اۋدانىنىڭ تۇرعىندارىمەن كەزدەسۋى بارىسىندا جاۋاپ بەردى، دەپ حابارلايدى Almaty-akshamy.kz.
كەزدەسۋ بارىسىندا اۋدان تۇرعىنى توتەنشە جاعداي كەزىندە حالىق جينالاتىن ورىندار بويىنشا سۇراق قويدى.
«مەن «سامال-2» شاعىناۋدانىندا بەس قاباتتى ۇيدە تۇرامىن. ءبىز جاقتا وقۋ-جاتتىعۋ بولعان كەزدە، قايدا بارارىمىزدى بىلمەي قالدىق. سەبەبى، اينالامىز تولعان قۇرىلىس نىساندارى. ءقاۋىپتى جاعدايدا ەشقايدا قاشىپ قۇتىلا المايسىڭ. عيماراتتاردا ەشقانداي بەلگى جوق. شاعىناۋدان تۇرعىندارىمەن كەزدەسۋلەر بولعان جوق»،- دەدى قالا تۇرعىنى.
الماتى اكىمى ەربولات دوسايەۆ بۇل ماسەلە بويىنشا حالىققا ءتۇسىندىرۋ جۇمىستارىنا قاراجات بولىنگەنىن ايتتى.
«قالانىڭ ەسكى كارتاسىندا بۇگىنگى جاڭا عيماراتتار جوق. سوندىقتان قالاداعى جاڭا قۇرىلىستاردى ەسكەرە وتىرىپ، توتەنشە جاعدايلار دەپارتامەنتىمەن بىرلەسىپ، قالانىڭ باس جوسپارىنداعى بارلىق «جينالۋ نۇكتەلەرىن» قايتا قارادىق. جالپى، ءبىز ءتۇسىندىرۋ جۇمىستارىنا قاراجات بولدىك. الداعى ۋاقىتتا ءتيىستى كەستەلەر قالا اكىمدىگى، تجد سايتىندا جاريالانادى. سونداي-اق كەلەسى جىلدىڭ العاشقى جارتىسىندا توتەنشە جاعداي كەزىندە «جينالۋ نۇكتەلەرىن» كورسەتىپ تۇراتىن موبيلدىك قوسىمشا ىسكە قوسىلادى دەپ ويلايمىن. كورسەتكىش بەلگىلەر ءۇشىن دە قاراجات ءبولىپ، ورناتۋ كەرەك»،- دەدى ەربولات دوسايەۆ.
الماتى قالاسىنىڭ توتەنشە جاعدايلار دەپارتامەنتى باستىعىنىڭ مىندەتىن اتقارۋشى ەرلان الىبەكوۆ زارداپ شەككەن حالىقتى قابىلداۋ پۋنكتەرىنىڭ سانى 545-كە ارتقانىن جەتكىزدى.
«كەلەسى جىلى اۋقىمدى ءتۇسىندىرۋ جۇمىستارىن جۇرگىزۋدى، سونلاي-اق ءاربىر قالا تۇرعىنى توتەنشە جاعداي كەزىندە قاجەتتى باعىتتى كورە الاتىن موبيلدىك قوسىمشا ازىرلەۋدى جوسپارلاپ وتىرمىز»،- دەدى ەرلان الىبەكوۆ.