الماتىلىق ەر ادام وسىدان ەكى جىل بۇرىن ستاموتولوگيالىق كرەسلودا كوز جۇمعان قىزىنىڭ قازاسىنا بايلانىستى ءالى ادىلدىك ىزدەپ ءجۇر، دەپ حابارلايدى Almaty-akshamy.kz.
بۇل ءولىمنىڭ ورىن الۋىنا ول دارىگەردىڭ ساۋاتسىزدىعى سەبەپ بولعان دەيدى. ايتۋىنشا، ناركوزدا جاتقان ناۋقاسقا پرەپاراتتى تەكسەرمەي سالىپ جىبەرگەن.
Almaty.tv ارناسىنىڭ اقپاراتىنا جۇگىنسەك، قىزىنىڭ قازاسىنان قابىرعاسى قايىسقان ازامات ەكى جىلدان بەرى ادىلدىككە قول جەتكىزە الماي كەلەدى. سوزىنە قاراعاندا، قىزى ءوزىنىڭ ۇيلەنۋ تويىنىڭ الدىندا ءتىسىن جۇلدىرۋ ءۇشىن بارعان. الايدا ءتىس ەمحاناسىنان اكەسى ءوز اياعىمەن بارعان قىزىنىڭ تابىتىن الىپ قايتقان.
«كىم كىنالى دەيسىز بە؟ ولار ءبارىن الدىن الا ەسكەرۋى ءتيىس ەدى. ولار دارىگەرلەر ەمەس پە؟ كلينيكا جۇمىسىن ءالى دە جالعاستىرىپ جاتىر. قىزمەت كورسەتۋ ءتىزىمى كوبەيمەسە، ازايعان جوق. ال مارقۇم قىزىم وندا ءتىسىن جۇلدىرۋعا بارعان ەدى... ءبىراق تەرگەۋ تىم سوزىلىپ كەتتى»، - دەدى مارقۇمنىڭ اكەسى الەكساندر سەرگەيەۆ.
ويى سان-ساققا بولىنگەن اكە «اق حالاتتىلار قىزىمنىڭ ەسىن جيعىزباق بولىپ، كەۋدە تۇسىنا قاتتى قىسىم جاساعان»دەيدى. ويتكەنى ءتوس سۇيەگى مەن بىرنەشە قابىرعاسىنىڭ سىنعانى انىقتالعانىن ايتىپ وتىر. ءتىپتى، قىزىنىڭ تۇبىنە جەتكەن ەكپەنى دە بىلەدى ەكەن. ءبىراق كلينيكاداعى ماماندار مۇنى تەرىسكە شىعارسا كەرەك. مەديسينالىق مەكەمەنىڭ ماڭايىنا دا جۋىتپاي، ازاماتقا جاۋاپ قاتپاعان.
«دارىگەردىڭ ايتۋىنشا، جالپى ناركوز سالىپ ۇيىقتاتقان. سودان سوڭ اۋىز قۋىسىن جانسىزداندىرۋ ءۇشىن "ۋبەستەزين" دەگەن ءدارىنى سالعان. مەديسينالىق ساراپتاما كەزىندە وسى پرەپارات بولعان. سول ءدارى ولىمگە الىپ كەلۋى مۇمكىن. ولار ءقازىر وزدەرىن مۇلدە كىنالىمىز دەپ سانامايدى. ءبارى حاتتاما بويىنشا اقتالىپ وتىر. قايداعى حاتتاما؟ مەنىڭ حاتتامام تابىتتا جاتىر»، - دەپ كۇيىنەدى مارقۇمنىڭ اكەسى الەكساندر سەرگەيەۆ.
ەكى جىل بۇرىن باستالعان داۋلى ماسەلەگە قاتىسى بار دەگەن كلينيكاعا ارناداعى ارىپتەستەرىمىز دە بارىپ كورگەن. جەكەنىڭ مەنشىگىندەگى مەديسينا ورتالىعى جۋرناليستەردى "بىلمەيمىز"، "كورمەدىك" دەپ قانا شىعارىپ سالعان. ال كەيىپكەر كىنا تاعىپ وتىرعان ءتىس دارىگەرى قىزمەتتە ءوسىپ، كلينيكانىڭ باس كەڭسەسىندە جۇمىسىن جالعاستىرىپ جاتقان كورىنەدى. مۇندا دا باس دارىگەر سۇحبات بەرۋدەن باس تارتقان.
«ازىرشە كىم كىنالى ەكەنى بەلگىسىز. ءبىزدىڭ ماقساتىمىز - تولىق زەردەلەپ، تەكسەرۋ. مەديسينالىق قىلمىس ۇزاق تەرگەلەدى، ويتكەنى ءبىر ەمەس، بىرنەشە مامان جۇمىلدىرىلادى. ولار دا جان-جاقتى زەرتتەۋ جۇرگىزەدى. قىلمىستىق كودەكستىڭ 317-بابىنىڭ 3-تارماقتارى تىركەلىپ، قازىرگى تاڭدا قوسىمشا كەشەندى سوت مەديسينالىق ساراپتاما تاعايىندالدى»، – دەدى پد رەسمي وكىلى سالتانات ازىربەك.
فارم-باقىلاۋ كوميتەتىنىڭ مالىمەتىنشە، بىلتىردىڭ وزىندە 7 مىڭعا جۋىق شاعىم كەلىپ تۇسكەن. ونىڭ ىشىندە 350 ءىس ءتىس دارىگەرىنىڭ جۇمىسىنا قاتىستى. ال كەزەكتەن تىس تەكسەرىسكە تۇسكەن 43 ءتىس ەمدەۋ كلينيكاسىندا قىزمەت كورسەتۋ ستاندارتى بۇزىلعانى انىقتالعان. دەنساۋلىق ساقتاۋ مينيسترلىگىنىڭ مالىمەتىنشە، كەلگەن ناۋقاستاردىڭ دەنساۋلىعىنا قاتىستى انىقتاما قاعازى تولتىرىلماعان.