«ورتالىق ازيا – جۇڭگو» سامميتىندە پرەزيدەنت قاسىم-جومارت توقايەۆ ەكولوگيا ماسەلەسىن كوتەردى.
ول ترانسشەكارالىق سۋ رەسۋرستارىن ءتيىمدى پايدالانۋ كەرەكتىگىنە نازار اۋداردى، دەپ حابارلايدى Almaty-akshamy.kz.
«ورتالىق ازيا ەلدەرىنىڭ تۇششى سۋ تاپشىلىعىنا ۇشىراۋ ءقاۋپى جوعارى ەكەنى بەلگىلى. 2050 جىلعا قاراي 5 ميللياردتان استام ادام اۋىز سۋعا مۇقتاج بولۋى مۇمكىن. بۇل – بىرىككەن ۇلتتار ۇيىمىنىڭ دەرەگى. ساراپشىلار ءبىزدىڭ ايماعىمىزدىڭ تەز جىلىنىپ بارا جاتقانىن ايتىپ وتىر. كليماتتىڭ وزگەرۋىنە بايلانىستى ءبىزدىڭ ايماقتىڭ باستى سۋ كوزى سانالاتىن مۇزدىقتار دا كۇرت ازايىپ بارادى. وسى جاعداي ورتالىق ازيانىڭ ازىق-تۇلىك، ەنەرگەتيكا جانە ەكولوگيا قاۋىپسىزدىگىنە ەداۋىر قاتەر توندىرەدى. سوندىقتان بىرلەسىپ شۇعىل شارالار قابىلداۋىمىز قاجەت»، - دەدى مەملەكەت باسشىسى.