تىركەۋگە ءوتىنىش بەرگەن ءۇش پارتيانىڭ قۇجاتتارى كەرى قايتارىلدى. بۇل تۋرالى بۇگىن ادىلەت ءمينيسترى قانات مۋسين مالىمدەدى، دەپ حابارلايدى اlmaty-akshamy.kz.
ءمينيستردىڭ مالىمدەۋىنە، ازىرگە بۇل بىرلەستىكتەر بارلىق قاجەتتى قۇجاتىن تاپسىرماعان. ازىرگە پارتيالارعا ەسكى تالاپتار قويىلادى. ياعني ۇيىمداستىرۋشى توپتا مىڭ ادام، ال مۇشە سانى 20 مىڭنان كەم بولماۋى ءتيىس.
«ءۇش پارتيانى تىركەۋگە قۇجات تاپسىرىلىپ جاتىر. ولاردىڭ اراسىندا «ەل تىرەگى»، «بايتاق» بار. ءبىراق ولاردىڭ قۇجاتتارى بىرنەشە رەت قايتارىلعان. ۇيىمداستىرۋ توبىنىڭ ىشىندە ءار ادامنىڭ مالىمەتتەرى كورسەتىلۋى كەرەك. كەي جاعدايدا ادامداردىڭ ءجسن-ى سايكەس كەلمەيدى، ال ءبىر جاعدايلاردا ومىردەن وتكەن ادامدار ۇيىمداستىرۋ توبىنىڭ تىزىمىنە كىرگىزىلگەن. سونداي-اق باسقا پارتيالاردىڭ مۇشەلەرى دە كەزدەسىپ جاتادى. بۇل كىسىلەر زاڭ بويىنشا تىزىمنەن شىعارىلۋى كەرەك. وسى ورايدا ۇيىمداستىرۋ توبىنداعى مۇشەلەردىڭ سانى ءتيىستى مەجەگە جەتپەي قالىپ جاتادى»، - دەدى ق. مۋسين سەناتتا تىلشىلەر ساۋالىنا جاۋاپ بەرە وتىرىپ.
ونىڭ ايتۋىنشا، اتالعان زاڭنامالىق تالاپتار ورىندالماعان جاعدايدا ۇسىنىلعان قۇجاتتار قايتارىلادى.
«بۇل ءوز كەزەگىندە ۇيىمداستىرۋشىلاردىڭ جۇمىسى مەن مىندەتى بولىپ سانالادى. ياعني ولار تىزىمدەردى ەگجەي-تەگجەيلى تەكسەرىپ، كەمشىلىكتەرگە جول بەرمەۋى كەرەك. ەگەر ولار قۇجاتتارىن دۇرىس تاپسىرسا، مىندەتتى تۇردە تىركەيمىز. ءقازىر پارتيانى تىركەۋ ءۇشىن ۇيىمداستىرۋ توبىنىڭ سانى 1000 ادامدى قامتۋى كەرەك. ال پارتيانىڭ مۇشەسى 20 مىڭ بولۋى ءتيىس»، - دەدى مينيستر.