ەگدە جاستاعى ەر ادام ورتالىق قالالىق كلينيكالىق اۋرۋحاناعا 7ء-شى جانە 9-شى ومىرتقاسى سىندى دەگەن كۇدىكپەن تۇسكەن. ستەرويدتى وستەوپوروزدان بولعان سىنىق سالدارىنان پاسيەنتتىڭ سۇيەكتەرى سىرقىراپ، بۇلشىق ەتى اۋىرعان، دەپ حابارلايدى اlmaty-akshamy.kz وقكا باسپا ءسوز قىزمەتىنە سىلتەمە جاساپ.
نەيروحيرۋرگيا ءبولىمى مەڭگەرۋشىسى مارات الماتوۆتىڭ ايتۋىنشا، پاتولوگيالىق سىنىق سۇيەك تىنىندەگى قۇرىلىمدىق وزگەرىستەرگە بايلانىستى پايدا بولادى. سالدارىنان سۇيەكتىڭ توزىمدىلىگى تومەندەپ، بولماشى جاراقاتتىڭ ءوزى سىنىققا اكەپ سوقتىرۋى مۇمكىن. جان-جاقتى تەكسەرىلگەننەن كەيىن پاسيەنتتىڭ ومىرتقاسىنا ۆەرتەبروپلاستيكا جاسالدى.
«ۆەرتەبروپلاستيكا – ومىرتقانى «سۇيەككە ارنالعان سەمەنتتىڭ» كومەگىمەن ىشتەن بەكىتۋگە مۇمكىندىك بەرەتىن وپەراسيا. شاعىن ءينۆازيۆتى وپەراسيا كەزىندە تەرىنىڭ از عانا بولىگى كەسىلەدى. وتا بارىسىندا ءبىز ومىرتقاعا ينەمەن مەديسينالىق سەمەنت سالدىق. پروسەدۋرا باستان-اياق رەنتگەن ارقىلى باقىلاندى. بۇل كۇردەلى وتا، سەبەبى سەمەنتتى ومىرتقاعا التى مينۋتتىڭ ىشىندە سالىپ ءبىتىرۋ قاجەت»، - دەيدى نەيروحيرۋرگ مارات الماتوۆ.
جەرگىلىكتى جانسىزداندىرۋ ارقىلى جاسالعان وپەراسيا 40 مينۋتتا اياقتالدى. ءقازىر پاسيەنتتىڭ جاعدايى جاقسى. الداعى بىر-ەكى تاۋلىكتە ول قالىپتى ومىرگە قايتا ورالماق.
«ۆەرتەبروپلاستيكا – جوعارى تەحنولوگيالاردىڭ كومەگىمەن جاسالاتىن زاماناۋي وتانىڭ ءبىر ءتۇرى. ونىڭ قۇنى 300 مىڭنان 1 ميلليون تەڭگەگە دەيىن جەتۋى مۇمكىن. جوعارى تەحنولوگيالىق قىزمەتتىڭ بۇل ءتۇرى ساقتاندىرىلعان پاسيەنتتەرگە تەگىن جاسالادى»، - دەيدى مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ.