تىلەندييەۆ كوشەسى، 2گ مەكەنجايىندا وسى زامانعى ۋربانيستيكانىڭ قاعيداسىن ەسكەرە وتىرىپ، تۇرعىنداردىڭ باستاماسىمەن جاسالعان «جاڭا بۋىن اۋلالارى» جوباسى ىسكە اسىرىلا باستادى. المالى اۋدانىنىڭ اكىمى ارمان ءشامشيننىڭ ايتۋىنشا، بۇل اۋلا اباتتاندىرىلعان اۋماق قانا ەمەس، بارلىق جاستاعى ادامدارعا ىڭعايلى، ءقاۋىپسىز بولىپ، تولىققاندى قوعامدىق كەڭىستىككە اينالماق. ارمان شامشين الماتى قالاسىنىڭ وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا تىلەندييەۆ كوشەسىندەگى اۋلاداعى جۇمىس بارىسىن تانىستىردى.
2023 جىلى اۋدان تۇرعىنى ەلەنا پۋشكوۆا اۋدان اكىمدىگىنە حابارلاسىپ، اۋلانى «حالىق قاتىساتىن بيۋدجەت» باعدارلاماسىنا كىرگىزۋدى ۇسىنعان. وسى كىسىنىڭ ارقاسىندا اۋلا ادام تانىماستاي بولىپ وزگەرىپ وتىر. 2015 جىلى ءبىر رەت جوندەلگەنىمەن، ول جولى ازداعان وزگەرىسپەن شەكتەلىپ، ەلەۋلى ناتيجە بەرگەن جوق. ەندى بۇل جولعى جوبانى جان-جاقتى ويلاستىرىپ جاساپتى.
«ءبىزدىڭ تۇرعىندار وتە بەلسەندى، ۇيىمشىل. بارلىعىمىز بۇل يدەيانى قولداپ، بالالارىمىز ادەمى اۋلادا ويناسا ەكەن دەدىك. بۇرىن مۇندا بوس جاتقان ۇلكەن الاڭ بولعان. ول ارام شوپكە تولىپ، قوقىس جينالىپ، لاس بولاتىن. بالالار الاڭى دا تارلىق ەتەتىن. سوندىقتان ءبىز وزگەرىس كەرەك دەپ شەشتىك تە، وزگەرىس جاساعىمىز كەلدى. قايدا جۇگىنەرىمىزدى بىلمەي، سودان «حالىق قاتىساتىن بيۋدجەت» جوباسىن تاپتىق اقىرى. سوعان قاتىسىپ، تۇرعىندار داۋىس بەرىپ، جوبامىز جەڭىسكە جەتتى. ءقازىر ءبارى جاقسى، ءبارى ادەمى بولىپ كەلە جاتىر»، – دەيدى جوبانىڭ اۆتورى ەلەنا پۋشكوۆا.
الدىمەن اۋماق تولىق تازارتىلىپ، ەسكى-قۇسقى مەن توزعان دۇنيەلەر الىنىپ تاستالىپ، اۋلا تولىعىمەن اسفالتتالىپ، ينجەنەرلىك جەلىلەر جۇرگىزىلگەن. ارحيتەكتۋرالىق-جوسپارلاۋ تۇجىرىمداماسىنا تۇرعىنداردىڭ ءوزى ارالاسىپ، وندا اۋلانىڭ لوگيستيكاسى، جاقىن ماڭداعى اباتتاندىرىلعان ايماقتار، جەر بەدەرى مەن ءتۇرلى جاستاعى ادامداردىڭ قاجەتتىلىگى دە ەسكەرىلگەن.
«بۇرىن بىزدە بار بولعانى ەكى تۋرنيك پەن بوس جاتقان ۇلكەن جەر بار ەدى. اۋلانىڭ جاعدايى وتە ناشار بولاتىن. ءبىز ءوتىنىش بەرىپ، ءقازىر تاماشا اۋلا جاسالىپ جاتىر: بالالارعا ارنالعان الاڭ، ورىندىقتار، اتا-انالار مەن انالارعا ارنالعان اتكەنشەك، جاسوسپىرىمدەرگە ارنالعان ۆوركاۋت الاڭى سالىندى. اۋلا مۇلدە جاڭا بەينەگە ەنىپ كەلەدى. بۇل جەردە تۇرىپ جاتقانىما 30 جىل بولدى، بۇنداي وزگەرىس بولادى دەپ ويلاماپپىن دا. وسىنداي باعدارلامالاردى ءوزىمىز تاڭداپ، اۋلامىزدىڭ قانداي بولارىن ءوزىمىز شەشەتىنىمىز وتە كەرەمەت!»، – دەدى ەلەنا پۋشكوۆا.
سونىڭ ارقاسىندا وسىنداي كوپفۋنكسيالى جوبا دۇنيەگە كەلدى. ەرەسەكتەرگە ارناپ دەمالىس ايماعى - 12 مەترلىك اعاش پەرگولا ورناتىلادى، مۇندا كولەڭكەدە دەمالىپ، وڭاشالانۋعا بولادى. بالالار الاڭى ءقاۋىپسىز جابىنمەن جابدىقتالىپ، ويىن ەلەمەنتتەرىمەن قامتاماسىز ەتىلەدى، وندا كورشى جەكە سەكتورداعى بالالار دا ويناي الادى. اۋماعى اۆتوماتتى سۋارۋ جۇيەسى ارقىلى كوگالداندىرىلىپ، اعاش پەن بۇتالاردى ۇيلەستىرىپ ەككەندىكتەن جاعىمدى ميكروكليمات قالىپتاسپاق. «ءقاۋىپسىز اۋلا» تۇجىرىمداماسى اياسىندا جارىق بەرىلىپ، كامەرالار دا ورناتىلادى.
«اۋماق ۇلكەن – 50 سوتىق. ءبىراق بۇرىن تەك شاعىن بولىگى عانا پايدالانىلاتىن. ەسكى گاراجدار بولدى، كولىك تە كوپ ەدى، ارام ءشوپ باسىپ جاتاتىن. ەندى بىزدە 30 كولىككە ارنالعان ارنايى اۆتوتۇراق بولادى. بەلسەندى ايماق، ۆوركاۋت ايماعىن سالىپ، قالقا ورناتامىز، تۇرعىندار سپورتپەن اينالىسۋى ءۇشىن. وڭاشا وتىرىپ، سويلەسكىسى كەلەتىن تۇرعىندارعا ارنالعان ارناۋلى ورىندار دا بولادى. 5 شاعىن ارحيتەكتۋرالىق فورمادان تۇراتىن بالالار الاڭى بولادى. بارلىق جەردە اۆتوسۋارۋ جۇيەسى بولادى، 150 بۇتا ەگىلەدى، كوگالداندىرامىز. ءبىر اي، ءبىر جارىم اي ىشىندە بۇل جەر ءالى وتە ادەمى بولىپ كەتەدى»، - دەپ تولىقتىردى المالى اۋدانىنىڭ اكىمى ارمان شامشين.
بۇل جوبا تۇرعىنداردىڭ ءوز ورتاسىن وزگەرتۋگە باعىتتالعان تالپىنىسىنان تۋىپ وتىر. «ازاماتتىڭ اۋلاسى» - بۇل تۇرعىنداردىڭ ءارىز-وتىنىشىن ەسكەرىپ بارىپ قولعا العان جايلى دا ءقاۋىپسىز ورتا.