المالى اۋدانىندا زامانعا لايىق جالپى ءبىلىم بەرەتىن 1500 ورىندىق جاڭا وقۋ ورتالىعىنىڭ قۇرىلىسى اياقتالدى. رايىمبەك داڭعىلى - 210 (اۋەزوۆ كوشەسىمەن قيىلىسقان جەردە) مەكەنجايىندا ورنالاسقان بۇل نىسان «جايلى مەكتەپ» ۇلتتىق جوباسىنىڭ اياسىندا «Samruk-Kazyna Construction» اق مەن «Bazis Construction» ءجشس-نىڭ قولداۋىمەن سالىندى.
اۋداندا شامامەن 1 400 ورىن جەتىسپەي تۇرعاندىقتان، مەكتەپ دەر كەزىندە پايدالانۋعا بەرىلگەن. جاڭا وقۋ ورنىنىڭ قۇرىلىس بارىسىن الماتى قالاسى وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى اياسىندا المالى اۋدانىنىڭ اكىمى ارمان شامشين تانىستىردى.
قۇرىلىسى 2023 جىلدىڭ جازىندا باستالعان مەكتەپتىڭ نەگىزگى جۇمىستارى، سونىڭ ىشىندە ىشكى ارلەۋ جۇمىسى تولىعىمەن بىتكەن. ءقازىر رۇقسات بەرەتىن قۇجاتتاماسىن ازىرلەپ جاتىر. تامىز ايىندا وقۋشىلار مەكتەپكە كىرىپ، 1 قىركۇيەكتە العاشقى ساباق وتپەك.
«مەكتەپتىڭ قۇرىلىسى ءبىر جىل ءۇش اي ىشىندە جۇرگىزىلدى. عيمارات ءۇش قاباتتان تۇرادى. بارلىق ينجەنەرلىك جەلىگە قوسىلدى، نىسان 100% دايىن. پارتالار، كومپيۋتەرلەر مەن اقپاراتتىق تاقتالار سەكىلدى قاجەتتى جابدىقتىڭ ءبارى قويىلدى. نىسان پايدالانۋعا بەرۋگە دايىن»، - دەدى «BCN Group» ج ش س قۇرىلىس كومپانياسىنىڭ اتقارۋشى ديرەكتورى ەربول تۇرايىسوۆ.
ءۇش قاباتتى عيماراتتىڭ جالپى اۋماعى شامامەن 16 000 م²، بۇل ستاندارتتى مەكتەپتەرمەن سالىستىرعاندا 15–20%-عا ارتىق. قۇرىلىستىڭ اۋماعى – 2،53 گەكتار. عيمارات كەڭىستىگى ءبىلىم دەڭگەيىنە قاراي بولىنگەن: وڭ جاق قانات باستاۋىش مەكتەپكە ارنالعان، ونىڭ جەكە كىرەبەرىسى، ەكى شاعىن سپورتزالى، وقشاۋلانعان سىنىپتارى بار؛ سول جاق قاناتتا – نەگىزگى جانە جوعارعى سىنىپتار ورنالاسسا، ورتالىعىندا 326 ورىندى اسحانا مەن اكت زالى بولادى.
«نىسان جالپى 8 بلوكتان تۇرادى. ءۇشىنشى بلوك – بۇل مەكتەپتىڭ اكىمشىلىك بولىگى، مۇنداعى ءبىرىنشى قاباتتا مەكتەپ باسشىلىعى ورنالاسادى. بەسىنشى بلوك – باستاۋىش سىنىپتار مەن مەكتەپكە دەيىنگى بالالارعا ارنالعان، ولار ەكىنشى جانە ءۇشىنشى قاباتتا ورنالاسقان. قالعان بلوكتار ورتا جانە جوعارى سىنىپتارعا ارنالعان. مەكتەپ اۋلاسىندا باستاۋىش سىنىپتارعا ارنالعان الاڭدار مەن جوعارى سىنىپ وقۋشىلارىنىڭ اسكەري دايىندىعىنا ارنالعان الاڭ، فۋتبول مەن ۆولەيبول الاڭدارى دا اشىلعان»، – دەپ قوستى ەربول تۇرايىسوۆ.
جاڭا مەكتەپ قازىرگى زامانعى جايلىلىق پەن قاۋىپسىزدىك تالاپتارىنا تولىق ساي كەلەدى. عيماراتتا ءتورت سپورت زالى، STEM-زەرتحانالار، روبوتوتەحنيكا ايماقتارى، كىتاپحانا، كوۆوركينگتەر، سونداي-اق ينكليۋزيۆتى ورتاعا ارنالعان ليفتىلەر مەن پاندۋستار دا بار. ءار قاباتتا اۋىزسۋ ورناتىلىپ، وقۋشىلارعا وقۋلىعىن ساقتايتىن جەكە شكاف بەرىلگەن. قاۋىپسىزدىكتى قامتاماسىز ەتۋ ماقساتىندا مەكتەپ بەينەباقىلاۋ جۇيەسىمەن، دابىلمەن جابدىقتالعان.
قازاقستان رەسپۋبليكاسى پرەزيدەنتىنىڭ تاپسىرماسىنا سايكەس، بۇل مەكتەپ كوپ اۋىسىمدى وقىتۋدى جويىپ، توزعان مەكتەپتەردەن باس تارتۋ ءۇشىن سالىنىپ جاتقان نىسان. بۇل جاي عانا جاڭا مەكتەپ ەمەس، بۇل ءبىلىم بەرۋ ينفراقۇرىلىمىن جاقسارتۋعا باعىتتالعان ساپالى قادام، بارلىق وقۋشىعا تەڭ ءارى جايلى جاعداي جاساۋعا ۇمتىلۋ.