ءتىل ارقىلى ارانداتۋشىلىققا جول جوق – مۇنداي ارەكەتتەر زاڭمەن قاتاڭ جازالانادى
قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە ءتىل ماسەلەسىن ساياسي قۇرالعا اينالدىرىپ، قوعامدا الاۋىزدىق تۋعىزۋعا تىرىساتىن كەز كەلگەن ارەكەتكە قاتاڭ تۇردە توسقاۋىل قويىلاتىنىن مالىمدەدى. بۇل تۋرالى Aqshamnews.kz سايتى حابارلايدى.
مەملەكەت باسشىسى ازاماتتار اراسىندا تىلگە بايلانىستى قۇرمەت پەن تۇسىنىستىك بولۋى قاجەت ەكەنىن اتاپ ءوتتى. اركىم ءوز ويىن ەركىن بىلدىرۋگە قۇقىلى بولعانىمەن، بىرەۋدى بەلگىلى ءبىر تىلدە سويلەۋگە ماجبۇرلەۋگە بولمايتىنىن ەسكەرتتى.
"ەلىمىزدە ازاماتتار ءبىر-بىرىن نەمەسە مىنبەردە سويلەپ تۇرعان ادامدى ‘مىنا تىلدە سويلە’ دەپ ماجبۇرلەمەۋگە ءتيىس"، – دەدى توقايەۆ.
پرەزيدەنت ءتىل ماسەلەسىن جەلەۋ ەتىپ، قوعامدا ىرىتكى سالۋعا باعىتتالعان ارانداتۋشىلىق ارەكەتتەرگە جول بەرىلمەيتىنىن جانە ولاردىڭ زاڭ جۇزىندە جاۋاپكەرشىلىككە تارتىلاتىنىن ناقتى ايتتى.
"ءتىل ماسەلەسىن تۋ ەتىپ قوعامدا الاۋىزدىق تۋعىزعىسى كەلەتىن، ەل ىشىندەگى جاعدايدى شيەلەنىستىرۋگە ۇمتىلاتىن ءاربىر ارەكەتكە توسقاۋىل قويىلىپ، زاڭ جۇزىندە جازالانادى"، – دەدى مەملەكەت باسشىسى.
ونىڭ ايتۋىنشا، مۇنداي ارەكەتتەر تەك ەل ىشىندە عانا ەمەس، شەتەلدە وتىرىپ، ءتۇرلى ۇيىمداردىڭ قارجىلاي نەمەسە اقپاراتتىق تاپسىرمالارىن ورىندايتىن دەسترۋكتيۆتى توپتار تاراپىنان دا ورىن الۋى مۇمكىن.
"بۇل رەتتە ءۇي ىشىندەگى عانا ەمەس، شەتەلدە وتىرىپ الدەبىر ۇيىمداردىڭ اقشاسى مەن تاپسىرماسىنا دەسترۋكتيۆتى ارەكەتپەن اينالىساتىن ارانداتۋشىلار تۋرالى دا ايتىپ وتىرمىز"، – دەپ ناقتىلادى توقايەۆ.