قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە كونسترۋكتيۆتى سىن مەن دەسترۋكتيۆتى ارانداتۋدىڭ اراجىگىن اجىراتىپ، مەملەكەتتىڭ ىشكى ىستەرىنە سىرتقى ىقپال ەتۋ ارەكەتتەرىنە قارسى ناقتى ۇستانىمىن ءبىلدىردى. بۇل تۋرالى Aqshamnews.kz سايتى حابارلايدى.
پرەزيدەنت ەل ىشىندە ءسوز ەركىندىگى مەن كونسترۋكتيۆتى پىكىرتالاستىڭ ماڭىزىن جوققا شىعارماي، سونىمەن قاتار ونى ارانداتۋ مەن قوعامدىق تۇراقتىلىقتى بۇزۋ ماقساتىندا قولدانۋعا جول بەرىلمەيتىنىن اتاپ ءوتتى.
"كۇرىش پەن كۇرمەكتى، كونسترۋكتيۆتى سىن مەن دالەلسىز ءمىن تاعۋدى، كوڭىلگە تيمەيتىن پاروديا مەن جيىركەنىشتى قورلاۋدى ايىرا ءبىلۋ ماڭىزدى. زاڭ الدىندا ءبارى تەڭ"، – دەدى مەملەكەت باسشىسى.
ول ەتنوسارالىق كەلىسىم مەن بەيبىتشىلىككە نۇقسان كەلتىرەتىن كەز كەلگەن ارەكەت زاڭمەن قاتاڭ جازالاناتىنىن ەسكەرتتى. مۇنداي ارانداتۋ ارەكەتتەرىنە ءقازىردىڭ وزىندە توسقاۋىل قويىلىپ كەلەدى جانە بۇل ۇستانىم الدا دا ساقتالادى.
توقايەۆ ءوزىن ءسوز بوستاندىعىنىڭ جاقتاۋشىسى رەتىندە كورسەتىپ جۇرگەن كەيبىر بلوگەرلەر مەن قۇقىق قورعاۋشىلار شىن مانىندە سىرتقى كۇشتەردىڭ مۇددەسىنە قىزمەت ەتىپ جۇرگەنىن مالىمدەدى.
"ەلىمىزدەگى ءار ىستەن ساياسي، جاعىمسىز استار ىزدەپ، شىن مانىندە، ارانداتۋمەن اينالىسىپ جۇرگەنىن ايتپاسقا بولمايدى. بۇل – قازاقستاننان كوشىپ كەتىپ، شەتەلدە ءجۇرىپ حالقىمىزعا شابۋىل جاسايتىن، ءتىپتى مەملەكەتتىك ورگانداردى بوپسالايتىن بۇرىنعى ازاماتتارىمىزدىڭ ارەكەتى"، – دەدى پرەزيدەنت.
ول مۇنداي تۇلعالاردىڭ شەت مەملەكەتتەردەن العان قارجىنى اقتاۋ ماقساتىندا ارەكەت ەتىپ جۇرگەنىن اتاپ ءوتتى. "بۇگىندە مۇنى ءبارى بىلەدى. دەموكراتيانى بىرەۋدىڭ قارجىسىمەن ورناتۋعا بولمايدى"، – دەدى توقايەۆ.