قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە قازاقستاندا ەشقاشان ازاماتتاردى ۇلتىنا، دىنىنە نەمەسە تىلىنە قاراي كەمسىتۋگە جول بەرىلمەگەنىن جانە بولاشاقتا دا بەرىلمەيتىنىن قاداپ ايتتى.
"بارشا ازاماتتارعا بىردەي مۇمكىندىك بەرىلگەن. بۇل – ناعىز ادىلدىك، ادىلەتتى مەملەكەتتىڭ اجىراماس بولىگى"، – دەدى مەملەكەت باسشىسى.
ول ەل بىرلىگى مەن تاتۋلىعىنىڭ مەملەكەتتىك ساياساتتىڭ نەگىزگى تۇعىرى ەكەنىن جانە بۇل ستراتەگيالىق باعىتتىڭ بولاشاقتا دا ساقتالاتىنىن اتاپ ءوتتى.
"ءتۇرلى ەتنوس وكىلدەرى ءبىر شاڭىراقتىڭ استىندا ءبىر ءۇيدىڭ بالاسىنداي ءتاتۋ-تاتتى ءومىر ءسۇرىپ جاتىر. بۇل – ماعىناسى تەرەڭ ناقتى جەتىستىك"، – دەپ تۇيىندەدى توقايەۆ.
پرەزيدەنت ءوز سوزىندە مەملەكەتتىك ءتىل – قازاق ءتىلىنىڭ قولدانىس اياسىنىڭ كەڭەيىپ كەلە جاتقانىن ناقتى دەرەكتەرمەن جەتكىزدى.
"بۇگىندە تۇلەكتەردىڭ 80 پايىزى ۇلتتىق ءبىرىڭعاي تەستىلەۋدى مەملەكەتتىك تىلدە تاپسىرادى. بيىل العاش رەت مەكتەپكە باراتىن بالالاردىڭ 70 پايىزدان استامى قازاق تىلىندە وقيتىن بولادى"، – دەدى ول.
بۇل كورسەتكىشتەر ءتىل ساياساتىنىڭ ناتيجەلى جۇزەگە اسىپ جاتقانىن جانە حالىقتىڭ انا تىلىنە دەگەن سەنىمى مەن سۇرانىسى ارتىپ كەلە جاتقانىن كورسەتەدى.