Reuters اگەنتتىگىنىڭ حابارلاۋىنشا، قولدانبانى اشۋعا تىرىسقان قولدانۋشىلار TikTok-تىڭ قولجەتىمسىز ەكەنى تۋرالى حابارلامانى كورەدى.
TikTok اقش-تا ءتيىستى فەدەرال تىيىم كۇشىنە ەنبەي تۇرىپ، جۇمىسىن توقتاتتى، دەپ حابارلايدى aqshamnews.kz
"اقش-تا TikTok-تى پايدالانۋعا تىيىم سالاتىن زاڭ قابىلداندى. وكىنىشكە قاراي، بۇل ءسىزدىڭ TikTok-تى ازىرگە پايدالانا المايتىنىڭىزدى بىلدىرەدى. پرەزيدەنت ترامپ قىزمەتىنە كىرىسكەن سوڭ، TikTok-تى قالپىنا كەلتىرۋ ءۇشىن بىزبەن جۇمىس ىستەيتىنىن ناقتى ايتتى. جاڭالىقتاردى باقىلاپ وتىرىڭىز"، – دەلىنگەن قوسىمشاداعى حابارلامادا.
ال ترامپ TikTok-قا اقش-تا تىيىم سالۋعا 90 كۇندىك مەرزىم بەرۋدى جوسپارلاپ وتىر.
اقش-تىڭ سايلانعان پرەزيدەنتى دونالد ترامپ NBC News جانە ABC تەلەارنالارىنا بەرگەن سۇحباتىندا، بۇل تۋرالى يناۋگۋراسيادان كەيىن مالىمدەمە جاسايتىنىن حابارلادى.
"بالكىم، 90 كۇنگە ۇزارتامىن – وزدەرىڭىز بىلەتىندەي، 90 كۇندىك مەرزىم بار. ءبىز ءبىر شەشىم تاپقانشا، مۇنى جاسايمىن"، – دەدى ترامپ ABC News ارناسىنا بەرگەن سۇحباتىندا.
جۇما كۇنى اقش جوعارعى سوتى TikTok-قا تىيىم سالۋ تۋرالى زاڭدى راستادى. زاڭعا سايكەس، TikTok-تىڭ يەسى، قىتايلىق ByteDance كومپانياسى 19 قاڭتارعا دەيىن پلاتفورمانى ساتپاسا، قوسىمشاعا تىيىم سالىنادى. ByteDance ساتىپ الۋشىنى ىزدەۋدەن باس تارتقان.
ءوز كەزەگىندە TikTok وكىلدەرى بيلىك تارابىنان كەپىلدىكتەر بولماعان جاعدايدا، جەكسەنبى كۇنى اقش قولدانۋشىلارىنا قىزمەتتى وشىرەتىنىن مالىمدەدى.
ال TikTok پايدالانۋشىلارىنىڭ بۇلتتى دەرەكتەرىن اقش-تا ساقتايتىن Oracle كومپانياسىنىڭ باسشىلىعى سەرۆەرلەردى وشىرۋگە دايىندالىپ جاتىر، دەپ حابارلايدى Reuters The Information سايتىنا سىلتەمە جاساپ.