جينالعان ءونىم ىشكى قاجەتتىلىكتى تولىق قامتاماسىز ەتەدى.
پرەمەر-مينيستردىڭ تاپسىرماسى بويىنشا اۋىل شارۋاشىلىعى، ساۋدا جانە ينتەگراسيا مينيسترلىكتەرى ەلدەگى كارتوپ نارىعىنداعى قالىپتاسقان احۋالعا تۇراقتى تۇردە باقىلاۋ جۇرگىزۋدە، دەپ حابارلايدى aqshamnews.kz
كورشى ەلدەردىڭ، اسىرەسە وزبەكستان تاراپىنان سۇرانىستىڭ ارتۋىنا جانە ەكسپورتتىق باعانىڭ جوعارى بولۋىنا بايلانىستى بيىل كارتوپ ەكسپورتى 1،5 ەسەگە، ياعني 411 مىڭ توننادان 605 مىڭ تونناعا دەيىن ءوستى. كارتوپقا دەگەن اسا جوعارى سۇرانىس ىشكى نارىققا اسەر ەتكەنى اتاپ ءوتىلدى. ماسەلەن، سوڭعى اپتادا ەكسپورتقا باعىتتالعان وندىرۋشىلەر اراسىندا باعانىڭ كۇرت ءوسۋى (170 تەڭگەدەن 270 تەڭگەگە دەيىن) تىركەلدى.
وسىعان بايلانىستى، ىشكى نارىقتاعى كارتوپ باعاسىن تۇراقتاندىرۋ ماقساتىندا 2025 جىلعى 18 قاڭتاردا وتكەن ساۋدا قىزمەتى ماسەلەلەرى جونىندەگى ۆەدومستۆوارالىق كوميسسيا وتىرىسىندا كارتوپتى ءۇشىنشى ەلدەرگە اكەتۋدى 6 اي مەرزىمگە شەكتەۋ تۋرالى شەشىم قابىلداندى. بۇل شارا ەاەو ەلدەرىنە قولدانىلمايدى، الايدا بۇل باعىتتاعى ەكسپورتقا باقىلاۋ جۇرگىزىلەدى. سونىمەن قاتار قالىپتاسقان جاعدايدى ەسكەرە وتىرىپ، بيىلعى 16 قاڭتاردا ەكسپورتقا فيتوسانيتاريالىق سەرتيفيكاتتار بەرۋ تولىعىمەن توقتاتىلدى.
قابىلدانعان شارالار كارتوپ باعاسىنىڭ تۇراقتىلىعىن قامتاماسىز ەتۋگە، باعانىڭ نەگىزسىز وسۋىنە جول بەرمەۋگە جانە نارىققا قاتىسۋشىلار تاراپىنان الىپساتارلىق ارەكەتتەرگە جول بەرمەۋگە باعىتتالعان.
سونداي-اق ساۋدا جانە ينتەگراسيا مينيسترلىگىنىڭ اۋماقتىق ورگاندارى مونوپولياعا قارسى ورگاننىڭ اۋماقتىق بولىمشەلەرىمەن بىرلەسە وتىرىپ، جاعدايعا كۇشەيتىلگەن قاداعالاۋ جۇرگىزەدى جانە ساۋدا قىزمەتى ماسەلەلەرى بويىنشا قولدانىستاعى زاڭنامانى بۇزعان جاعدايدا ولار نارىققا قاتىسۋشىلارعا شۇعىل ىقپال ەتۋ شارالارىن قابىلدايدى.
ق ر اشم دەرەكتەرى بويىنشا، بۇگىنگى تاڭدا قولدا بار قورلار 2025 جىلعى ەرتە ەگىن جيناۋ ناۋقانىنا دەيىن ىشكى قاجەتتىلىكتى تولىق جابۋ ءۇشىن جەتكىلىكتى. 19 قاڭتارداعى جاعداي بويىنشا قورلار ساۋدا جەلىلەرىندەگى قورلاردى ەسەپكە الماعاندا 850 مىڭ توننادان اسادى (كارتوپ وسىرۋشىلەر قاۋىمداستىعى بويىنشا 600 مىڭ توننا، تۇراقتاندىرۋ قورلارىنداعى 68 مىڭ توننا، جەكە قوسالقى جانە شاعىن شارۋاشىلىقتارداعى جەرتولەلەردە 200 مىڭ توننادان استام).