پورتال ارقىلى 400 مىڭنان استام ادام تۇراقتى جانە ۋاقىتشا جۇمىس ورىندارىنا ورنالاسادى.
"ەڭبەك رەسۋرستارىن دامىتۋ ورتالىعى" اق ۆيسە-پرەزيدەنتى شالقار بايقۇلاقوۆ قازاقستاندا جىلدام جۇمىس تابۋ ءۇشىن Enbek.kz پلاتفورماسى جۇمىس ىستەيتىندىگىن ەسكە سالدى، دەپ حابارلايدى aqshamnews.kz
"بۇل ازاماتتارعا قولايلى جۇمىس ورىندارىن تەز تابۋعا جانە جۇمىس بەرۋشىلەرگە قاجەتتى ماماندار تابۋعا مۇمكىندىك بەرەتىن كوپتەگەن قىزمەتتەرى بار سيفرلىق ەكوجۇيە"،- دەدى ول.
ونىڭ ايتۋىنشا، تىركەلگەن ىزدەنۋشىلەر تۇيىندەمەسىن تەز ءارى وڭاي ورنالاستىرا الادى. سونداي-اق، ونى جاڭارتىپ وتىرۋعا بولادى. قولايلى بوس جۇمىس ورىندارىن ىزدەۋمەن بىرگە، ءوزىن قىزىقتىرعان جۇمىس ورىندارعا تۇيىندەمەلەرىن جىبەرە الادى.
"سونىمەن بىرگە، باپتالعان جاساندى ينتەلەكت مودەلى ارقىلى Enbek.kz ءسىزدىڭ داعدىلارىڭىزدى، ءبىلىمىڭىزدى، جۇمىس تاجىربيەڭىزدى ەسكەرە وتىرىپ، ەڭ قولايلى جۇمىس ورىندارىن تاڭدايدى. جۇمىس بەرۋشىلەر ءوز كەزەگىندە بوس جۇمىس ورىندارى تۋرالى مالىمەت ورنالاستىرىپ، جۇمىس ىزدەۋشىلەردىڭ وزەكتى تۇيىندەمەلەرىن كورە الادى. ۇمىتكەرلەردى سۇحباتتاسۋعا شاقىرۋعا بولادى نەمەسە تىكەلەي پلاتفورمادا ونلاين رەجيمىندە سۇحبات وتكىزە الادى"، دەدى شالقار بايقۇلاقوۆ.
ول Enbek.kz-تە جىل سايىن 1 ملن. استام جۇمىس ورنى تۋرالى اقپارات، 600 مىڭ تۇيىندەمە ورنالاستىرىلاتىندىعىن ايتتى.