كەشە باستالعان نەگىزگى ۇبت-عا 305 مىڭ ءوتىنىش قابىلداندى.
عىلىم جانە جوعارى ءبىلىم مينيسترلىگىنىڭ مالىمەتىنشە، نەگىزگى ۇبت 5 شىلدەگە دەيىن جالعاسادى، دەپ حابارلايدى Almaty-akshamy.kz
بۇگىن عىلىم جانە جوعارى ءبىلىم ءمينيسترى ساياسات نۇربەك استانا قالاسىندا ورنالاسقان تەستىلەۋ ورتالىعىنا بارىپ، ۇبت-نىڭ ءوتۋ بارىسىمەن تانىستى.
166 مىڭ تالاپكەر ەكى مۇمكىندىكتى ەسەپكە العاندا، 305 مىڭ ءوتىنىش بەرگەن. ونىڭ ىشىندە تاپسىرۋشىلاردىڭ 75%-ى قازاق تىلىندە، 25%-ى ورىس تىلىندە، 243 ادام اعىلشىن تىلىندە تەستىلەۋدەن وتۋگە ءوتىنىش ءبىلدىردى.
وسى جىلدان باستاپ ءبىز بارلىق تالاپكەرلەرگە ۇلتتىق ءبىرىڭعاي تەستىلەۋدەن وتۋگە بايلانىستى ەرەكشە مۇمكىندىك بەرىپ وتىرمىز. ەندى تالاپكەرلەر نەگىزگى ۇبت-نى ەكى رەت تاپسىرىپ، ەڭ جاقسى ناتيجەمەن گرانت كونكۋرسىنا قاتىسۋعا قاتىسا الادى. بۇگىن قازاقستاندا ءبىز شەكاراسىز ءبىلىم بەرۋگە ۇمتىلامىز. سىزدەردىڭ ساپالى ءبىلىم الىپ، ءوز الەۋەتىڭىزدى تولىق اشۋ ءۇشىن مۇمكىندىك جاسايمىز، - دەپ اتاپ ءوتتى ساياسات نۇربەك تەستىلەۋگە كەلگەن تۇلەكتەرگە.
اتاپ وتسەك، تالاپكەرلەر ءوتىنىش بەرۋ بارىسىندا تەستىلەۋ كۇنىن، ۋاقىتىن جانە ورنىن وزدەرى تاڭدادى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناسياسىن بەلگىلەدى. كومبيناسيالارعا كەلەتىن بولساق، ءقازىر تالاپكەرلەردىڭ 18%-ى «ماتەماتيكا-فيزيكا»، 17%-ى «بيولوگيا-حيميا»، 13%-ى «شىعارماشىلىق»، 10%-ى «ماتەماتيكا-ينفورماتيكا» پاندەرىن تاڭدادى.
تەستىلەۋ فورماتىندا وزگەرىستەر جوق. پاندەر سانى وزگەرىسسىز قالادى، ياعني ءۇش مىندەتتى جانە ەكى بەيىندىك پاندەر، بارلىعى 120 تەست تاپسىرماسى بولادى. الايدا، «قازاقستان تاريحى» جانە «وقۋ ساۋاتتىلىعى» پاندەرى بويىنشا تەست تاپسىرمالارىنىڭ سانىنا وزگەرىستەر ەنگىزىلدى. ەندى «قازاقستان تاريحىنىڭ» ءبىر نۇسقاسىندا 20 تەست تاپسىرماسى بولادى: 1-دەن 10-عا دەيىن – ءبىر دۇرىس جاۋاپتى تاڭداۋعا ارنالعان؛ 11-دەن 20-عا دەيىن – كونتەكستكە نەگىزدەلگەن ءبىر دۇرىس جاۋاپتى تاڭداۋعا ارنالعان تەست تاپسىرمالارى (5 سۇراقتان 2 كونتەكستىك ءماتىن). سونداي-اق، بۇعان دەيىن تالاپكەرلەرگە وقۋ ساۋاتتىلىعىنان 20 تەست تاپسىرماسى بەرىلسە، ەندى 3 ءماتىن بويىنشا 15 تەست سۇراعى ۇسىنىلادى.
وسىلايشا، قازاقستان تاريحى – 20، وقۋ ساۋاتتىلىعى – 15، ماتەماتيكالىق ساۋاتتىلىق – 15 جانە ەكى بەيىندىك ءپان بويىنشا 35 تەست تاپسىرماسى ۇسىنىلادى. ەڭ جوعارى ۇپاي – 140. تەستىلەۋدىڭ جالپى ۋاقىتى – 4 ساعات (240 مينۋت). سونىمەن قاتار، ەرەكشە ءبىلىم بەرۋ قاجەتتىلىكتەرى بار بالالارعا قوسىمشا 40 مينۋت ۋاقىتى ساقتالادى.
ۇبت تاپسىرمالارىنىڭ قۇرىلىمىندا دا وزگەرىستەر بار. جاۋاپتى مينيسترلىك تەست تاپسىرمالارىندا ديستراكتورلار سانىن (جاۋاپ نۇسقالارى) قىسقارتۋ تۋرالى شەشىم قابىلدادى. ءبىر دۇرىس جاۋابى بار تەست تاپسىرمالارىندا نۇسقالار سانى 5-تەن 4-كە دەيىن، ءبىر نەمەسە بىرنەشە دۇرىس جاۋابى بار تەست تاپسىرمالارىندا (ءۇش دۇرىس جاۋاپتان كوپ ەمەس) نۇسقالار سانى 8-دەن 6-عا دەيىن ازايدى.
2022-2023 وقۋ جىلىنان باستاپ «ينفورماتيكا» ءپانى ۇبت بەيىندىك پاندەر كومبيناسياسىنىڭ تىزىمىنە ەنگىزىلدى. وسىعان بايلانىستى «ينفورماتيكا مۇعالىمدەرىن دايارلاۋ»، «اقپاراتتىق تەحنولوگيالار»، «اقپاراتتىق قاۋىپسىزدىك» ءبىلىم بەرۋ باعدارلامالارىنىڭ توپتارىنا تۇسۋشىلەر «ماتەماتيكا-ينفورماتيكا» كومبيناسياسى بويىنشا ۇبت تاپسىرادى.
اكادەميالىق ادالدىقتى قامتاماسىز ەتۋ ماقساتىندا «1 كومپيۋتەر – 2 كامەرا – 1 تەستىلەنۋشى» قاعيداتى ساقتالادى. سونداي-اق، وتكەن جىلدان باستاپ تەست نۇسقالارى تاڭبالانعانىن اتاپ وتكەن ءجون. ياعني، ۇبت-عا قاتىسۋشىلاردىڭ ءارقايسىسىنىڭ جەكە تەست نۇسقاسى بولادى. سونىمەن قاتار، كالكۋلياتور مەن مەندەلەيەۆ كەستەسى كومپيۋتەر ەكرانىندا كورسەتىلەدى. تالاپكەرلەردىڭ پىكىرى مەن قالاۋىن ەسكەرە وتىرىپ، نەگىزگى ۇبت-دا ولارعا مەندەلەيەۆ جانە تۇزداردىڭ ەرىگىشتىك كەستەسىنىڭ قاعاز نۇسقاسى بەرىلەدى. تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياسياعا ءوتىنىش بەرە الادى. سەرتيفيكات اپپەلياسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى، - دەدى مينيستر.
شەكتى بالل وزگەرگەن جوق: «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 بالل، «دەنساۋلىق ساقتاۋ جانە الەۋمەتتىك قامتاماسىز ەتۋ (مەديسينا)» كەمىندە 70 بالل، «اۋىل شارۋاشىلىعى جانە بيورەسۋرستار»، «ۆەتەريناريا» كەمىندە 60 بالل؛ ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل، باسقا جوعارى وقۋ ورىندارىنا كەمىندە 50 بالل جيناۋ كەرەك.
تەستىلەۋگە كىرگىزۋ كەزىندە قول جانە رامالىق مەتالل ىزدەگىشتەر پايدالانىلادى. بۇل تالاپكەرلەردىڭ قاۋىپسىزدىگىن قامتاماسىز ەتىپ، ەرەجەلەردى بۇزۋ مەن تىيىم سالىنعان زاتتاردى (ۇيالى تەلەفون، شپارگالكا جانە ت.ب.) الىپ ءوتۋدىڭ الدىن الۋ ءۇشىن قاجەت.
تەستىلەۋ بارىسىندا اۋديتوريانىڭ (كومپيۋتەرلىك سىنىپتىڭ) جانە بەينەباقىلاۋدىڭ اۋدانىنا بايلانىستى رۇقسات ەتىلگەن ماگنيتتىك تولقىندار شەگىندە ۇتقىر جانە راديوەلەكتروندىق بايلانىس سيگنالدارىن باساتىن قۇرىلعىلار قولدانىلادى.
2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.