وقۋ-اعارتۋ مينيسترلىگى مەن سىبايلاس جەمقورلىققا قارسى ءىس-قيمىل اگەنتتىگى ءبىر مەكتەپتى جەتى جىلدان اسا ۋاقىت باسقارعان ديرەكتورلاردى تەكسەرمەك.
بۇل تۋرالى وقۋ-اعارتۋ ءمينيسترى عاني بەيسەمبايەۆ تالدىقورعاندا ءبىلىم سالاسىنداعى سىبايلاس جەمقورلىقپەن كۇرەس مالەلەرى بويىنشا وتكەن جيىندا ءمالىم ەتتى، دەپ حابارلايدى Almaty-akshamy.kz.
ونىڭ سوزىنشە، مينيسترلىك انتيكورمەن بىرلەسىپ مەكتەپكە دەيىنگى، ورتا، تەحنيكالىق جانە كاسىبي ءبىلىم بەرۋ ۇيىمدارىن قارجىلاندىرۋداعى كوررۋپسيالىق تاۋەكەلدەرگە ساراپتاما جۇرگىزىپ جاتىر.
«ساراپتامانىڭ الدىن الا ناتيجەلەرى بويىنشا كونكۋرس راسىمدەرىندە، جۇمىسقا ورنالاسۋدا، بالالاردى بالاباقشاعا، مەكتەپكە قابىلداۋدا، سونداي-اق ۇيىم ديرەكتورلارىنىڭ ۇزاق ۋاقىت ءبىر قىزمەتتە وتىرۋىندا سىبايلاس جەمقورلىق تاۋەكەلى بار ەكەنى بەلگىلى بولدى. لاۋازىمدى ءبىر قىزمەتتى جەتى جىلدان اسا ۋاقىت كەزەڭىندە اتقارىپ كەلە جاتقان باسشىلاردىڭ بارلىعىن تەكسەرۋ تۋرالى شەشىم قابىلداندى»، - دەدى مينيستر.
بەيسەمبايەۆتىڭ سوزىنشە، مەكتەپ ديرەكتورلارىن تاعايىنداۋ راسىمدەرىنىڭ جاريالىلىعىن قامتاماسىز ەتۋ ماقساتىندا مينيسترلىكتە جوعارى بىلىكتى مۇعالىمدەردىڭ بازاسى مەن مەكتەپ ديرەكتورلارىنىڭ كادرلىق رەزەرۆىن قالىپتاستىرۋ قولعا الىنادى.
ەسكە سالا كەتەيىك، جۋىردا مەملەكەت باسشىسى قاسىم-جومارت توقايەۆ كادر تاپشىلىعىن جەلەۋ ەتىپ، مەكتەپكە كەز كەلگەن ادامدى جۇمىسقا الاتىن باسشىلاردى سىنعا العان.