«تەررەنكۋر» دەمالىس ايماعىنىڭ توعانىندا قىسقى تيۋبينگتەرگە ارنالعان 50 مەترلىك سىرعاناق سالىندى. «سنەجنايا گوركا» الەۋمەتتىك جوباسى جەكە قارجى ەسەبىنەن ورناتىلدى. بۇل ءۇشىن كۇزدە توعان سۋى قۇرعاتىلعان. قىسقى سىرعاناق تەبۋ ماۋسىم اياقتالعان سوڭ قۇرىلىم بۇزىلادى.
سىرعاناقتىڭ باستى ەرەكشەلىگى، ونىڭ توعانعا ورنالاسۋى جانە سىرعاناق تەبۋگە ءقاۋىپسىز. 20 گرادۋس بۇرىشتىق قۇرىلىم 5 بولىككە بولىنگەن، ءارقايسىسى ارنايى تورمەن قورشالعان. ال مارەدە تەجەگىش تور جانە ارنايى جۇمساق قاپتار بار.
جوبانىڭ يدەيالىق شابىتتاندىرۋشىسى باۋىرجان ەرماعانبەتوۆ ايتقانداي، سىرعاناق جاساۋدى كۇن جىلى كەزدە ويلاستىرعان.
- مۇندا جازدا وتباسىممەن ءجيى سەرۋەندەيمىن. قىستا توعاندا سۋ جوق، توتەنشە جاعدايعا ورىن الماس ءۇشىن قۇرعاتىلعان. قىستا توعان بوس تۇرادى، ەش پايداسى جوق. مەدەۋ اۋدانىندا سىرعاناق جوق بولعاسىن سىرعاناق ورناتقىم كەلدى. قىستا بالالار قىدىراتىن جەر از، اتتراكسيوندار جۇمىس ىستەمەيدى. حالىقتىڭ تىعىزدىعى جىل ساناپ ارتىپ كەلەدى. بالالارعا ءقاۋىپسىز الاڭ قاجەت، - دەيدى ول.
ونىڭ ايتۋىنشا، باستى مىندەت 5 جاستان اسقان بالالاردىڭ اتا-اناسىز جانە دەنساۋلىعىنا ءقاۋىپ توندىرمەي ءقاۋىپسىز سىرعاناۋ بولعان.
- سىرعاناقتىڭ قۇرىلىمىن جوبالاپ، زاۋىتقا تاپسىرىس بەردىك. ءسال كەشىگىپ اشتىق. نىسان قاڭقاسى تەمىر، ءبىراق وتە سەنىمدى. جۇك كوتەرگىشتىگى ءبىر شارشى مەترىنە 250 كگ. قۇرىلىم شامامەن ەكى اپتا جينالدى.
- جوبا اكىمدىكپەن، وقۋ-اعارتۋ مينيسترلىگىمەن بىرلەسىپ جۇزەگە استى. ءبىز از قامتىلعان وتباسىلاردىڭ بالالارىنا الەۋمەتتىك قىزمەتتەردى تەگىن ۇسىنامىز. كوپبالالى وتباسىلاردى، مۇگەدەكتەر مەن زەينەتكەرلەردى كۇتەمىز، - دەيدى سىرعاناقتىڭ يدەيالىق شابىتتاندىرۋشىسى باۋىرجان ەرماعامبەتوۆ.
ءتورت بالانىڭ اكەسى باۋىرجان ءارقاشان بالالارىنىڭ بوس ۋاقىتىن ءتيىمدى وتكىزۋدى ويلايدى.
- ۇلكەن بالام ءجاسوسپىرىم. ءقازىر بالالار گادجەتتەرگە تاۋەلدى، كومپيۋتەرگە كوپ ۋاقىتىن جۇمسايدى. ولار فيزيكالىق تۇرعىدا دامىمايدى، ال ول بالانىڭ اعزاسىنا وتە قاجەت. ولار قوزعالۋى كەرەك، اۋامەن تىنىس الۋى كەرەك. قانداي دا بولسا سپورتپەن اينالىسۋ قاجەت. سىرعاناۋ بۇل كەرەمەت نارسە، بالالار كوڭىل كوتەرەدى، جاعىمدى ەموسيا الىپ، قوزعالادى، ادرەنالين الادى. اسىرەسە، قىستا تاۋدىڭ اۋاسى ادامدى شىنىقتىرادى، - دەدى ول.
توعاننىڭ ءتۇبى بالشىقتان تازارتىلىپ، باللاست توسەلگەن.
- بۇل زاۋىتتىڭ شارتى ەدى، ويتكەنى مۇنداي قۇرىلىمدار ءقاۋىپسىز بولۋى كەرەك. بىزدە تەحنيكالىق تاپسىرما تۇبىنە جەتۋ بولدى. بالشىق شاعىن ەسكالاتورمەن تازارتىلىپ، باللاست توسەلدى. ءبىز ونى ءبىرىنشى قاباتپەن دەڭگەيلەس ورناتتىق، - دەيدى باۋىرجان.
- بۇل ورىننىڭ ءوزى كوڭىلدى جايلاندىراتىن تاماشا جەر، كوپتەگەن الماتىلىق وسىلاي ويلايتىن بولار. قىستا توعان ۇنەمى بوس تۇراتىن. ەشكىمگە پايداسى جوق ەدى. ءوز باللونىمەن سىرعاناۋ تەگىن. ءبىزدىڭ تاراپىمىزدان بۇل دۇرىس قادام. ءبىز مۇندا ەشكىمگە زيان تيگىزبەيمىز، تيگىزگىمىز دە كەلمەيدى، - دەدى ول.
دوستارىمەن بىرگە سىرعاناۋعا كەلگەن تۇرعىن باتىرحان بەردىمۇراتوۆ تە اسەرىن ايتتى.
- سىرعاناق تۋرالى دوسىم ايتىپ، مەنى شاقىردى. بىزگە وتە ۇنادى، قالا ورتالىعىنا كەلىپ، باللونمەن سىرعاناۋعا بولادى. بۇل جەردىڭ اۋاسى تازا، ادرەنالين الدىم. وسى جەرگە ءالى كەلەمىن، - دەيدى باتىرحان.
سىرعاناق تەبۋشىلەر اراسىندا بالالارىن اكەلگەن ەرلى-زايىپتىلار دا بولدى.
- قالاعا بارعانعا الىس، ونىڭ ۇستىنە جينالىپ، زاتتاردى، تاماقتى وزىڭىزبەن بىرگە الۋ كەرەك. بۇل سىرعاناق تۋرالى جاقىندا ەستىپ، كوزىمىزبەن كورۋگە كەلدىك. مەنىڭشە، وتە ءقاۋىپسىز جەر، كىشكەنتاي بالالار دا ءقاۋىپسىز سىرعاناي الادى. بىزگە وتە ۇنادى، بالالاردى دەمالىس كۇندەرى ءجيى جىبەرىپ تۇرامىز، - دەدى الماتىلىق ديدار سىدىقوۆ.
سىرعاناق تەپكەن سوڭ دەمالۋشىلار ۇرلەمەلى باللوندى قۇرىلىم باسىنا وزدەرى الىپ شىقپايدى، ول ءۇشىن ارنايى فۋنيكۋلەر بار. بۇل رەتتە، كەلۋشىلەر قاۋىپسىزدىك تەحنيكاسىن ۇيرەتەتىن نۇسقاۋشىلاردىڭ باقىلاۋىندا بولادى.
بۇعان قوسا، كەشەن اۋماعىندا قوعامدىق تاماقتانۋ نىساندارى ورناتىلىپ، تەرراسسادا دەمالىس ايماعى ۇيىمداستىرىلادى.
باللوندى ءبىر ساعاتقا جالعا الۋ قۇنى 3 مىڭ تەڭگە. ءبىر رەتتىك سىرعاناۋ - 500 تەڭگە. ءتيىستى قۇجاتىن كورسەتكەن الەۋمەتتىك وسال ساناتتاعى تۇرعىندارعا قىزمەت تەگىن.