قاڭتار وقيعاسىنا بايلانىستى پروكۋراتۋراعا تەرگەۋدىڭ رۇقسات ەتىلمەگەن ادىستەمەسى بويىنشا بارلىعى 301 شاعىم ءتۇستى
ولار بويىنشا ازاپتاۋ جانە قىزمەتتى اسىرا پايدالانۋعا قاتىستى 243 قىلمىستىق ءىس قوزعالعان. سىبايلاس جەمقورلىققا قارسى قىزمەتتە 234 قىلمىستىق ءىس قارالىپ جاتىر، دەپ حابارلايدى Almaty-akshamy.kz
«ۋاقىتشا ۇستاۋ يزولياتورلارىندا ادامداردىڭ قازا بولعانى تۋرالى توعىز جاعدايدى ارنايى پروكۋرورلار تەرگەۋگە الدى. اتالعان ىستەر اياسىندا ۇستالعاندار 9 لاۋازىمدى تۇلعا، ونىڭ ىشىندە 8 ادام - ۇقكد قىزمەتكەرى جانە بىرەۋى - پوليسيا قىزمەتكەرى. ولار سوتتىڭ سانكسياسىمەن قاماۋعا الىندى. ونىڭ ىشىندە الماتى وبلىسى پوليسيا دەپارتامەنتىنىڭ عيماراتىندا ۇتىك قولدانىپ ازاپتاعان پوليسەي بار. الماتى قالاسىندا دا ۇقكد-نىڭ التى قىزمەتكەرى ازاپتاۋدى قولداندى دەگەن كۇدىككە ءىلىندى. بۇعان قوسا، «جابايى ارمان» قىلمىستىق توبى ۇرلاپ كەتكەن 24 ازاماتتىڭ بارلىعى دەنە جاراقاتىن الىپ، ءبىر ادام قايتىس بولدى. الماتى وبلىسى ۇقكد-نىڭ تاعى ەكى قىزمەتكەرى بۇرىن ۋاقىتشا ۇستاۋ يزولياتورىندا ۇستالعان ادامدى ۇرىپ-سوققان. تەرگەۋ جالعاسۋدا»، - دەيدى باس پروكۋرور بەرىك اسىلوۆ.
ونىڭ ايتۋىنشا، رەسپۋبليكا بويىنشا بارلىعى 230 ادام قازا تاپتى، ونىڭ ىشىندە 19 اسكەري جانە قاۋىپسىزدىك كۇشتەرىنىڭ قىزمەتكەرلەرى. الماتى قالاسىندا قازا تاپقاندار سانى - 139 ادام. ونىڭ ىشىندە 53 قايتىس بولعان ادامنىڭ ءولىمنىڭ ءمان-جايى انىقتالۋدا. ولار قالا اۋماعىندا ءارتۇرلى جاراقاتتارمەن، سونىڭ ىشىندە 48 اتىس، 2 پىشاق جاراقاتتارىمەن تابىلعان.