كىمنىڭ كىم ەكەنى تەرگەۋ بارىسىندا زەردەلەنەدى.
قازاقستاننىڭ باس پروكۋرورى بەرىك اسىلوۆ قاڭتار وقيعاسىندا قۇربان بولعانداردىڭ ءتىزىمى نەگە جاريالانباي جاتقانىن ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قۇربان بولعانداردىڭ ءتىزىمىن ءبىز رەسمي تۇردە جاريالاعان جوقپىز. ونى جاريالاۋدىڭ الدىندا قۇربان بولعانداردىڭ اكە-شەشەلەرى مەن تۋىسقاندارىنا قوسىمشا قايعى اكەلەمىز دەپ ويلايمىز. سوندىقتان وسى ماقساتتا ءبىز بۇل ءتىزىمدى رەسمي تۇردە جاريالاعان جوقپىز»، - دەدى باس پروكۋرور ءماجىلىستىڭ جالپى وتىرىسىندا قويىلعان سۇراقتارعا بەرگەن جاۋابىندا.
سونداي-اق، ول وقيعا كەزىندە مەرت بولعانداردىڭ قانداي ساناتقا جاتاتىنى انىقتالاتىنىن ايتتى.
«ال ەندى 230 ادام مەرت بولدى دەپ ايتىپ كەتتىك. وسىلاردىڭ ىستەرى بويىنشا كوپتەگەن ىستەر قوزعادىق. ادام ءولۋ فاكتىلەرى بويىنشا 94 فاكت، تەرروريزم فاكتىلەرى بويىنشا 46 ءىس قوزعالدى. تەرگەۋ كەزىندە ءبىز ءمان-جايدىڭ ءبارىن تەكسەرىپ، قانشا تەرروريست، ونىڭ كىم ەكەنىن، كىمنىڭ شابۋىل جاساۋشى، كىمنىڭ بەيبىت تۇرعىن ەكەنىن تەكسەرىس ارقىلى شەشىم قابىلداپ، وزىڭىزگە باياندايمىز»، - دەدى بەرىك اسىلوۆ.
ءماجىلىس ءتوراعاسى ەرلان قوشانوۆ قايتىس بولعانداردىڭ ءتىزىمىن جاريالاۋعا تەرگەۋ امالدارىنىڭ شەكتەۋلەرىنىڭ اسەرى بار-جوعىن سۇرادى.
«شەكتەۋلەر بار. كىمنىڭ كىم ەكەنى تەرگەۋ بارىسىندا زەردەلەنەدى. سونىڭ ءبارى انىقتالعاننان كەيىن ءبىز ونى جاريالاي الامىز»، - دەدى باس پروكۋرور.