بيىل بارلىعى 20 مىڭ گرانت ءبولۋ جوسپارلانۋدا.
قازاقستاندا جاڭا بيزنەس-يدەيالاردى ىسكە اسىرۋ ءۇشىن قايتارىمسىز گرانتتار الۋدىڭ ءبىرىنشى لەگىنە وتىنىمدەر قابىلداۋ باستالادى، دەپ حابارلايدى Almaty-akshamy.kz.
«2022 جىلعى 1 ساۋىردەن باستاپ مەملەكەت باسشىسىنىڭ حالىقتىڭ ءال-اۋقاتىن ارتتىرۋ جونىندەگى تاپسىرماسىن جانە كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسىن ىسكە اسىرۋ شەڭبەرىندە جاڭا بيزنەس-يدەيالاردى ىسكە اسىرۋ ءۇشىن قايتارىمسىز گرانتتار الۋدىڭ ءبىرىنشى لەگىنە وتىنىمدەر قابىلداۋ باستالادى. وتىنىمدەردى قابىلداۋ «Business.enbek.kz» پورتالى ارقىلى ونلاين رەجيمىندە جۇزەگە اسىرىلادى. جوسپارلانعان 2019 گرانتتىڭ 1089-ى جاستار ءۇشىن جانە 930-ى حالىقتىڭ الەۋمەتتىك وسال توپتارى ءۇشىن»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
وتىنىمدەردى قابىلداۋ 10 جۇمىس كۇنىنە سوزىلادى، سودان كەيىن اۋداندىق/قالالىق كوميسسيا بەرىلگەن وتىنىشتەردى قارايدى. كوميسسيا وتىرىستارىندا ۇمىتكەرلەر وزدەرىنىڭ بيزنەس-جوبالارىن تانىستىراتىن بولادى. ءوتىنىم بەرىلگەن كۇن كوميسسيانىڭ شەشىمىنە اسەر ەتپەيدى.
اعىمداعى جىلى وتىنىمدەردى قابىلداۋ 7 لەك شەڭبەرىندە كەزەڭ-كەزەڭىمەن جۇزەگە اسىرىلاتىن بولادى. مۇنداي شەشىم ازاماتتاردىڭ «باستاۋ بيزنەس» جوباسى بويىنشا وقۋدان ءوتىپ ۇلگەرۋى ءۇشىن قابىلداندى.
گرانتتار ءبىر رەت بەرىلەدى. بۇل رەتتە بيزنەس-جوباسىن كوميسسيا قاراۋ بارىسىندا ماقۇلداماعان ۇمىتكەر كەلەسى اعىنداردىڭ بىرىنە ءوتىنىمدى قايتا بەرە الادى.
بيىل بارلىعى 20 مىڭ گرانت ءبولۋ جوسپارلانۋدا. سونىڭ ىشىندە جاستار مەن حالىقتىڭ الەۋمەتتىك وسال توپتارىنان شىققان ادامدار ءۇشىن (اتاۋلى الەۋمەتتىك كومەك الۋشىلار؛ كوپ بالالى وتباسى مۇشەلەرى – كوپ بالالى وتباسىلار بويىنشا جاردەماقى الۋشى جانە (نەمەسە) ونىڭ جۇبايى (زايىبى)؛ وڭتۇستىك وڭىرلەردەن سولتۇستىككە قونىس اۋدارۋشىلار؛ قانداستار؛ مۇگەدەكتىگى بار بالالاردى تاربيەلەپ وتىرعان وتباسى مۇشەلەرى؛ مۇگەدەكتىگى بار ادامدار) 10 مىڭ گرانت بەرۋ كوزدەلۋدە.
نىسانالى ساناتتارعا سايكەس كەلۋدەن باسقا، ۇمىتكەرلەر مىناداي كريتەرييلەردىڭ بىرىنە سايكەس كەلۋى ءتيىس:
– حالىقتى جۇمىسپەن قامتۋ ورتالىعىندا تىركەلگەن جۇمىسسىز ازامات؛
– قازاقستان رەسپۋبليكاسىنىڭ سالىق زاڭناماسىنا سايكەس ءبىرىڭعاي جيىنتىق تولەمدى تولەۋشى؛
– ءوتىنىش بەرگەن ساتتە مارتەبەسىن رەسىمدەۋ مەرزىمى 1 جىلعا دەيىنگى جەكە كاسىپكەر (ونىڭ ىشىندە قىزمەتىن توقتاتقان)؛
– جەكە قوسالقى شارۋاشىلىقپەن اينالىساتىن تۇلعا بولۋى ءتيىس.
«باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋدى اياقتاۋ تۋرالى قولدانىستاعى سەرتيفيكاتتىڭ جانە وقىتۋ بارىسىندا دايىندالعان بيزنەس-جوسپاردىڭ بولۋى مىندەتتى بولىپ تابىلادى.
بۇدان باسقا، گرانت الۋعا ۇمىتكەردىڭ تۇرعىلىقتى جەرى بويىنشا كەمىندە 1 جىل تۇراقتى نەمەسە ۋاقىتشا تىركەۋى بولۋى ءتيىس (قونىس اۋدارۋشىلار مەن قانداستاردى قوسپاعاندا).
جۇمىسپەن قامتۋعا جاردەمدەسۋ شارالارىنىڭ قازىرگى قاتىسۋشىلارى، سونداي-اق 12 اي بۇرىن جۇمىسپەن قامتۋعا جاردەمدەسۋ شارالارىنا قاتىسۋدى ءوز ەركىمەن، دالەلسىز سەبەپپەن توقتاتقان ادامدار گرانتقا ۇمىتكەر بولا المايدى.
ءوتىنىم بەرۋ ءۇشىن ەلەكتروندىق سيفرلىق قولتاڭبانى (بۇدان ءارى – ەسق) پايدالانا وتىرىپ، پورتالدا تىركەلۋ، ءوتىنىش نىسانىن تولتىرۋ جانە ەسق كومەگىمەن قول قويۋ قاجەت.
ينتەرنەتكە نەمەسە كومپيۋتەرگە قولجەتىمدىلىك بولماعان جاعدايدا، حالىقتى جۇمىسپەن قامتۋ ورتالىقتارىنىڭ وزىنە-وزى قىزمەت كورسەتۋ ايماقتارىندا، حالىققا قىزمەت كورسەتۋ ورتالىقتارىندا، كاسىپكەرلەرگە قىزمەت كورسەتۋ ورتالىقتارىندا ءوتىنىم بەرۋگە بولادى.
«پورتالدى وتىنىمدەردى قابىلداۋ بويىنشا ءبىرىڭعاي تەرەزە رەتىندە پايدالانۋ مەملەكەتتىك قولداۋ شارالارىن كورسەتۋ پروسەسىندە ۇمىتكەرلەر مەن كورسەتىلەتىن قىزمەتتى بەرۋشىلەردىڭ فيزيكالىق بايلانىستارىن ازايتۋعا عانا ەمەس، سونداي-اق ىرىكتەۋ جانە مەملەكەتتىك قولداۋ شارالارىن تاعايىنداۋ تۋرالى شەشىم قابىلداۋ ساتىلارىندا ادامي فاكتوردىڭ اسەرىن ازايتۋعا مۇمكىندىك بەرەدى. ال كىرۋدىڭ ءبىرىڭعاي نۇكتەسى جانە جەكە كابينەتتەگى وتىنىمدەردىڭ مارتەبەسىن قاداعالاۋ مۇمكىندىگى ازاماتتار ءۇشىن اشىقتىق پەن قولجەتىمدىلىكتى قامتاماسىز ەتەدى»، – دەدى ق ر ەڭبەكمينىنىڭ حالىقتى جۇمىسپەن قامتۋ دەپارتامەنتىنىڭ ديرەكتورى رۋسلان تىلەۋبايەۆ.
گرانتتاردى ۇمىتكەرلەردىڭ وتىنىشتەرىن قاراۋ جونىندەگى كوميسسيانىڭ شەشىمى نەگىزىندە حالىقتى جۇمىسپەن قامتۋ ورتالىقتارى بەرەتىن بولادى. كوميسسيا مۇشەلەرى بيزنەس-جوسپاردى كەلەسى كريتەرييلەر بويىنشا باعالايدى:
– بيزنەس-يدەيانىڭ باسەكەگە قابىلەتتىلىگى؛
– وتكىزۋ نارىقتارىنىڭ پىسىقتالۋى؛
– بيزنەس-جوبانىڭ قارجىلىق ومىرشەڭدىگى؛
– كاسىپكەرلىك داعدىلار دەڭگەيى؛
– جاڭا جۇمىس ورىندارىن قۇرۋ.
شەشىم شىعارىلعاننان كەيىن پورتالداعى ۇمىتكەردىڭ جەكە كابينەتىنە حابارلاما جىبەرىلەدى. كوميسسيانىڭ وڭ شەشىمى بولعان جاعدايدا، ۇمىتكەر ءتيىستى حابارلامانى العان ساتتەن باستاپ 3 جۇمىس كۇنى ىشىندە پورتالدا بانك دەرەكتەمەلەرى بار بانك شوتىن ۇسىنۋى ءتيىس.
بۇدان باسقا، پورتالدا حابارلاما العان ساتتەن باستاپ 3 جۇمىس كۇنى ىشىندە گرانت الۋشى جەكە كابينەتتە ەسق پايدالانا وتىرىپ، شارتقا قول قويۋى ءتيىس.
كەلەسى اعىندار بويىنشا ءوتىنىم بەرۋ كۇنى الدىن الا پورتالدا، ب ا ق جانە الەۋمەتتىك جەلىلەردە جاريالاناتىن بولادى.
قوسىمشا اقپارات الۋ ءۇشىن تۇرعىلىقتى جەرى بويىنشا جۇمىسپەن قامتۋ ورتالىقتارىنا جۇگىنۋگە بولادى.