سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تىلەۋكەنوۆ اتىشۋلى "وكم وپەراتورى" ءىسى بويىنشا تەرگەۋ بارىسىندا ەشكىم ءاليا نازاربايەۆانىڭ ەسىمىن اتاماعانىن مالىمدەدى، دەپ حابارلايدى اlmaty-akshamy.kz.
«ءاليا نازاربايەۆا 2016 جىلى وكم وپەراتورىنىڭ ءبىرىنشى قۇرىلتايشىسى بولدى. بۇل — اشىق دەرەككوزدەردەن الىنعان مالىمەتتەر. سونىمەن قاتار ىسكە قاتىسى بار ادامدار، كۋاگەرلەر روپ جوعالعانعا دەيىن كومپانيانى ءاليا نازاربايەۆا جالعان تۇلعالار ارقىلى باسقارعانىن بىرنەشە رەت ايتىپ، سوتتالۋشى ونىڭ ەسەپشوتىنا اقشانى قالاي اۋدارعانىن ەگجەي-تەگجەيلى ايتىپ بەردى. مەنىڭ ويىمشا، ءسىز دە مۇنىڭ ءبارىن بىلەسىز جانە بۇرىنعى پرەزيدەنتتىڭ قىزىنىڭ نەگە بۇل ىسكە قاتىسى جوقتىعىن، ءتىپتى جاۋاپقا تارتىلماعانىن ءتۇسىندىرىپ بەرىڭىزشى».
سودان سوڭ سپيكەر سوتقا دەيىنگى تەرگەۋ كەزىندە ءاليا نازاربايەۆا جايلى ەشكىم ءتىس جارماعانىن ايتتى.
"تەرگەۋ جۇرگىزۋ بارىسىندا قىلمىستىق پروسەسكە قاتىسۋشىلاردىڭ ەشقايسىسى بۇل ادامنىڭ "وپەراتور روپ" ىسىنە قاتىسىن ايتقان جوق. سوت پروسەسى كەزىندە - مۇمكىن، ايتقان شىعار. ءبىراق تەرگەۋ بارىسىندا وزگە فاميليالار اتالمادى"، - دەدى ول.
ەسكە سالا كەتەيىك، "وپەراتور روپ" ءىسىن تەرگەۋ وتكەن جىلى باستالعان بولاتىن. ەكولوگيا ۆيسە-مينيسترى احمەتجان ءپىرىمقۇلوۆ، "وپەراتور روپ" ج ش س باسقارما ءتوراعاسى مەدەت قۇمارعالييەۆ، باس ديرەكتور سۆەتلانا كوروتكەنكو جانە قارجى ديرەكتورى رۋستەم تەمىربەك قاماۋعا الىندى. ولارعا التى قوقىس شىعاراتىن زاۋىت سالۋ ءۇشىن جەكە ۇيىمدى زاڭسىز قارجىلاندىرۋ ارقىلى كادەگە جاراتۋ الىمدارى تۇرىندە جينالعان 180 ملرد تەڭگەنى ۇرلاماق بولدى دەگەن ايىپ تاعىلدى.
ال 17 قاراشادا استانانىڭ قىلمىستىق ىستەر جونىندەگى اۋدانارالىق سوتىندا ەكس-پرەزيدەنتتىڭ كەنجە قىزى ءاليا نازاربايەۆانىڭ بۇرىنعى ءۇي قىزمەتشىسى جانە وكم وپەراتورىنىڭ "رەسمي" ەكس-قۇرىلتايشىسى شىنار مۇقتاروۆانىڭ ىسىنە نۇكتە قويىلدى. ءبىر اي سوت تالقىلاۋىنان كەيىن سۋديا مۇقتاروۆانىڭ باس بوستاندىعىن 7 جىلعا شەكتەدى.