جاز – كوڭىل كوتەرەتىن، سەرگەكتىك پەن سەرۋەننىڭ ماۋسىمى. اسىرەسە، اسەم الماتىدا تازا اۋادا دەنە قوزعالىسىنا دەن قويعان جانداردىڭ قاتارى ارتىپ كەلەدى. بۇل ماۋسىم — دەنساۋلىقتى جاقسارتىپ، پايدالى ادەتتەردى قالىپتاستىرۋ ءۇشىن تاپتىرماس مۇمكىندىك. ءبىرى تاڭعى جۇگىرۋدى تاڭداسا، ءبىرى سەرۋەن قۇرادى، ەندى ءبىرى ءتىپتى ءبيدى سەرىك ەتەدى.
سولاردىڭ ءبىرى – تاڭعى ءبيدى كۇندەلىكتى داعدىعا اينالدىرعان ەرەكشە جاندار توبى. ولار اپتاسىنا ەكى رەت تەرەڭقۇر بويىندا جينالىپ، تازا اۋادا كوڭىلدى ىرعاقپەن بيلەيدى. بۇل توپتى حورەوگراف، ونەر سالاسىنىڭ ارداگەرى — 72 جاستاعى المات قۇمارجانوۆ باسقارادى.
المات اعا — كاسىبي حورەوگراف، اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە 15 جىلدان بەرى حورەوگرافيا پانىنەن ساباق بەرەدى. بۇعان دەيىن جۇرگەنوۆ اتىنداعى قازاق ۇلتتىق ونەر اكادەمياسىندا 20 جىلداي ەڭبەك ەتكەن. ءوزى دە وسى اكادەميادا رەجيسسەر-حورەوگراف ماماندىعىن ءتامامداعان.
ءبيدى 18 جاسىنان بەرى سەرىك ەتكەن المات قۇمارجانوۆ اشىق دالادا، تازا اۋادا بي ساباعىن ۇيرەتۋدى شامامەن ەكى جارىم اي بۇرىن باستاعان. العاشىندا حورەوگراف سالاۋاتتى ءومىر سالتىن ساقتاۋ كلۋبىنا ءوزىنىڭ وقۋشىسىنىڭ كەڭەسىمەن ءوز قىزىعۋشىلىعىمەن ءۇشىن كەلەدى. ال كلۋب جەتەكشىسى بولسا، سول جەردە بي جاتتىعۋىن وتكىزۋدى ۇسىنىپ، تاڭعى بي يدەياسى وسىلاي جۇزەگە اسىپ كەتەدى.
تاڭعى 7:45-تە باستالاتىن بۇل ساباقتارعا نەگىزىنەن ورتا جانە ۇلكەن جاستاعى ازاماتتار كەلەدى.
– بي دەگەن – قوزعالىس. ال كوشەدە جۇرگەندە دۇرىس تىنىس المايمىز. دەمدى الا بەرىپ، ىشكە كىرگەن كومىرقىشقىل گازىن تولىق شىعارمايمىز. ال بي – دۇرىس تىنىس الۋعا ۇيرەتەدى. ماعان ەڭ الدىمەن، مۋزىكانىڭ ءوزى ۇنايدى. قازاق مۋزىكاسى وتە باي، – دەيدى المات قۇمارجانوۆ.
قاتىسۋشىلار نە دەيدى؟
ءبيدى كۇندەلىكتى داعدىعا اينالدىرىپ ۇلگەرگەن قاتىسۋشىلاردىڭ ءبىرى — 45 جاستاعى نازگۇل تاناشيەۆا. ول ەكى ايدان بەرى وسى تاڭعى بيگە قاتىسىپ ءجۇر.
– ءقازىر اياق-قولىم بىرگە قوزعالادى. قيمىلدار مەن جاتتىعۋلاردى تولىق ءتۇسىنىپ، قايتالاپ ءجۇرمىن. بۇرىن ءبارىن شاتىستىرىپ الاتىنمىن. ەندى قوزعالىستارىم سينحروندى، دەنەم يكەمگە كەلىپ قالدى. ءوزىمدى بەلسەندى سەزىنەمىن، بيگە قاتىسقان كۇنى جۇمىسقا بارعاندا دا كوڭىلىم كوتەرىڭكى، ءوزىمدى جاقسى سەزىنىپ جۇرەمىن. ساعات 9-عا دەيىن بيگە قاتىسىپ، كەيىن جۇمىسقا ۇلگەرەمىن، – دەيدى ول.
ءسىز دە تازا اۋادا سەرگىپ، كوڭىل كوتەرگىڭىز كەلسە — تاڭعى بيگە قوسىلىڭىز! قوزعالىس — دەنساۋلىقتىڭ كىلتى. المات قۇمارجانوۆ سىندى بەلسەندى قوزعالىستى ناسيحاتتاپ جۇرگەن جاندار قاتارىنا قوسىلامىن دەۋشىلەرگە تەرەڭقۇر بويىندا بي جاتتىعۋلارى سەيسەنبى جانە بەيسەنبى كۇندەرى تاڭعى 7:45-تە وتەدى.