دەموگرافيا – ءوڭىردىڭ الەۋمەتتىك-ەكونوميكالىق جاعدايىنىڭ ايناسى.
2025 جىلدىڭ العاشقى توقسانىندا ەلىمىزدە 106 111 بالا تۋىلىپ، 42 628 ادام قايتىس بولعان. وسىلايشا، قازاقستانداعى تابيعي ءوسىم 63 مىڭنان استام ادامدى قۇرادى، دەپ حابارلايدى aqshamnews.kz.
"نك" دەرەگىنشە، ۇلتتىق ستاتيستيكا بيۋروسىنىڭ مالىمەتتەرى بويىنشا، سوڭعى ءبىر جىل ىشىندە قوستاناي وبلىسىندا ءولىم-جىتىم كورسەتكىشى ءار 1000 ادامعا شاققاندا 10،10 بولعان. بۇل رەسپۋبليكا بويىنشا ەڭ جوعارى كورسەتكىشتەردىڭ ءبىرى. العاشقى قاتاردا سولتۇستىك قازاقستان وبلىسى (11،51) مەن شىعىس قازاقستان وبلىسى (11،25) تۇر.
جوعارى ءولىم-جىتىمنىڭ باستى سەبەبى – حالىقتىڭ جاستىق قۇرىلىمىندا. ياعني، ەگدە جاستاعى ادامدار ۇلەسى كوپ.
قوستاناي وبلىسىنىڭ حالقى – 824 624 ادام، بۇل قازاقستان حالقىنىڭ شامامەن 4،1%-ى. وبلىستاعى قالالىق حالىقتىڭ ۇلەسى 63%-دان اسىپ، بۇل رەسپۋبليكالىق ورتاشا كورسەتكىشتەن (56%) جوعارى. بۇل ايماقتا ۋربانيزاسيا دەڭگەيى ەل بويىنشا ورتاشا دەڭگەيدەن جوعارى ەكەنىن بىلدىرەدى.
2025 جىلدىڭ العاشقى توقسانىندا قوستاناي وبلىسىندا 1922 نارەستە دۇنيەگە كەلىپ، 1863 ادام كوز جۇمعان. وسىلايشا، تابيعي ءوسىم نەبارى 59 ادامدى قۇرادى. ءبىراق بۇل جاعىمدى تەندەنسيانى كورسەتەدى: ءولىم-جىتىم دەڭگەيى 2024 جىلدىڭ سايكەس كەزەڭىمەن سالىستىرعاندا 14%-عا تومەندەگەن.
ميگراسيا – ويلانۋعا تۇرارلىق جەكە ماسەلە. تەك 2025 جىلدىڭ العاشقى ءۇش ايىندا وبلىس ميگراسيا ناتيجەسىندە 1004 ادامعا ازايعان. بۇل نەگىزىنەن ەل ىشىندەگى كوش-قونعا بايلانىستى – مىڭنان استام ادام قازاقستاننىڭ باسقا وبلىستارىنا قونىس اۋدارعان.
"نەگىزگى سەبەپ – ەكونوميكالىق جانە ءبىلىم الۋ مۇمكىندىكتەرىن ىزدەۋ. جاستار استاناعا، الماتىعا جانە ەلىمىزدىڭ باتىس وڭىرلەرىنە قونىس اۋدارۋدا"، – دەپ مالىمدەدى ۇلتتىق ستاتيستيكا بيۋروسى.