كوماندامىز مىقتى
بۇگىن شوتلانديانىڭ گلازگو قالاسىندا تەننيستەن كوماندالىق الەم چەمپيوناتى – بيللي دجين كينگ كۋبوگىنىڭ فينالدىق كەزەڭىندە قازاقستان ايەلدەر قۇراماسى ۇلىبريتانيامەن كەزدەسەدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ماچ الدىندا وتكەن باسپا ءسوز ءماسليحاتىندا قۇراما كاپيتانى ياروسلاۆا شۆەدوۆا قازاقستاندىق قىزداردىڭ مۇنداي دەڭگەيدەگى جارىسقا العاش رەت قاتىساتىنىنا قاراماستان، ولارعا سەنەتىنىن مالىمدەدى.
«ءبىزدىڭ كوماندا مىقتى، تەك زارينا دياس جەتىسپەيدى، دەگەنمەن جىبەك قۇلامبايەۆا قوسىلدى. قىزدار بار ىقىلاسىمەن دايىندالىپ جاتىر، قارسىلاستى دا زەرتتەۋدەمىز. ادەتتەگىدەي ماچقا ازىرلەنۋدەمىز. ازيا – تىنىق مۇحيتى ايماعىندا وسىنداي تۇرپاتتا ويناعاندىقتان، بۇل بىزگە تاڭسىق ەمەس. جەڭىس ءۇشىن بار كۇشىمىزدى سالامىز»، - دەدى يا.شۆەدوۆا.
قۇراما كوشباسشىسى ەلەنا رىباكينا گلازگوعا الەمنىڭ مىقتى كوماندالارىنىڭ جينالعانىن، ولاردىڭ ءارقايسىسىنىڭ جەڭىستەن ءۇمىتتى ەكەندىگىن جەتكىزدى.
«قازاقستان قۇراماسى ءۇشىن بۇل الەم چەمپيوناتىنىڭ العاشقى فينالى بولماق. ءار قۇراما كۇشتى بولعاندىقتان، باسەكە وڭايعا تۇسپەيدى. جىلدىڭ اياعى بولعانىنا قاراماستان، قاي-قايسىسى دا ەل نامىسى ءۇشىن ايانبايدى»، - دەدى 23 جاستاعى سپورتشى.
قازاقستاننىڭ ەكىنشى راكەتكاسى يۋليا پۋتينسيەۆا مۇنداي دودالاردا رەيتينگتىڭ پالەندەي ءرول اتقارمايتىنىن ايتتى.
«بيللي دجين كينگ كۋبوگىندا رەيتينگ ەشتەڭەنى شەشپەيدى. كەيدە ءۇشىنشى نەمەسە ءتورتىنشى جۇزدىككە كىرەتىن ويىنشى ۇزدىك 20، 50 نەمەسە 100 تەننيسشىنىڭ دەڭگەيىندە ونەر كورسەتىپ، قارسىلاسىن جەڭىپ كەتىپ جاتادى. سونداي-اق كەيدە رەيتينگىسى جوعارى سپورتشىلار ۇلتتىق قۇراما ءۇشىن باسەكەدە جوعارى ناتيجە كورسەتە المايدى. تەك مۇندا كورتقا شىعىپ، بار شەبەرلىگىڭدى سارپ ەتىپ، ءوز كومانداڭا ۇپاي الىپ بەرۋدى عانا ويلاۋ كەرەك»، - دەدى يۋ.پۋتينسيەۆا.
قازاقستاننىڭ جۇپتىق سىنداعى ءبىرىنشى راكەتكاسى اننا دانيلينا اقش-تا وتكەن WTA قورىتىندى تۋرنيرىنە قاتىسقاندىقتان، گلازگوعا كەيىن ۇشىپ كەلدى. ول مۇنداعى اۋا رايى مەن كورتقا تەز بەيىمدەلۋ قاجەتتىگىن ايتتى.
«ۇلتتىق قۇرامانىڭ ءتۋرنيردىڭ فينالدىق كەزەڭىنە وتكەنىنە قۋانىشتىمىن. مەن ەكىنشى رەت ەل نامىسىن قورعاماقشىمىن. كومانداعا كومەكتەسەمىن دەپ ۇمىتتەنەمىن»، - دەدى قۇرامانىڭ ەڭ جاس ويىنشىسى جىبەك قۇلامبايەۆا.
كوماندانى الەم چەمپيوناتىندا قولداۋ ءۇشىن قازاقستان تەننيس فەدەراسياسىنىڭ پرەزيدەنتى بولات وتەمۇراتوۆ ارنايى كەلدى.
بيللي دجين كينگ كۋبوگىنىڭ گلازگوداعى فينالدىق كەزەڭى 8-13 قاراشا ارالىعىندا وتەدى. قازاقستان بۇگىن ۇلىبريتانيامەن، ەرتەڭ يسپانيا قۇراماسىمەن سىنعا تۇسەدى.