سۋ جولىنىڭ ۇزاقتىعى – 500 مەتر
كاسپييدە ءوتىپ جاتقان جاۋىنگەرلىك دايارلىق ساباقتارى شەڭبەرىندە تەڭىز جاياۋ اسكەرلەرى قۇراماسىنىڭ مەحانيك-جۇرگىزۋشىلەرى ءجۇزۋ كەزىندە بروندى ترانسپورتەرلەردى باسقارۋ جاتتىعۋلارىن وتكىزۋدە، ، دەپ حابارلايدى Almaty-akshamy.kz.
جابدىقتالعان وقۋ ورىندارىنا ءجۇزىپ بارماس بۇرىن، سۋ كەدەرگىلەرىن ەڭسەرۋ كەزىندە قاۋىپسىزدىك تەحنيكاسىنان تەوريالىق ساباقتار وتكىزىلدى. سونداي-اق، نۇسقاۋشىلار مەحانيك-جۇرگىزۋشىلەرگە جاۋىنگەرلىك تەحنيكانى دايىنداۋ جانە تەكسەرۋ ءتارتىبىن، ونى بىتەۋ شارالارىن، قۇتقارۋ-كوشىرۋ قىزمەتىن جانە بايلانىستى ۇيىمداستىرۋ ءىس-قيمىلدارىن ءتۇسىندىردى.
«اسكەري قىزمەتشىلەر جاتتىقتىرۋ كەشەندەرىندە پراكتيكالىق ءىس-قيمىلدى پىسىقتاپ، ارنايى الاڭداردا نورماتيۆتەردى ورىندادى. وسىدان كەيىن عانا جاۋىنگەرلەر بتر-82ا بروندى ترانسپورتەرلەرىندە جۇزۋگە جىبەرىلدى»، – دەدى بريگادا كومانديرىنىڭ قارۋ-جاراق جونىندەگى ورىنباسارى گۆارديا پودپولكوۆنيگى اسلان نۇرجانوۆ.
قازىرگى ۋاقىتتا تەڭىزشىلەر سۋ كەدەرگىلەرىن ەڭسەرەتىن تەحنيكامەن جۇمىس ىستەۋدە. جاۋىنگەرلىك ماشينالاردا ءجۇزۋ جاعالاۋ سىزىعى بويىمەن جاعادان 50 مەتر قاشىقتىقتا وتەدى. سۋ جولىنىڭ ۇزاقتىعى – 500 مەتر. جاتتىعۋ وتەتىن سۋدىڭ تەرەڭدىگى ەكى مەتردەن اسادى. كۇردەلى جاعدايدا تاپسىرمالاردى ورىنداۋ كەزىندەگى ەكيپاجداردىڭ ۇيلەسىمدى ءىس-قيمىلدارى دا ەرەكشە نازاردا بولادى.
سۋ كەدەرگىلەرىن ەڭسەرۋ مانيەۆرلەرىنە 100-دەن استام اسكەري قىزمەتشى، 20-دان استام جاۋىنگەرلىك جانە ارنايى تەحنيكا جۇمىلدىرىلدى. ساباقتاردىڭ ءقاۋىپسىز جاعدايدا ءوتۋىن جاۋىنگەرلىك جۇزگىشتەر كومانداسى، جىلدام جۇرەتىن كاتەر جانە ارنايى كوشىرۋ تەحنيكاسى قامتاماسىز ەتەدى. جاتتىعۋ ساباقتارى 19 تامىزعا دەيىن جالعاسادى.