تەمىرتاۋدا اۋىز سۋمەن قامتاماسىز ەتەتىن سۋ قۇبىرى ۋچاسكەسىندە تەحنولوگيالىق اقاۋ پايدا بولدى.
وسىعان بايلانىستى قالادا توتەنشە جاعدايلار رەجيمى ەنگىزىلدى، دەپ حابارلايدى Almaty-akshamy.kz El.kz اقپارات اگەنتتىگىنە سىلتەمە جاساپ.
بۇل تۋرالى قالا اكىمى وراز تاۋىربەكوۆ تۇرعىندارعا بەينەۇندەۋ جاساپ، ونى جەلى پاراقشاسىندا جاريالادى.
«قۇرمەتتى تەمىرتاۋلىقتار، وكىنىشكە وراي كەشە وڭ جاعالاۋ تۇرعىندارىن اۋىز سۋمەن قامتاماسىز ەتەتىن سۋ قۇبىرى ۋچاسكەسىندە پايدا بولعان تەحنولوگيالىق اقاۋعا بايلانىستى، ءبىز بۇل ايماققا اۋىز سۋ بەرۋدى ۋاقىتشا توقتاتۋعا ءماجبۇر بولدىق. جاعدايدى ەسەپكە الا وتىرىپ جانە قولدانىستاعى زاڭنامادا كوزدەلگەن نورمالارعا سۇيەنىپ مەنىڭ وكىمىمەن توتەنشە جاعدايلار رەجيمى ەنگىزىلدى. بۇل رەجيم شەڭبەرىندە قاجەتتى قاراجاتتى ءبولۋ جانە مەردىگەرمەن ارنايى تەحنيكا جۇمىلدىرىلىپ، اۋىز سۋمەن قامتاماسىز ەتۋ ماسەلەسىن قىسقا مەرزىمدە تۇراقتاندىراتىن بولامىز»، - دەدى تەمىرتاۋ اكىمى.