بوكستان بەلگرادتا ءوتىپ جاتقان الەم چەمپيوناتىندا قازاقستان كومانداسى العاشقى التىنىن جەڭىپ الدى دەپ حابارلايدى almaty-akshamy.kz Olympic.kz. سىلتەمە جاساپ.
48 كەلىدە جۇدىرىقتاسقان تەمىرتاس ءجۇسىپوۆ فينالدا تايلاندىق ۆۋتتيچاي يۋراچايدى 5:0 ەسەبىمەن جەڭدى. سونداي-اق، ول قارسىلاسىن ءۇشىنشى راۋندتا نوكداۋنعا جىبەرىپ، ءوزىنىڭ الەمدەگى مىقتىلىعىن دالەلدەدى.
جەكپە-جەك تولىعىمەن قازاقستاندىق سپورتشىنىڭ باسىمدىعىمەن ءوتتى. تەمىرتاس سالقىنقاندىلىعىنان تانباي، تايلاندتىق بوكسشىعا ارتىق سوققى جۇمساتپاي، ءۇش راۋندتى دا ءبىر دەممەن وتكىزدى.
ايتا كەتەلىك، تەمىرتاس ءجۇسىپوۆ بۇعان دەيىن الەم چەمپيوناتتارىندا جۇلدە الماعان. ول ازيا چەمپيونى، اسكەريلەر اراسىنداعى الەم چەمپيونى جانە قازاقستاننىڭ بەس دۇركىن چەمپيونى.
"بۇل جەڭىسىمدى بارشا قازاق ەلىنە ارنايمىن! جانكۇيەرلەرگە قولداۋى ءۇشىن العىسىم شەكسىز. فينالدىق كەزدەسۋ بولعان سوڭ، پسيحولوگيالىق تۇرعىدان قيىنداۋ بولدى.
ال قارسىلاسىم تۋرالى ايتار بولسام... ول وتە ىڭعايسىز، جىلدام قيمىلدايتىن بوكسشىلار ەكەن. الايدا، باپكەرلەرىمنىڭ ايتۋىمەن جەكپە-جەك بارىسىندا ونى جەڭۋدىڭ جولىن تاپتىم.
بارشا حالقىما ماعان قولداۋ كورسەتكەنى ءۇشىن باس ءيىپ، راحمەتىمدى ايتامىن"، - دەدى تەمىرتاس.