الماتىدا ۇلتتىق بايقاۋدىڭ جەڭىمپازدارى انىقتالدى
الماتىداعى قابىلداۋ ۇيىندە رەسپۋبليكالىق كونكۋرستىڭ قالالىق كەزەڭىندە ۇزدىك اتانعاندار سالتاناتتى تۇردە ماراپاتتالدى. قالانىڭ ۇلگىلى وتباسىن انىقتايتىن دودا جىل سايىنعى ءداستۇر بويىنشا بيىل دا 15 مامىر – وتباسى كۇنىنە وراي باستالعان ەدى.
ۇلتتىق بايقاۋعا قاتىسۋعا وتىنىمدەر مامىر-شىلدە ايلارىندا قابىلدانعان. بيىل 235 وتباسى قاتىسۋعا نيەت بىلدىرگەن. الدىمەن اۋداندىق ىرىكتەۋ كەزەڭى ءوتىپ، قالالىق كەزەڭگە 16 اۋلەت جولداما الدى. قالالىق كوميسسيانىڭ شەشىمىمەن ءار اۋداننان ءبىر وتباسى جۇلدەگەر اتاندى. سولاردىڭ اراسىنان ءبىر اۋلەتتىڭ مەرەيى ۇستەم بولدى. مەرەيلى وتباسىعا 800 مىڭ تەڭگە، اۋدانارالىق كەزەڭدە ۇزدىك اتانعان 7 وتباسىعا 400 مىڭ تەڭگە اقشالاي سىي بەرىلدى.
مەرەيلى وتباسى اتانىپ، رەسپۋبليكالىق كەزەڭگە جولداما العان – مەدەۋ اۋدانىنىڭ اتىنان قاتىسقان كاپىشيەۆتەر وتباسى. مۇرات سادان ۇلى مەن مەنزيپا كارىم قىزى – ءۇش بالالى اتا-انا. ءۇش بالاسى دا اتا جولىن جالعاستىرىپ كەلەدى. بۇل اۋلەتتە ءۇش ۇرپاق تەمىرجول سالاسىندا ەڭبەك ەتىپ كەلە جاتىر.
«بۇگىن ءبىز «مەرەيلى وتباسى» ۇلتتىق كونكۋرسىنىڭ قورىتىندىسىن شىعارىپ، جەڭىمپازدارىن ماراپاتتادىق. بۇل بايقاۋ 2014 جىلدان بەرى وتكىزىلىپ كەلەدى. وتباسى ينستيتۋتىن ناسيحاتتاپ، ەلىمىزدەگى ونەگەلى وتباسىلاردى تانىتۋدا وتە ماڭىزدى بايقاۋ. قالامىزدا مامىر ايىندا باستالىپ، كوپتەگەن وتباسى بايقاۋعا قاتىسۋعا نيەت ءبىلدىردى. بارلىعى 235 وتباسى ءوتىنىم بەرىپ، ءار اۋداننىڭ ۇزدىك جانۇياسى انىقتالدى. «وتان – وتباسىنان باستالادى» دەگەن ءسوز بار. سوندىقتان وسىنداي وتباسىلاردى كوپشىلىككە ناسيحاتتاۋ – بارشامىزدىڭ مىندەتىمىز. جىل سايىن بايقاۋعا قىزىعۋشىلىق تانىتىپ وتىرعانداردىڭ قاتارى ارتىپ كەلەدى»،– دەيدى الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆ.
• تاقىرىپقا وراي
مۇرات كاپىشيەۆ، «مەرەيلى وتباسى» بايقاۋىنىڭ جەڭىمپازى:
ۇلتتىق جوبانى تەلەديداردان كورسەتىپ، ىلعي ايتىپ جاتادى. بيىل وسى بايقاۋدىڭ ۇيىمداستىرىلعانىنا 10 جىل بولىپتى. «وتىنىمدەر قابىلداپ جاتىر» دەگەندى ەستىپ، قاتىسۋعا نيەت بىلدىردىك.
ءبىز تەمىرجول سالاسىندا ءۇش ۇرپاق جۇمىس ىستەيمىز. مەنىڭ اكەم تەمىرجولشى بولعان. ول 1932 جىلى وسى سالاعا كەلىپ، 1968 جىلى زەينەتكە شىقتى. اكەم مەن انام 8 بالا تاربيەلەپ، وسىرگەن. ولاردىڭ بارلىعى اكە جولىن قۋىپ، تەمىرجول سالاسىندا قىزمەت ەتتىك. مەنىڭ 3 بالام بار. ولاردىڭ ۇشەۋى دە تەمىرجولدا قىزمەت ەتەدى. جولداسىم مەديسينا ماماندىعىن ءتامامداعان. ءبىراق تەمىرجول سالاسىندا قىزمەت ەتتى. بۇل جولعى سايىس وتە جاقسى ءوتتى. ۇيىمداستىرۋشىلارعا العىسىمدى ايتامىن!