الماتى قالاسى قىلمىستىق-اتقارۋ جۇيەسى دەپارتامەنتىنە قاراستى №11 مەكەمە باستىعىنىڭ جەدەل جۇمىس، رەجيم جانە كۇزەت جۇمىستارى جونىندەگى ورىنباسارى نۇرلان كەرەبايەۆ – زاڭ مامانى. الماتىدا تۋىپ-وسكەن.
العاشقى ەڭبەك جولىن المالى اۋدانى ءىىب ۋچاسكەلىك پوليسيا ينسپەكتورى قوعامدىق قاۋىپسىزدىك ءبولىمىنىڭ تاعىلىمداماشىسى بولىپ باستاعان. ءوز ىسىنە ادال جاس مامان قىزمەت بارىسىندا ساتىلاپ ءوسىپ، ءار جىلدارى جاۋاپتى لاۋازىمداردا بولدى. اتاپ ايتساق، وسى اۋداننىڭ اكىمشىلىك پوليسيا بولىمىندە، جەرگىلىكتى پوليسيا قىزمەتىندە، الماتى قالاسى مامانداندىرىلعان كۇزەت قىزمەتى باسقارماسىندا، الماتى اكادەمياسىندا ابىرويلى ەڭبەك ەتتى.
بۇگىندە الماتىداعى بالالار كولونياسىندا. جاۋاپكەرشىلىگى بۇرىنعىدان دا ەسەلەندى. سەبەبى، بۇل تۇزەۋ مەكەمەسىندە ءالى ويى، كوزقاراسى بەكي قويماعان جاسوسپىرىمدەر جازاسىن وتەپ جاتىر. ولاردىڭ ءجۇرىس-تۇرىسىن باقىلاپ قانا قويماي، ومىرگە دەگەن كوزقاراسىنىڭ قالىپتاسۋىنا، اينالاسىنا دەگەن سەنىمىن، جاقسى ومىرگە دەگەن ءۇمىتىن جوعالتىپ الماۋىنا اتسالىسادى.
تەمىردەي تارتىپكە توسەلگەن ادىلەت پودپولكوۆنيگى كەزەكشى بولىمدە كەزەكشى ورىنباسارلارىنىڭ بەينەباقىلاۋ جۇيەسى ارقىلى بۇكىل مەكەمەنىڭ اۋماعىنداعى قوزعالىستاردى قاداعالايدى. بوس ۋاقىتىندا قىزمەتكەرلەرمەن بىرلەسىپ فۋتبول وينايدى، سالاۋاتتى ءومىر سالتىن ۇستانادى.
– ارىپتەسىمىز ادىلەت پودپولكوۆنيگى نۇرلان سەرىك ۇلى «ىشكى ىستەر ورگاندارىنىڭ ۇزدىگى» جانە «پوليسيا» توسبەلگىسىمەن ماراپاتتالعان. بۇل قۇرمەت ونىڭ قىزمەتىنە دەگەن ادالدىعى مەن ۋاقىتپەن ساناسپاي، تىنباي ەڭبەك ەتكەنى ءۇشىن بەرىلگەن. قازىرگى كۇنى دە ابىرويلى. ول بولىمىندەگى قىزمەتكەرلەردىڭ جۇيەلى، تىڭعىلىقتى، ناقتى جۇمىس اتقارۋىنا ەرەكشە كوڭىل بولەدى. سوندىقتان دا تاجىربيەسى مول ازامات بۇكىل ۇجىم الدىندا بەدەلدى. مەكەمەگە جاڭادان كەلگەن تىڭداۋشىلارعا دا تالىمگەر رەتىندە بىلگەنىمەن ءبولىسىپ، جول كورسەتىپ وتىرادى. وزىنە دە، ىسىنە دە جاۋاپكەرشىلىگى جوعارى، قوعامدىق ءتارتىپتى قامتاماسىز ەتىپ، تۇراقتىلىق پەن تىنىشتىق جولىندا قىزمەت ەتىپ جۇرگەن مامان يەسىنىڭ ءومىر جولى، ۇستانىمى جاستارعا ۇلگى بولارى ءسوزسىز، – دەيدى №11 مەكەمە باستىعى ادىلەت پولكوۆنيگى المات سۇلەيمەنوۆ.