تەمەكى ءتۇتىنى مەن تۇقىلدارىنداعى ۋلى زاتتار انتيبيوتيكتەرگە ءتوزىمدى باكتەريالاردىڭ ءوسۋى مەن تارالۋىنا ىقپال ەتىپ، ەكولوگيا مەن تەمەكى شەگۋشىلەردىڭ دەنساۋلىعىنا ءقاۋىپ توندىرەدى.
بۇل تۋرالى درەزدەن تەحنيكالىق ۋنيۆەرسيتەتىنىڭ عالىمدارى Environmental Health Perspectives جۋرنالىندا جاريالانعان زەرتتەۋىندە مالىمدەدى، دەپ حابارلايدى aqshamnews.kz.
زەرتتەۋ اۆتورلارىنىڭ دەرەكتەرىنە سايكەس، تەمەكى سۇزگىلەرى سۋعا تۇسكەندە ءقاۋىپتى ميكروورگانيزمدەردىڭ كوبەيۋىنە جاعداي جاسايدى. تەمەكى تۇقىلدارىندا مەكەندەيتىن باكتەريالار انتيبيوتيكتەرگە توزىمدىلىككە يە بولىپ، كەيىن وزەندەر، كولدەر مەن جاعاجايلار ارقىلى تارالىپ، ادامدار ءۇشىن ءقاۋىپ توندىرەدى.
تەمەكى شەگۋدىڭ قاۋىپتىلىگى تەك قورشاعان ورتانىڭ لاستانۋىمەن شەكتەلمەيدى. ەكسپەريمەنتتەر كورسەتكەندەي، تەمەكى شەگۋشىلەردىڭ وكپەسىندە باكتەريالار اراسىندا توزىمدىلىك گەندەرىنىڭ بەرىلۋىنە قولايلى جاعدايلار قالىپتاسادى. بۇل پنيەۆمونيا سياقتى جۇقپالى اۋرۋلاردىڭ ەمدەلمەۋ ىقتيمالدىعىن ارتتىرادى.
عالىمدار مۇنداي وزگەرىستەر ستاندارتتى تەراپياعا باعىنبايتىن ولىمگە اكەلەتىن ينفەكسيالاردىڭ كوبەيۋىنە اكەلۋى مۇمكىن ەكەنىن اتاپ وتەدى. ولار انتيبيوتيكتەرگە ءتوزىمدى باكتەريالاردىڭ تارالۋىن باسەڭدەتۋ ءۇشىن تەمەكى قالدىقتارىن كادەگە جاراتۋدى قاتاڭ باقىلاۋدى ۇسىنۋدا.