قازاقستان مەن ازەربايجان جوعارى ءبىلىم سالاسىنداعى ىنتىماقتاستىقتى كەڭەيتۋگە باعىتتالعان ماڭىزدى قادام جاسادى. ازەربايجاننىڭ ادا ۋنيۆەرسيتەتىندە ازەربايجان مەن قازاقستان اراسىنداعى جوعارى ءبىلىم سالاسىنداعى ىنتىماقتاستىقتى كەڭەيتۋگە ارنالعان دوڭگەلەك ۇستەل ۇيىمداستىرىلدى، دەپ حابارلايدى aqshamnews.kz
ءىس-شارا بارىسىندا قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك، ازەربايجاننىڭ عىلىم جانە ءبىلىم ءمينيسترى ەمين امرۋللايەۆ، سونداي-اق ەكى ەلدىڭ جوعارى وقۋ ورىندارىنىڭ رەكتورلارى باس قوستى.
ق ر عىلىم جانە جوعارى ءبىلىم ءمينيسترى ساياسات نۇربەك ەكى ەل اراسىنداعى جوعارى ءبىلىم مەن تەحنولوگيالار سالاسىنداعى ىنتىماقتاستىق ءۇشىن جاڭا مۇمكىندىكتەر اشىلعانىنا توقتالدى. ساياسات نۇربەك ازەربايجان مەن قازاقستان اراسىنداعى باۋىرلاستىق قاتىناستار ءبىلىم بەرۋ جانە عىلىمي ىنتىماقتاستىقتا دا ءوز كورىنىسىن تابۋى ءتيىس ەكەنىن ايتتى. مينيستر قازىرگى تاڭدا ەكى ەلدىڭ جوعارى وقۋ ورىندارىمەن سەرىكتەستىك جوسپارى مەن يننوۆاسيالىق تاسىلدەردى جۇزەگە اسىرۋ بويىنشا جۇمىستار جۇرگىزىلىپ جاتقانىن اتاپ ءوتتى. ازەربايجان رەسپۋبليكاسىنىڭ عىلىم جانە ءبىلىم ءمينيسترى ەمين امرۋللايەۆ ازەربايجان مەن قازاقستان اراسىندا ءبىلىم سالاسىنداعى ىنتىماقتاستىقتى دامىتۋ ماڭىزدى ەكەنىن ايتتى.
دوڭگەلەك ۇستەل بارىسىندا 40 مەموراندۋمعا قول قويىلدى، وعان ەكى ەلدىڭ 17 ۋنيۆەرسيتەتىنىڭ وكىلدەرى قاتىستى.
QyzPU دەلەگاسياسى باسقارما ءتوراعاسى – رەكتور گۇلميرا قانايدىڭ باسشىلىعىمەن ازەربايجان مەملەكەتتىك پەداگوگيكالىق ۋنيۆەرسيتەتىنىڭ رەكتورى دجافار دجافاروۆپەن جانە باكۋ ەۋرازيا ۋنيۆەرسيتەتىنىڭ رەكتورى ساياۆۋش گاسىموۆپەن كەزدەسىپ، ىنتىماقتاستىقتى دامىتۋعا باعىتتالعان مەموراندۋمدارعا قول قويدى.
مەموراندۋمدار ۋنيۆەرسيتەتتەر اراسىنداعى ارىپتەستىكتى نىعايتىپ، اكادەميالىق ۇتقىرلىق باعدارلامالارى مەن ءبىلىم الماسۋ مۇمكىندىكتەرىن كەڭەيتۋدى كوزدەيدى. تاراپتار جوعارى جانە جوعارى وقۋ ورنىنان كەيىنگى ءبىلىم، عىلىم مەن مادەنيەت، عىلىمي-زەرتتەۋ سالاسىنداعى ىنتىماقتاستىقتى دامىتۋعا ۋاعدالاستى.
بۇل كەلىسىمدەر ستۋدەنتتەر مەن وقىتۋشىلاردىڭ ءوزارا تاجىريبە الماسۋىنا، بىرلەسكەن عىلىمي جوبالاردى جۇزەگە اسىرۋعا جانە ءبىلىم ساپاسىن ارتتىرۋعا تىڭ سەرپىن بەرەدى. سونىمەن قاتار اكادەميالىق ۇتقىرلىق باعدارلاماسى جاستارعا حالىقارالىق دەڭگەيدە ءبىلىم الىپ، مادەني تاجىريبە جيناقتاۋعا مۇمكىندىك جاسايدى.
4-5 ناۋرىز ارالىعىندا باكۋ قالاسىندا «Study in Kazakhstan» شەتەلدىك جاستاردى قازاقستاندا ءبىلىم الۋعا شاقىرۋعا ارنالعان جارمەڭكە ءوتتى. قازاقستان مەن ازەربايجاننىڭ ءبىلىم بەرۋ سالاسىنداعى ىنتىماقتاستىعى بولاشاقتا دا نىعايا تۇسپەك.
