تۇركىستان وبلىسىنىڭ پروكۋراتۋراسى «Telegram» الەۋمەتتىك جەلىسىنە تالداۋ جۇرگىزۋ بارىسىندا پورنوگرافيالىق سيپاتتاعى، ونىڭ ىشىندە كامەلەتكە تولماعانداردىڭ قاتىسۋىمەن فوتو/بەينە ماتەريالداردى كورۋگە ارنالعان اقىلى ارنانى تاپتى.
بۇل تۋرالى تۇركىستان وبلىسىنىڭ پروكۋراتۋراسىنىڭ باسپا ءسوز قىزمەتى مالىمدەگەن، دەپ حابارلايدى aqshamnews.kz.
اتالعان فاكتى بويىنشا قاۋلى شىعارۋ ارقىلى جەدەل-ىزدەستىرۋ ءىس-شارالارى باستالدى.
وسىلايشا، تەكسەرۋ بارىسىندا «Telegram» جەلىسىندە 2500 تەڭگەگە پورنوگرافيالىق بەينەروليكتەر، ونىڭ ىشىندە كامەلەتكە تولماعاندار مەن مەكتەپ وقۋشىلارىنا قاتىستى ماتەريالدار ۇسىنىلعانى انىقتالدى.
— سايتتا بارلىعى 8012 جازىلۋشى تىركەلگەن. جەلى اۋديتورياسى قازاقستان جانە تمد ەلدەرىنىڭ جازىلۋشىلارى. ارنايى ءىس-شارالارىنىڭ ناتيجەسىمەن سايت ۇيىمداستىرۋشىلارى مەن قاراۋ، كىرۋ جانە جازىلۋ ءۇشىن اقشا تولەنەتىن دروپەرلەر انىقتالدى. 14 ناۋرىز كۇنى وبلىس پروكۋراتۋراسىنىڭ ۇيلەستىرۋىمەن ۇيىمداسقان قىلمىسقا قارسى كۇرەس باسقارماسىمەن اتالعان توپ مۇشەلەرى تۇركىستان جانە قىزىلوردا وبلىستارىندا ۇستالدى. ۇيىمداستىرۋشى بۇعان دەيىن اۋىر قىلمىس جاساعانى ءۇشىن سوتتى بولعان، قازىرگى تاڭدا ول قاماۋعا الىنعان، — دەلىنگەن حابارلامادا.
اتالعان فاكتىلەر بويىنشا قك 311-بابى جانە 312-بابىنىڭ 1-بولىگى بويىنشا سوتقا دەيىنگى تەرگەپ-تەكسەرۋ باستالعان.
بۇدان بولەك، پروكۋراتۋرانىڭ نۇسقاۋىمەن «Telegram» جەلىسىندەگى 8 مىڭ جازىلۋشىسىنا قاتىستى ولاردىڭ ارەكەتتەرىندە پەدوفيليا بەلگىلەرىنىڭ بار-جوعى جانە وسىعان ۇقساس قىلمىستار ءۇشىن بۇرىن سوتتالعانداردى انىقتاۋ باعىتىندا تەكسەرۋ جۇمىستارى باستالدى.
قۇقىققا قايشى نيەت راستالعان جاعدايدا مۇنداي ادامداردى ۋاكىلەتتى جانە قۇقىق قورعاۋ ورگاندارى ەسەپكە الاتىن بولادى.