الماتى وبلىسى تەكەلى قالاسىندا كەز-كەلگەن ادام اقشا تولەمەي-اق ازىق-تۇلىك الاتىن سورە اشىلدى دەپ حابارلايدى almaty-akshamy.kz
«جان جىلۋى مەكەنى» دەپ اتالاتىن جەردە داستارقانعا اسا قاجەتتىنىڭ ءبارى بار. جەتىسۋ جەرىنىڭ ىسكەر ايەلدەرى قولعا العان قايىرىمدى شارانىڭ باستى ماقساتى ادامداردىڭ بىر-بىرىنە جىلۋ سىيلاپ، مۇقتاج جانعا قول ۇشىن بەرۋ.
تەكەلى قالاسىنىڭ تۇرعىنى دانا وسكەنبايەۆا - بەس بالانىڭ اناسى. كىشكەنتايىنىڭ كۇتىمىمەن ۇيدە وتىرعان ول الاتىن جاردەماقىسىنىڭ ازىق-تۇلىكتەن ارتىلمايتىنىن ايتادى. ال قىمباتشىلىق قىسقان زاماندا دۇكەن ىشىنەن اشىلعان سورەدەگى تاۋار حالىققا ناعىز كومەك دەپ سانايدى.
اي سايىن ءوز باسىم 70 مىڭ تەڭگەدەن اسا قاراجاتتى ازىق-تۇلىككە جۇمسايمىن. وسى جەردەن تەگىن قانت، كەسپە، شاي الدىم. بۇل - بىزگە ۇلكەن كومەك. وسىنى ۇيىمداستىرىپ وتىرعان ادامدارعا العىسىمدى ايتامىن، - دەدى دانا وسكەنبايەۆا.
ۇيىمداستىرۋشىلار «جان جىلۋى مەكەنى» دەپ اتالاتىن سورەگە كەز كەلگەن ادام ءوز ۇلەسىن قوسا الاتىنىن ايتادى. ياعني، دۇكەنگە كەلگەن جان ساتىپ العان زاتىن وسى سورەگە قالدىرۋعا بولادى. ال شارانىڭ نەگىزگى ماقساتى - مۇقتاج جاندارعا قامقورلىق كورسەتۋ.
بىر-بىرىمىزگە كومەك كورسەتۋ - باستى ماقساتىمىز. ءار قازاعىم جالعىزىم دەيدى. تەك قانا باقۋاتتى ادامدار عانا مەيىرىمدىلىك كورسەتە المايدى، ءبارى كورسەتۋ كەرەك. ەكى شوكولاد الىپ، ءبىر شوكولادتى وسىندا قويىپ، ءبىر شوكولادتى ءوزى جەسە، ول بالالارعا ۇلكەن تاربيە دەپ ويلايمىن، - دەدى الماتى وبلىستىق ىسكەر ايەلدەر كەڭەسىنىڭ مۇشەسى الماگۇل وڭعاربايەۆا.
الماتى وبلىسىنىڭ ىسكەر ايەلدەرى تەگىن ازىق-تۇلىك سورەسىن ازىرگە نان، قانت، كەسپە، شاي سياقتى داستارقانعا ەڭ قاجەتتى ونىمدەرمەن تولتىرعان. ال الداعى ۋاقىتتا مۇنداي سورەلەردى الماتى وبلىسىنىڭ بارلىق وڭىرلەرىندە اشساق دەگەن جوسپارلارى بار جانە ونىڭ ىشىندەگى تاۋارلاردى دا تۇرلەندىرە تۇسپەك.