بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ facebook-تەگى پاراقشاسىنا جازدى دەپ حابارلايدى almaty-akshamy.kz
ونىڭ ايتۋىنشا، ەلدىڭ باتىسىنداعى ماسەلە پرەزيدەنت قاسىم-جومارت كەمەل ۇلى توقايەۆتىڭ تولىق باقىلاۋىندا.
مەملەكەت باسشىسىنىڭ تاپسىرماسىمەن ارنايى ۇكىمەتتىك كوميسسيا قۇرىلدى. بۇگىندە كوميسسيا وكىلدەرى وڭىرگە بارىپ، ءوز جۇمىسىن باستادى. ماسەلە ديالوگ نەگىزىندە شەشىلۋگە ءتيىس جانە پرەزيدەنتىمىز ايتقانداي، بارلىق تاراپتىڭ مۇددەسىن ەسكەرەتىن شەشىمگە كەلۋ ماڭىزدى. قازىرگى تاڭدا ماڭعىستاۋدان سايلانعان سەناتورلارىمىز دا سول وڭىردە ماسەلەنىڭ وڭ شەشىلۋىنە اتسالىسۋدا،-دەپ جازدى سەنات ءتوراعاسى.
سونىمەن قاتار ول ءبىز ەلدىكتىڭ ماڭىزدى مەجەسىندە تۇرمىز دەگەن ويىن ءبىلدىردى.
تاۋەلسىزدىگىمىزدى كوزدىڭ قاراشىعىنداي ساقتاپ، ەگەمەندىگىمىزدى ودان ءارى نىعايتۋ - باستى مىندەتىمىز. كەز كەلگەن ماسەلەنىڭ شەشىمىن تابۋعا بولادى، ول ءۇشىن، ەڭ الدىمەن، جىلدار بويى قالىپتاسقان بىرلىگىمىز بەن تۇراقتىلىعىمىزعا سىزات تۇسىرمەۋ اسا ماڭىزدى،-دەپ جازدى اشىمبايەۆ.