جەتپىستىڭ سەگىزىنە شىققان ايتمۇحان ءالىموۆ سولتۇستىك قازاقستان وبلىسىنا قاراستى كييەۆسكوە سەلوسىندا تۇرادى. ون ساۋساعىنان ونەر تامعان اقساقالدىڭ قولىنان كەلمەيتىنى جوق. قاراپايىم ءۇي جيھازدارىنان باستاپ سان ءتۇرلى كولىكتەردى ءوز قولىمەن جاساپ شىققان. تەمىردەن ءتۇيىن تۇيگەن قاجىرلى اقساقال كۇنى بۇگىنگە دەيىن گاراجىنان شىقپاي قيالىنا كەلگەن عاجايىپ دۇنيەلەردى جاساپ ەلدى تاڭ-تاماشا ەتۋدە، - دەپ حابارلايدى Almaty-akshamy.kz. Massaget.kz-كە سىلتەمە جاساپ.
بالا كەزىنەن وي-ساناسى تىڭ جاڭالىق پەن تەحنيكاعا ءۇيىر بولعان ايتمۇحان اقساقالدىڭ ءۇيى تۇتاستاي مۋزەي دەۋگە دە بولادى. ءۇي ىشىندەگى كەرەۋەت، اينا، اۋلاداعى بايتەرەك عيماراتىنا ۇقساس ەتىپ سالىنعان قاقپا، ءتىپتى قاسىقتارعا دەيىن ءوز قولىمەن ورنەكتەپ جاساعان. ال سان ءتۇرلى قولىنان شىققان تەحنيكاسى ءوز الدىنا ءبىر توبە.
سوناۋ سەكسەنىنشى جىلدارى تەحنيكا جاساۋعا دەگەن قۇلشىنىسى جىگەرىن جانىعان ايتمۇحان ءالىموۆتىڭ ەڭ العاشقى تىرناقالدى تەحنيكالىق تۋىندىسى شاعىن تراكتور قۇراستىرىپ شىعۋدان باستالىپتى. ويماقتاي عانا شاعىن تراكتور ءۇي شارۋاسىنا قاجەتتى ونداعان ءىستى جىپ-جىلماعاي ەتەدى. باقشاداعى كارتوپتى ەگىپ، ءۇيدىڭ اۋلاسىن تازارتىپ، ءۇي سالاردا تىركەمەسىمەن بارلىق قاجەتتى زاتتاردى دا تاسىعان.
ايتمۇحان اقساقالدىڭ ءۇي ماڭىنداعى ونداعان جىلداردان بەرى جيناقتالعان تەمىر-تەرسەك قانداي ءىس باستاسا دا، بارلىق قاجەتتى زاتتارىن قينالماي تاۋىپ، ويىنا كەلگەن دۇنيەنى ويماقتاي ەتىپ جاساۋعا مۇمكىندىك بەرىپتى. شاعىن تراكتوردان كەيىن ايتمۇحان ءالىموۆتىڭ كەزەكتى يدەياسى ونى اناعۇرلىم ءىرى كولىكتى جاساپ شىعۋعا ىنتالاندىرادى. اقىرى دەگەنىنە جەتكەن قاريا اراعا ءبىرشاما ۋاقىت سالىپ ديزەل وتىنىمەن جۇمىس ىستەيتىن ءىرى كولىكتى جاساپ شىققان. وزدەرى وتباسىمەن ونى «دجيپ» دەپ اتاپ كەتىپتى. العاشقىدا قاراپايىم كولىك بولعان دجيپكە ۋاقىت وتە كەلە ءتۇرلى تىركەمەلەر جالعانىپ، ءشوپ شاۋىپ، ەگىن ورۋ، ءشوپ شومەلەسىن ىسىرۋ سياقتى سان ءتۇرلى قىزمەتتەر قوسىلعان. ءتىپتى وسى كولىكپەن بولعان قىزىقتى وقيعا ايتمۇحان اقساقالدىڭ قىزدارىنىڭ ءبىرى اسەل ايتمۇحان قىزىنىڭ ءالى كۇنگە ەسىندە قالىپتى.
«ۇلكەن كولىكتى ءبارىمىز «دجيپ» دەپ اتاپ كەتتىك. وسى كولىكپەن كەزىندە شەكارادان دا اسىپ، رەسەيگە وقۋعا تۇسكەن مەنى جەتكىزىپ سالعان كەزى دە بولدى. كۇنى كەشەگىدەي ءبارى دە كوز الدىمدا»، - دەيدى اسەل ايتمۇحان قىزى.
توقسانىنشى جىلدارداعى توقىراۋ كەزىن دە ايتمۇحان اقساقالدىڭ وتباسى ساعىنىشپەن ەسكە الادى.
جۇرتتىڭ ءبارى شامنىڭ بىلتەسىنەن تۇتانعان سىعىرايعان وتقا قاراپ قالعان شاقتا ايتمۇحان اقساقال ءۇيىنىڭ توبەسىنە جەلدەن قۋات الاتىن "ۆەرتۋشكا" جاساپ ءۇي ءىشى سامالاداي جارىق بولىپ، ءارى بالالارى مەن قوسا اۋىلداس كورشى-قولاڭ دا جينالىپ تەلەديدار كورىپتى. ونەرى ءبىر باسىنان اسىپ توگىلگەن اقساقالدىڭ قيالىنان شىققان دۇنيەلەرى وتباسىنا عانا ەمەس، تۇتاس اۋىلعا دا زور كومەگىن تيگىزىپتى. جارىقتىڭ زاردابىن تارتقان اۋىلداستارىنىڭ جايىن ويلاعان اقساقال ءبىر كۇنى ەلەكتر قۋاتىن شىعاراتىن شاعىن ستانسيانى دا جاساپ شىعادى. وسى كۇننەن باستاپ ايتمۇحان اقساقالمەن قوسا اۋىلداستارى دا كەشكى اسىن سامالاداي جارىق ۇيدە وتىرىپ ىشەتىن بولدى.
ايتمۇحان اقساقالدىڭ اۋىل جۇرتى ءۇشىن جاساعان جاقسىلىعىنىڭ تاعى ءبىرى - كادىمگى ۇن تارتاتىن ديىرمەن بولىپتى.
«ءبىزدىڭ ءالى بالا كەزىمىز. ول كەزدە قازىرگىدەي ەمەس ءبارى بيدايدى ديىرمەنگە اپارىپ ۇن تارتقىزىپ كەلەتىن. ناندى بارلىق ءۇي پەشكە ءپىسىرىپ الاتىن. اكەم سول كەزدە اۋىلداستارى ءۇشىن تاعى تىڭ دۇنيەسىن شىعارىپ ءوزى قولدان جاساعان ديىرمەنىمەن ۇن تارتىپ بەرىپ ءجۇردى. ءتىپتى اۋىلدىڭ ىرگەسىندەگى «كييەۆسكيي» دەپ جازىلعان اۋىلدىڭ اتاۋىنا دەيىن اكەمىز ءوزى سەمەنتتەن قۇيىپ وتىرىپ شىعارعانىن اۋىل حالقى كۇنى بۇگىنگە دەيىن ماقتانىش ەتەدى»، - دەيدى التىناي ايتمۇحان قىزى.
ونەرتاپقىش قارتتىڭ قولىنان شىققان ەڭ وزىق تەحنيكالىق تۋىندىسى تىكۇشاق ەكەن. ايتمۇحان اقساقال تىكۇشاق جاساپ شىعۋدى ءومىر بويى ارمانداپتى. اقىرى كوزدەگەن ماقساتىنا جەتىپ، وسىدان ون جىلداي بۇرىن تەمىردەن قاڭقاسىن قۇراستىرعان ارمانىنداعى تىكۇشاق تا دايىن بولادى. قوزعالتقىشىن ىسكە قوسقان تىكۇشاق ءتىپتى اسپانعا دا كوتەرىلگەن ەكەن.
«تىكۇشاقتىڭ اياقتالىپ ىسكە قوسىلۋىن اۋىل جۇرتى تۇگەلدەي تاعاتسىزدانا كۇتىپ ءجۇردى. ىسكە قوسۋ ءساتى اۋىل ءۇشىن ۇلكەن مەيرام بولدى دەسە دە بولادى. بالا-شاعاعا دەيىن تۇگەلدەي جان-جاعىنان قاۋمالاپ اكەمىزدىڭ بالا كەزىنەن ارمان بولعان تىكۇشاقتىڭ ىسكە قوسىلۋىن كۇتتىك. كادىمگىدەي پروپەللەرى، شاعىن كابيناسى بار تىكۇشاق شىنىمەن دە وتە ءساتتى شىقتى. سىرتى قاپتالماعان جان-جاعى اشىق قۇر قاڭقاسى بولاتىن. اكەم تىكۇشاقتى ىسكە قوسىپ جەردەن اۋدەم بيىككە دەيىن جوعارى كوتەرىلدى. ءبىراق قورىققان بولۋى كەرەك ءبىرشاما بيىككە كوتەرىلگەن سوڭ دەرەۋ موتورىن ءسوندىرىپ تومەن ءتۇستى. ودان كەيىن تىكۇشاقتى بىردەن بۇزىپ تاستاپ جول تالعامايتىن كولىك جاساۋعا كىرىستى»، - دەيدى التىناي ايتمۇحان قىزى.
قاريا كولىككە ءوزى جوقتا بىرەۋلەر ءمىنىپ ارانداپ قالا ما دەپ قاۋىپتەنگەندىكتەن، تىكۇشاقتى بۇزىپ، باسقا كولىك شىعارۋدى ءجون ساناپتى. بۇل جولى ايتمۇحان قاريانىڭ قيالى جول تالعامايتىن «ۆەزدەحود» جاساپ شىعارۋعا اۋادى. ويلاعانىن بىردەن سىزىپ تاستاعان اقساقال ارادا كوپ ۋاقىت وتپەي جاڭا كولىكپەن اۋىزاشارعا باراتىن بولىپتى. شاعىن عانا كولىكتىڭ ءۇستى كابريولەت كولىگى سياقتى قالىڭ ماتەريالمەن اشىلىپ-جابىلادى.
«ءقازىر اكەمىز سول «ۆەزدەحودىمەن» اۋرە بولىپ ءجۇر. كۇن سايىن، ايتەۋىر، ءبىر تىڭ دۇنيەسىن جاساپ، ءبارىمىزدى قۋانتادى ءارى تاڭعالدىرادى. وتكەندە الدىڭعى جاعىندا كىشكەنە دوڭگەلەك بولسا، ەندى ونىڭ ورنىنا ۇلكەن دوڭگەلەكتەر قويىپ العان. اكەمنىڭ قولىنان ءبارى دە كەلەدى. ءبىزدى دە ءوزى سياقتى ەڭبەكقور قىلىپ تاربيەلەدى. انام - جەتى قۇرساق كوتەرگەن باتىر انا. وكىنىشكە وراي، ەكى باۋىرىمنان ايىرىلىپ قالعانبىز. ءقازىر بەس بالاسى بار. بارىمىزگە اكەمىزدەن كەيبىر قاسيەتتەرى جۇققان. دەگەنمەن قايتىس بولعان ەڭ ۇلكەن اپكەمىز اكەم سياقتى قولىنان كەلمەيتىنى بولمايتىن»، - دەيدى التىناي ايتمۇحان قىزى.
ايتمۇحان اقساقال - قولونەر مەن تەحنيكا شىعارۋدان بولەك شىعارماشىلىققا دا دەن قويعان سەگىز قىرلى ءبىر سىرلى ادام. قولى قالت ەتكەندە اقساقال سۋرەت سالادى. ولەڭ جازاتىن اقىندىق قاسيەتى دە بار. قاريانىڭ قولىنان شىققان ۇزدىك شىعارمالارىنىڭ ءبىرى نۇرسۇلتان نازاربايەۆتىڭ شاعىن ءبيۋستى بولىپتى. اينىتپاي سالىنعان ءمۇسىن دە تاڭداي قاقتىرادى. اقساقالدىڭ قولىنىڭ تاڭباسى قالعان "تۋىستارعا ەسكەرتكىش" كىتابى ۇرپاقتارىنا تاعىلىمى مول مۇرا بولىپ قالعان.
ايتمۇحان اقساقال جۇبايى باتيمامەن جەتى بالا تاربيەلەپ وسىرگەن. بۇگىندە 4 نەمەرە، 8 جيەن تاراعان. ەكى قىزى مەكتەپتكە ۇستازدىق ەتسە، ءبىرى كوكشەتاۋ قالاسىندا اۆتوبۋس پاركىندە، ءبىرى پەتروپاۆل قالاسىندا جاتكا ىستەيتىن كاسىپورىندا جەمىستى ەڭبەك ەتۋدە.
بۇگىندە وتاۋ قۇرعاندارىنا 50 جىل تولعان اقار-شاقار اۋلەتتىڭ تىرەگى ءھام جۇرەگى بولعان ايتمۇحان اقساقالعا ءبىز دە زور دەنساۋلىق پەن ۇزاق تا باقىتتى عۇمىر تىلەدىك...
ابزال الپىسباي ۇلى
ماقالا massaget.kz-تەن الىندى.