ول سوت وتىرىسىنا №64 مەكەمەدەن ونلاين رەجيمدە قاتىسادى.
استانادا ارىستانبەك مۇحامەديۇلىنا قاتىستى باستى سوت وتىرىسى باستالدى، دەپ حابارلايدى Almaty-akshamy.kz.
سوت وتىرىسى بايقوڭىر اۋداندىق №2 سوتىندا ءوتىپ جاتىر. ءىستى سۋديا باعلان ىدىرىسوۆ قارايدى.
"بۇگىن سوتتالۋشى اۋا رايىنا بايلانىستى ونلاين قاتىسادى، كەيىن وفلاين رەجيمدە قاتىسادى"، - دەدى سۋديا باعلان ىدىرىسوۆ.
ارىستانبەك مۇحامەدي ۇلى 2022 جىلعى مامىردا قاماۋعا الىنعان. ول كەزدە مۇحامەدي ۇلى ۇلتتىق مۋزەيدى باسقارىپ تۇرعان ەدى. 28 مامىردا سوت سانكسياسىمەن مۇحامەديۇلىنا قاماۋدا ۇستاۋ تۇرىندەگى بۇلتارتپاۋ شاراسى تاعايىندالدى.
سىبايلاس جەمقورلىققا قارسى قىزمەت "الەم مۇراجايلارى بويىنشا التىن ادام شەرۋى" حالىقارالىق كورمەسىن وتكىزۋ بويىنشا مەملەكەتتىك ساتىپ الۋ تۋرالى شارت شەڭبەرىندە 146 ميلليون تەڭگە مولشەرىندە بيۋدجەت قاراجاتىن جىمقىرۋ دەرەگىنە قاتىستى ۇلتتىق مۋزەيدىڭ لاۋازىمدى تۇلعالارىنا جانە باسقا دا ادامدارعا قاتىستى تەرگەۋدى باستادى.
شىلدەدە سىبايلاس جەمقورلىققا قارسى قىزمەت اگەنتتىگى وكىلدەرى ۇلتتىق مۋزەيدىڭ بۇرىنعى باسشىلىعىنا جانە باسقا دا ادامدارعا قاتىستى 2017-2018 جىلدارى "اقپاراتتىق رەسۋرستاردا نىسانداردى تانىمال ەتۋ ءۇشىن جالپىۇلتتىق تىزبەگە ەنگىزىلگەن نىسانداردىڭ 3D-مودەلدەرىن قۇرۋ" جوباسىن ىسكە اسىرۋ كەزىندە اسا ءىرى مولشەردە بيۋدجەت قاراجاتىن ۇرلاۋ دەرەگى بويىنشا تەرگەۋ جۇرگىزىلىپ جاتقانىن مالىمدەدى. رەسمي دەرەكتەر بويىنشا تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ميلليارد تەڭگە بولادى.