مەگاپوليستە مۇمكىندىگى شەكتەۋلى جانداردىڭ ارباسىن جوندەيتىن ۇستاحانا اشىلدى.
بۇل نىسان «مۇمكىندىگى شەكتەۋلى جاندارعا ارنالعان تەحنيكالىق قىزمەت كورسەتۋ ورتالىعى» دەپ اتالادى. ورتالىقتى اشقان جاس كاسىپكەر داۋرەن ءاليحان ەسىمدى جىگىت. ول وسى ورتالىق ارقىلى تاعدىرلاس جارىمجان جاندارعا كومەك كورسەتۋدى ويلاعان.
«ارباداعى ادامداردىڭ جاعدايىن جاقسى تۇسىنەمىن. كەيبىرەۋلەرىنىڭ ارباسى سىنىپ، جازىم بولا جازداعان كەزدەرى بولدى. قالامىزدا مۇنداي ورتالىق بولماعاندىقتان، اشۋ كەرەكتىگىن تۇسىندىك. 2020 جىلدان باستاپ ىسكە كىرىستىك، مەملەكەتتىك گرانتقا يە بولدىق. الايدا، ول جەر بىزگە تارلىق ەتكەندىكتەن، «باقوردا ستروي سيتي» ساۋدا ورتالىعىندا 192-بۋتيكتە ءوز جۇمىسىمىزدى باستادىق. قازىرگى ۋاقىتتا جاڭا جوبالاردى قولعا الا باستادىق. بۇگىندە بىزگە ەلىمىزدىڭ ءار وڭىرىنەن، قىزىلوردا، تالدىقورعان سەكىلدى قالالاردان تاپسىرىس كەلىپ تۇسۋدە. قازىرگى ۋاقىتتا بىزدە 7 بىردەي ادام جۇمىس ىستەيدى. ءبىز سىنعان، جارامسىز دەگەن اربالاردى جوندەپ، يەلەرىنە تابىس ەتەمىز. وسى رەتتە بىزگە قولداۋ بىلدىرگەن اكىمدىككە ەرەكشە العىسىمىزدى بىلدىرەمىز»، – دەيدى «Inclusion.kz» ج ش س ديرەكتورى داۋرەن ءاليحان.
بۇگىندە ول جوبادان بولىنگەن قاراجاتقا ورتالىقتىڭ تەحنيكالىق جوندەۋ قۇرىلعىلارى قاتارىن تولىقتىرعان. شەبەرحانا جانىنان شاعىن سەح اشىپ، ءبىر مەزگىلدە بىرنەشە اربا جوندەۋ مۇمكىندىگىنە جول اشتى. قازىرگى تاڭدا مۇندا بىرنەشە جاندى جۇمىسپەن قامتىپ وتىرعان جايى بار.
«مۇگەدەكتىگى بار تۇلعالارعا اربالار تەگىن بەرىلدى. ول ءۇشىن ءبىزدىڭ ورتالىققا جۇگىنىپ، وتىنىشتەرىن قالدىرۋى قاجەت. ءبىزدىڭ ورتالىق ارقىلى قازىرگى ۋاقىتتا 5 مىڭنان استام ادام كرەسلو-اربالاردى العان. زاڭ بويىنشا، اربالار 7 جىلدا ءبىر رەت اۋىستىرىلادى. مەرزىمىنە جەتپەي بۇزىلعان، سىنعان اربالاردى جوندەۋ ءۇشىن بىزگە وسىنداي ورتالىقتار قاجەت. قازىرگى ۋاقىتتا جىگىتتەر ءوز جۇمىستارىن كەڭەيتىپ، جاڭا ورىندار اشىپ جاتقان جايى بار. الماتى قالاسىندا تۇراتىن تۇلعالار ءبىزدىڭ مەكەمەگە كەلىپ، وسى جەردەن تەگىن كومەك الا الادى»، – دەيدى «تەڭ مۇمكىندىكتەر» ورتالىعىنىڭ باسشىسى امانات سۇلتانعازييەۆ.
ەرەجە بويىنشا، جارىمجان جاندار مەملەكەت تاراپىنان بەرىلەتىن ارباعا جەتى جىلدا ءبىر رەت قول جەتكىزەدى. الايدا، وسى ۋاقىت ارالىعىندا اربالار بۇزىلادى، ءبىر قۇرىلعىسى بولسا دا، ىستەن شىعادى. جاڭادان اربا ساتىپ الۋعا كوبىسىنىڭ قالتاسى كوتەرمەيدى. ال مۇنى جوندەيتىن مامان تاپشى، ءتىپتى جوق دەۋگە دە بولادى. سوندىقتان وسى ماسەلەنى شەشۋدى ويلاپ، مۇمكىندىگى شەكتەۋلى جاندارعا ارنالعان تەحنيكالىق قىزمەت كورسەتۋ ورتالىعىنىڭ اشىلعانى كوپتىڭ قۋانىشىنا اينالدى دەسەك، ارتىق ايتپاعانىمىز بولار.
داۋرەننىڭ ساپالى جۇمىسىنا سۇرانىس جوعارى. ءتىپتى، ەلىمىزدىڭ وزگە ايماقتارىنان دا تاپسىرىستار تۇسۋدە. تەلەفون ارقىلى حابارلاسىپ، اربا جوندەپ بەرۋىن سۇراۋشىلار جەتەرلىك. كاسىپكەر اربالاردى جوندەۋمەن قاتار جاڭا جوبالاردى جۇزەگە اسىرا باستاعان. كرەسلو-اربالاردىڭ جۇرۋىنە ىڭعايلى بولۋى ءۇشىن ەلەكتر پريستاۆكا ويلاپ تاپقان. شەتەلدەردە مۇنداي قۇرىلعىلارعا جالعانعان كرەسلو-اربالار 1 ملن تەڭگەدەن استام باعادا ساتىلادى. ال بۇل جىگىتتەردەن الساڭىز، جالپى سوماسى 300 مىڭ تەڭگەنىڭ توڭىرەگىندە.
«قازىرگى ۋاقىتتا بىزدەر ەلەكتر اربالاردى الماستىراتىن پريستاۆكالار جاساپ جاتىرمىز. ونىڭ قۇرىلىمى دا وتە قاراپايىم. المالى-سالمالى. ەشكىمنىڭ كومەگىن قاجەت ەتپەيدى. 30 كم قاشىقتىقتى ءجۇرىپ وتە الادى. ەكى ساعات توك كوزىنە قويساڭىز، 24 تاۋلىك ەمىن-ەركىن توقتاۋسىز جۇرە الاسىز. باعاسى دا قولجەتىمدى. مۇنداي پريستاۆكالاردى جاساۋعا 1 اپتا كەتەدى. قاراپايىم ەلەكتر ساموكاتتاردى بولشەكتەپ، كرەسلو-اربالارعا ىڭعايلاپ جاسايمىز. جىلدىڭ قاي مەزگىلىندە بولسىن، ەركىن جۇرە الاسىز»، – دەيدى «Inclusion.kz» ج ش س ديرەكتورى داۋرەن ءاليحان.